Read Hindi, Fiji Raom 5 Bible Online

Raom 5 - Hindi, Fiji bible

Raom 5

¹Biswaas se hamme Parmeshwar apnaay hei. Aur ab Prabhu Yeeshu Maseeh ke jariye hamaar mel Parmeshwar se hoy hei.

²Yeeshu, biswaas ke kaaran hamme Parmeshwar ke mahima meñ laais hei, aur ab ham wahiñ rahta hei. Ab ham khusi se hei, aur Parmeshwar ke mahima uske sañghe baaṭega.

³Lekin etna kaafi nai hei! Ham khusi se u sab sankaṭ sahega jon hamaar saamne aai, kaahe ki ham jaanta hei ki museebat se hamaar sahe ke taagat baṛhe hei.

⁴Sahe ke taagat hee hamaar swabhaao banaay hei aur hamme aasha aur himmat de hei.

⁵I aasha hamme kabhi nai kamjor banaay saki. I sab i kaaran hoy hei kaahe ki Parmeshwar hamme Pawitr Aatma jon uske bagal se hamaar waaste ek daan hei, dees hei.

⁶Prabhu Yeeshu hamaar waaste tab maris jab ham paapi aur besahaara raha.

⁷Koi bhi, ek imaandaar admi ke waaste mare nai maañgi, lekin saait koi bhala admi ke waaste mare ke khaatir taiyaar hoy jaai.

⁸Lekin Parmeshwar hamme dekhaais ki u hamme ketna pyaar kare hei ki u Yeeshu Maseeh ke hamaar waaste mare dees, etna jaane pe bhi ki ham ketna paapi hei.

⁹Lekin abhi aur hei! Parmeshwar hamme apnaais kaahe ki Yeeshu Maseeh aapan khuun ke bali chaṛhaais raha, aur ham Parmeshwar ke gussa se bhi bacha rahega.

¹⁰Agar ham Parmeshwar ke dusman hei tab bhi, u ham se mel karis, kaahe ki uske laṛka hamaar waaste maris raha. Aur ab isse bhi baṛa mel milaap hei. Ab jab ham Parmeshwar ke dost hei, tab uske laṛka ke jeewan se ham log bachega.

¹¹Agar iske chhoṛ ke kuchh aur hei, hamme bahut khusi hei, kaahe ki Parmeshwar aapan laṛka Yeeshu Maseeh ke hamaar mel ke waaste bhejis raha.

¹²Eiḍam paap karis raha, aur wahi paap dunia meñ maut laais. Ab sab koi paap kare hei, yahi kaaran sab koi mari.

¹³Kaanuun ke aay se pahile dunia meñ paap raha. Lekin paap ke baare meñ likha nai gais raha, kaahe ki tab kaanuun nai raha.

¹⁴Fir bhi maut Eiḍam se leke Maozas tak ke nai chhoṛis. I eise bhais kaahe ke, aur sab log Parmeshwar ke saamne apraadh nai karin jeise ki Eiḍam karis raha. Kuchh rakam se Eiḍam, Yeeshu ke rakam raha jon baad meñ aais.

¹⁵Lekin Parmeshwar ham log ke jon cheej dees hei, u Eiḍam ke paap se dusra rakam raha. Uske ek paap ke kaaran bahut log maut paain. Aur is se bhi baṛh ke, khali Yeeshu akele Parmeshwar ke daya ke bardaan bahut se log tak laais.

¹⁶Eiḍam ke paap aur Parmeshwar ke bardaan meñ bahut farka hei. Wahi ek paap, saja laais. Lekin Parmeshwar ke bardaan hamme i saabit karis ki u hamme apnaais hei, jab ki ham bhi bahut dafe paap kara hei.

¹⁷Maut raaja ke rakam raaj karis kaahe ki Eiḍam paap karis raha. Lekin ham iske tulna usse nai kare sakta jon Yeeshu Maseeh karis hei. Parmeshwar ham pe bahut daya karis hei, aur Yeeshu ke kaaran hamme apnaais hei. Aur ham jiega aur raaja ke rakam raaj karega.

¹⁸Sab koi ke saja mile ke raha, kaahe ki Eiḍam paap karis raha. Lekin jon achchha kaam Yeeshu karis hei, uske kaaran Parmeshwar hamme apnaay hei aur jeewan ke bardaan de hei.

¹⁹Eiḍam, Parmeshwar ke saamne apraadh karis aur bahut ke bhi paapi banaais. Lekin Yeeshu uske baat maanis aur ketna log ke madat karis ki Parmeshwar u sab ke apnaay.

²⁰Kaanuun aais, ki jisse paap ke taagat dekha jaay sake. Aur jahañ paap taagat waala raha, tab Parmeshwar ke daya usse bhi jaada taagat waala raha.

²¹Paap, maut ke bal pe raaj karis. Lekin Parmeshwar ke daya ab bhi raaj kare hei, aur Parmeshwar hamme Yeeshu Maseeh ke kaaran apnaais. Iske matlab i bhais ki hamme anant jeewan mili.