Read Hindi, Fiji Raom 6 Bible Online

Raom 6 - Hindi, Fiji bible

Raom 6

¹Ham kaa boli? Kaa ham paap karte rahi, ki jisse Parmeshwar ke daya aur baṛhe?

²Nai, hamme i nai kare ke chaahi! Agar ham paap ke khaatir mar gaya hei, to aur paap keise ham kare sakta hei?

³Kaa tum nai janta ki ham baptisma leke Yeeshu ke sañghe hoy gaya hei, to kaa ham uske maut meñ sañghe nai hei?

⁴Jab ham baptisma lia raha, tab ham Yeeshu ke sañghe mar ke dafnaay dewa gay raha. Ham baptisma lia raha, ki jisse hamme nawa laaif mile, wahi rakam jeise Yeeshu, Parmeshwar ke mahima se mar ke jinda hoy gais.

⁵Agar ham baptisma leke Yeeshu ke maut ke baaṭ leta hei, to ham bhi uske sañghe jinda hoy jaayga.

⁶Ham i bhi janta hei ki hamaar rakam admi log Yeeshu ke sañghe kros pe chaṛhaay dewa gain raha. I sab i kaaran bhais raha ki jisse, hamaar paapi deñhi paap ke gulaam nai rahe paay.

⁷Ham janta hei ki jon mar jaay hei u paap se chhuṭkaara paay le hei.

⁸Jeise ham Maseeh ke sañghe mara hei, weisaiyeñ hamaar biswaas hei ki ham uske sañghe jiega.

⁹Ham janta hei ki maut ab Yeeshu ke uppar hak nai jamaay sake hei. U mar gais raha aur fir se jinda kara gais, aur ab u kabhi nai mari.

¹⁰Jab Yeeshu maris raha, tab u paap ke khaatir ekke dafe hardam ke waaste maris raha. Lekin ab to u jinda hei, aur u khali Parmeshwar ke khaatir jie hei.

¹¹Yahi rakam tum bhi apne aap ke bhi paap meñ mara samjho. Lekin Yeeshu Maseeh tumme laaif dees hei, aur Parmeshwar ke khaatir jio.

¹²Paap ke aapan deñhi meñ raaj nai kaaran deo. Aakhir, tum ek roj marega, to uske maañg pe kabhi nai chalo.

¹³Aur aapan deñhi ke koi bhi hissa ke paap ke gulaam nai bane deo. Apne aap ke Parmeshwar ke de deo, ulog ke rakam jon mare se jinda hoy gain hei. Aapan ek ek hissa Parmeshwar ke gulaam banaao, ki jisse u khusi hoy.

¹⁴Paap ke aapan uppar raaj nai karan deo, kaahe ki tum Parmeshwar ke daya se chalta hei, kaanuun se nai.

¹⁵I sab ke matlab kaa hei? Kaa hamme paap se chhuṭṭi mil gais hei, i kaaran ki Parmeshwar ke daya ham pe raaj kare hei, aur kaanuun nai? Bilkul nai!

¹⁶Kaa tum nai janta ki tum uske gulaam hei jiske bole pe chalta hei? Tum paap ke gulaam hoy ke mar jaay sakta hei, aur tum Parmeshwar ke baat maane waala gulaam bhi hoy sakta hei aur tumme u apnaay lei.

¹⁷Tum paap ke gulaam raha. Lekin ham Parmeshwar ke dhanbaad deta hei ki ab tum aapan dil se u ṭeeching, jon ham tumme dia hei, uske maana.

¹⁸Ab tum paap se free hei aur Parmeshwar ke gulaam hei, jon uske khusi kare hei.

¹⁹Ham i hardam hoy waala baat tumme bataata hei, kaahe ki tum ab bhi kamjor hei. Tum aapan deñhi ke hissa ke kharaab bichaar ke gulaam banaay deta raha. Lekin ab tum ek ek hissa ke Parmeshwar ke de dega, ki jisse tum puura ke puura uske hoy jaayga.

²⁰Jab tum paap ke gulaam raha, tab tumme Parmeshwar ke khusi nai rakkhe ke raha.

²¹Lekin u sab kaam se tumme kaa achchha mila? Tumme to khali saram lagat raha, aur tum maut ke taraf jaat raha.

²²Ab tum paap se free hei, aur Parmeshwar ke gulaam hei. Yahi tumme pawitr banaai aur anant jeewan ke bagal le jaai.

²³Maut se paap ke karja utre hei. Lekin Parmeshwar ke bardaan, Yeeshu Maseeh ke bagal se anant jeewan hei