Read Hindi, Fiji Raom 8 Bible Online

Raom 8 - Hindi, Fiji bible

Raom 8

¹Agar tum Maseeh meñ hei, to tumme saja nai mili.

²Pawitr Aatma tumme u jeewan dei jon Yeeshu Maseeh ke bagal se aay hei, aur tumme tumhaar paap aur maut se mukti karaay dei.

³Maozas ke kaanuun i nai kare sake hei, kaahe ki hamaar selfish ichchha kaanuun ke kamjor banaay de hei. Lekin Parmeshwar tumme free kar dees hei jab u aapan laṛka ke bhejis ki u ham paapi log ke rakam rahe aur hamaar paap ke waaste balidaan hoy. Parmeshwar, Yeeshu ke deñhi se paap ke naas karis.

⁴U i sab i khaatir karis ki jisse ham wahi kari jon kaanuun hamme Aatma se bataay hei, aapan selfish ichchha se nai.

⁵Jon log aapan ichchha pe chale hei, ulog khali aapan baare meñ soche hei. Lekin jon log Pawitr Aatma ke bole pe jiye hei, u sab aatmik cheej ke baare meñ soche hei.

⁶Agar hamaar dimaag hamaar ichchha waala baat maane hei, to ham jaruur marega. Lekin agar hamaar dimaag Aatma ke bal pe chale hei, to hamme jeewan aur saanti mili.

⁷Ham log ke ichchha, Parmeshwar ke agaiñsṭ hardam hoy jaay hei, kaahe ki u Parmeshwar ke baat pe chale nai sake hei.

⁸Agar ham aapan ichchha pe chalta hei, to ham Parmeshwar ke khusi nai rakkhe sakta hei.

⁹Tum aapan ichchha se raaj nai kare sakta hei, lekin Parmeshwar ke Aatma se, jon tumhaar bhittar rahe hei. Jon log ke paas Yeeshu ke Aatma nai hei, ulog Yeeshu ke nai hoy sake hei.

¹⁰Prabhu Yeeshu tum meñ rahe hei. Tum jinda hei kaahe ke Parmeshwar tumme apnaais hei, jab ki tumhaar paap ke kaaran tumhaar deñhi ke mare ke hei.

¹¹Fir bhi Parmeshwar, Yeeshu Maseeh ke jinda karis! Parmeshwar ke Aatma tum meñ rahe hei, aur u tumme Aatma ke bal se jinda kari.

¹²E hamaar dost log, ham jon cheej mañgta hei uske waaste nai jinda rahe ke hei.

¹³Agar eise hoi, to tum mar jaayga. Lekin tum fir bhi jinda rahe sakega agar Parmeshwar ke Aatma ke mutaabik, tum jon sab cheej mañgta hei, uske “Naa” bolega.

¹⁴Khali wahi log jon Parmeshwar ke Aatma ke mutaabik chale hei, uske laṛkan hei.

¹⁵Parmeshwar ke Aatma hamme u gulaam nai banaay hei, jon usse ḍare hei. Uske badle, ham uske laṛkan ban gaya hei aur ham uske “E Pita” bolaata hei.

¹⁶Parmeshwar ke Aatma bataay hei ki ham uske laṛkan hei.

¹⁷Uske Aatma hamme janaawe hei ki Krisṭ ke sañghe Parmeshwar hamme u sab dei jon u waada karis raha. Ham Krisṭ ke mahima bhi baaṭega, kaahe ke ham uske sañghe dukh bhi saha hei.

¹⁸Ham sab janta hei ki abhi ham jon kuchh sahta hei, u mahima jon ham dekhega, uske milaan meñ kuchh nai hei.

¹⁹Asal meñ sab cheej jon ke racha gais hei, i dekhe maañge hei Parmeshwar kab dekhaai ki uske laṛkan kon hei.

²⁰Abhi to krieishan (rachna) konfius hei, iske khaatir nai ki u konfius rahe maañge hei. Parmeshwar i aas meñ eise karis hei

²¹ki krieishan naas hoy se bach jaay, aur u aapan laṛkan ke shaandaar mahima meñ bhaag le sake.

²²Ham to janta hei ki krieishan abhi bhi u peeṛa meñ kahraay hei, jon peeṛa ek aurat bachcha ke janam dewe ke ṭaaim sahe hei.

²³Aatma hamme biswaas karaay hei ki aage hamme kaa sahe ke hei. Lekin abhi to ham chuppe chuppe kahraata hei, jab ham waiṭ karta hei ki Parmeshwar hamme dekhaay ki ham uske laṛkan hei.

²⁴Yahi aasha hei jon hamme bachaay hei. Lekin agar hamme u mil jaay jiske ham aasha karta hei, tab u aasha nai hei. Kaahe ke jiske ham dekhe sakta hei, to uske kaahe ke aasha karte rahi?

²⁵Fir bhi, ham uske aasha karega, jon ham kabhi nai dekha hei, aur ṭaaim leke waiṭ karta hei.

²⁶Kuchh cheej meñ ham kamjor hei, lekin Aatma hiañ hei aur hamme madat kari. Jeise ki, jab ham preya kare nai janta hei, tab Aatma hamaar waaste eise preya kare hei ki uske nai bataay sakta.

²⁷Hamaar man meñ kon cheej hei, u sab Parmeshwar jaane hei. Aur jab Aatma Parmeshwar ke log ke waaste preya kare hei tab u i bhi jaan le hei ki Aatma ke man meñ kon cheej hei.

²⁸Ham janta hei ki jon log Parmeshwar se prem kare hei, uske waaste Parmeshwar bhalaai ke kaam kare hei. I wahi log hei jon ke Parmeshwar chunis hei.

²⁹Aur Parmeshwar hardam se jaanat raha ki uske chuna gay log kon kon hoi. U feisla karis ki ulog ke u aapan laṛkan ke rakam bane dei, ki jisse uske laṛka, sab laṛkan meñ aage hoi.

³⁰Parmeshwar u sab ke apnaais, jon ke chune ke feisla karis raha, aur u sab ke aapan mahima baaṭis.

³¹Ham i sab baat ke baare meñ kaa boli? Agar Parmeshwar hamaar bagal hei, tab kaa koi hamaar agaiñsṭ hoy sake hei?

³²Parmeshwar aapan laṛka ke bhi nai chhoṛis, lekin ham log ke waaste uske bhi de dees. Agar Parmeshwar eise karis, to kaa u ham log ke sab cheej free meñ nai dei?

³³Parmeshwar ke chuna gay log pe kon dos lagaai, agar u boli ki u jon ke chunis hei, ulog ke apnaai?

³⁴Kaa koi ulog ke apraadhi maani? Nai! Krisṭ mar gais aur fir jinda hoy gais, aur abhi Parmeshwar ke raaiṭ saaiḍ meñ hei, aur hamaar waaste usse binti karte rahe hei.

³⁵Kaa koi cheej hamme Yeeshu Krisṭ ke prem se alag kare sake hei? Kaa dukh, sankaṭ, kharaab ṭaaim, bhuuk aur nañgaapan, khatra aur maut?

³⁶I ṭheek wahi rakam hei jeise Baaibal meñ likhaan hei, “Tumhaar waaste ham din bhar maut ke saamna karta hei. Ham log u bheṛa ke rakam hei jon ke maare ke waaste le jaawa jaay hei.”

³⁷I sab cheej meñ hamaar jeet sab se jaada bhais hei kaahe ke Yeeshu Maseeh ham se prem kare hei.

³⁸Hamme biswaas hei ki Parmeshwar ke prem se hamme koi nai alag kare sake hei, naa to jeewan ya maut, naa to swaragduut ya Aatma, naa to abhi ya aay waala ṭaaim,

³⁹aur naa to uppar ya nichche ke taagat. Eisan koi cheej nai banaawa gais hei jon hamme Parmeshwar ke prem se jon hamaar Prabhu Yeeshu Maseeh meñ hei, alag kare sake hei!