Read Hindi, Fiji 1 Kurinth 1 Bible Online

1 Kurinth 1 - Hindi, Fiji bible

1 Kurinth 1

¹Pol, jon ke Parmeshwar chunis raha ki u Yeeshu Maseeh ke chela bane, uske bagal se, aur hamaar bhaiya Sosthines ke bagal se.

²Parmeshwar ke u chech ke naam jon Kurinth meñ hei, Yeeshu Maseeh tumme chunis ki tum uske khaas log raho, aur uske naam se weship karo, jeise ham sab aur baaki log jon uske Prabhu bole hei kare hei.

³Hamaar i preya hei ki hamaar Pita Parmeshwar aur Prabhu Yeeshu Maseeh tum pe daya kari aur shaanti se aasheesh dei!

⁴Ham Parmeshwar ke hardam dhanbaad deta hei ki u ham pe daya karis ki u tumme Yeeshu Maseeh dees hei,

⁵jon tumme madat kare hei ki achchha se bole aur samjhe sakta hei.

⁶Ab tum ṭheek se janta hei ki jon sab ham Prabhu Yeeshu ke baare meñ tumme bataaya hei, u sab sach hei.

⁷Aur jabki tum uske lauṭe ke agorta hei, tum koi bhi aasheesh mis nai karta hei.

⁸Aur u roj tak jab Krisṭ lauṭi, tab tak u tumme bina dos ke rakkhi.

⁹Parmeshwar biswaas kare laayk hei, aur u tumme chunis ki tum uske laṛka, ham log ke Prabhu Yeeshu Krisṭ ke paaṭna bana raho.

¹⁰Hamaar pyaare dost log, jeise ke tum Prabhu Yeeshu Maseeh ke pichchhe chalewaala hei, ham tumse binti karta hei ki tum sab ekke baat bolo. Tum koi ke pach nai leo. Hardam wahi se raaji raho jon tum sochta hei ki ṭheek hei.

¹¹Kaahe ke Klaus ke ghar se hamme kuchh log bataain ki tum log meñ jhagṛa hoy hei.

¹²Ulog bolin ki tum meñ se kuchh log bole hei ki ulog hamaar pichchhe hei, aur koi bole hei ki ulog Apullos ya Peeṭa ke hei aur koi koi bole hei ki ulog Maseeh ke hei.

¹³Kaa Maseeh ke baaṭ dewa gais hei? Kaa hamme tumhaar waaste kros pe chaṛhaawa gay raha? Kaa tum hamaar naam se baptisma lia?

¹⁴Ham Parmeshwar ke dhanbaad deta hei ki ham Krispus aur Gayus ke chhoṛ ke aur koi ke baptisma nai dia.

¹⁵Tum meñ se koi bhi i nai bole sake hei ki tum hamaar naam se baptisma lia hei.

¹⁶Haañ ham Stifnas aur uske palwaar ke baptisma dia raha, aur hamme yaad nai ki ilog ke chhoṛ ke ham aur koi ke baptisma dia.

¹⁷Maseeh hamme baptisma de ke waaste nai bhejis raha. U hamme i khaatir bhejis ki ham sab ke bina baṛa baṛa boli iyuz kar ke susamaachaar sunaai ki jisse kros ke sakti nai miṭe saki.

¹⁸Kros ke sandes heraan log ke koi maane nai rakkhe hei. Lekin ham log meñ se jon ke bachaawa jaay hei, ulog ke khaatir Parmeshwar ke vachan kaam kare hei.

¹⁹Jeise Parmeshwar Baaibal meñ bole hei, “Jon koi bhi apne aap ke buddhimaan samjhe hei ham ulog ke buddhi ke naas kar dega. Ham ulog ke heiraan kar dega jon log soche hei ki ulog bahut jaane hei.”

²⁰U buddhimaan log ke kaa bhais? U shaastri log ke kaa bhais? Ulog ke kaa bhais jon sochat rahin ki ulog ke lage sab jawaab hei? Kaa Parmeshwar i nai dekhaais ki i dunia ke samajh muurakhta hei?

²¹Parmeshwar samajhdaar raha aur u bichaar karis ki dunia ke sab log uske baare meñ seekhe ke waaste aapan aapan buddhi nai iyuz kare paai. Uske badle meñ, Parmeshwar khali wahi log ke bachaais jon i bekaar sandes jon ham parchaar karta hei, uspe biswaas kare hei.

²²Yahuudi log chamatkaar maañge hei, aur Greek log buddhi ke khoj meñ rahe hei.

²³Lekin ham to parchaar karta hei ki Yeeshu ke kros pe chaṛhaawa gais raha. Jaada Yahuudi log ke isse problam hoy hei, aur Greek log soche hei ke i beokuufi hei.

²⁴Hamaar sandes, Yahuudi aur Greek log ke waaste Parmeshwar ke sakti aur buddhi hei.

²⁵Kaahe ke jab Parmeshwar muurakh hei, tab u sab se buddhimaan rahe hei, aur jab u kamjor hei, tab sab se taagatwaala rahe hei.

²⁶Hamaar dost log, yaad karo jab Parmeshwar tumme chunis, tab tum kon cheej raha. I dunia ke log i nai samjhin ki tum meñ se ketna log buddhimaan rahin. Tum meñ se khali thoṛa log uchcha jagha pe rahin, aur bahut kamti log naami palwaar se aain raha.

²⁷Lekin Parmeshwar i dunia ke muurakh log ke chunis ki buddhimaan ke saram meñ ḍaar dei. U i dunia ke kamjor cheej log ke chunis ki taagat waala ke saram meñ ḍaar dei.

²⁸Jon dunia samjhe hei ki bekaar aur raddi hei, u to kuchh nai jon Parmeshwar iyuz karis hei ki uske miṭaay dei jiske dunia jaruuri samjhe hei.

²⁹Parmeshwar i sab u khaatir karis ki koi uske saamne ghamanḍ nai kare.

³⁰Tum Parmeshwar ke laṛkan hei. U Yeeshu Maseeh ke hamme bachaay ke, buddhimaan, aur pawitr banaay ke waaste bhejis hei.

³¹Yahi kaaran agar tum ghamanḍ kare mañgta hei, to wahi karo jon Baaibal bole hei aur Prabhu ke ghamanḍ karo.