Read Hindi, Fiji 1 Kurinth 12 Bible Online

1 Kurinth 12 - Hindi, Fiji bible

1 Kurinth 12

¹Dosto, tum ham se aatmik bardaan ke baare meñ puuchha raha.

²Yaad rakhna, Prabhu ke hoy se pahile, u muurti jon baat bhi nai kare sake hei tumme ulṭa rasta pe le jaat raha.

³Ab tum jaan leo ki Parmeshwar ke Aatma tumme rasta dekhaay hei, aur tum bolega ki Yeeshu hee Prabhu hei, aur tum Yeeshu ke kabhi nai saraapega.

⁴Aatmik bardaan bahut rakam ke rahe hei, lekin u sab ekke Aatma se aay hei.

⁵Ek Prabhu ke bahut rakam se sewa kare ke hei,

⁶aur ham sab bahut rakam se kaam kare sakta hei. Fir bhi wahi ek Parmeshwar ham log meñ kaam kare hei, aur ham jon cheej bhi karta hei usman madat kare hei.

⁷Aatma ham log ek ek ke khaas rasta dees hei ki ham ek dusra ke sewa kari.

⁸Ham meñ se kuchh log buddhi se baat kare hei, aur kuchh log gyaan se baat kare hei, lekin i sab bardaan wahi ek Aatma se aay hei.

⁹Kuchh log ke Aatma biswaas aur sakti dees hei ki u log bimaar ke ṭheek kare saki

¹⁰ya to chamatkaar kare ke sakti dees hei. Ham meñ se kuchh nabi hei, aur ham meñ se kuchh log i dekhe sake hei ki Parmeshwar ke Aatma ham log ke beech meñ hei. Kuchh log alag alag bhaasha bole sake hei, aur baaki i bhi bataay sake hei ki u sab ke matlab kaa hei.

¹¹Lekin i Aatma hei jon i sab karaay hei aur disaaiḍ kare hei ki kon bardaan kiske de ke chaahi.

¹²Maseeh ke deñhi ke bahut alag alag bhaag hei, ṭheek wahi rakam jeise sab deñhi ke rahe hei.

¹³Ham meñ se kuchh Yahuudi hei, aur kuchh geir Yahuudi, kuchh gulaam hei, to kuchh ajaad hei. Lekin Parmeshwar ke Aatma ham sab ke baptisma dees hei aur ham log ke Maseeh ke deñhi ke paaṭ banaais hei. Ab ham sab wahi Aatma meñ se peeta hei.

¹⁴Ham log ke deñhi ke khali ek paaṭ nai hei. Isman bahut se paaṭ hei.

¹⁵Agar ek goṛ bole, “Ham haath nai hei, aur tab ham deñhi ke ek paaṭ nai hei.” Kaa tab bhi ek goṛ deñhi ke ek paaṭ nai hei?

¹⁶Ya saait ek kaan bole, “Ham aañkhi nai hei, aur tab ham deñhi ke ek paaṭ nai hei.” Kaa kaan deñhi ke ek paaṭ nai hei?

¹⁷Agar hamaar deñhi khali ek aañkhi rahta, tab ham kuchh bhi nai sune sakta. Aur agar khali ek kaan rahta, to ham kuchh suuñghe nai sakta.

¹⁸Lekin Parmeshwar ham log ke deñhi ke sab paaṭ ke ek sañghe rakkhis hei, jon rakam u sab se achchha samjhe hei.

¹⁹Ek deñhi keisan hota agar uske ekke paaṭ hota?

²⁰Bahut se paaṭ se ek deñhi hoy hei.

²¹Yahi kaaran ek aañkhi i nai bole sake hei ki u haath ke nai maañge hei. Yahi kaaran muuṛ nai bole sake hei ki uske goṛ ke jaruurat nai hei.

²²Asal meñ, ham log deñhi ke u paaṭ jon dekhe meñ sab se kamjor hei, uske bina kaam nai chalaay sakta.

²³Ham saaodhaani se aapan deñhi ke kuchh paaṭ ke taiyaar karta hei. Ham aapan pesanal paaṭ ke waaste jaada saaodhaan rahta hei,

²⁴lekin hamme baaki paaṭ ke waaste saaodhaan nai rahe ke hei. Parmeshwar hamaar deñhi ke eise banaais hei ki jon paaṭ bahut khaas nai hei, u bhi valubal dekhaay hei.

²⁵U i kaaran eise karis ki sab paaṭ ek dusra ke sañghe mil ke kaam kare, aur ek dusra paaṭ ke dekh bhaal kare.

²⁶Agar hamaar ek deñhi ke paaṭ ke peeṛa hoy hei, tab hamaar puura deñhi dukhe hei. Agar hamaar ek deñhi ke paaṭ ke maan hoy hei, tab puura deñhi khusi hoy hei.

²⁷Ek sañghe tum sab Maseeh ke deñhi hei. Ek ek uske deñhi ke paaṭ hei.

²⁸Pahile, Parmeshwar kuchh log ke chunis ki uske prerit aur nabi bane aur chech ke ṭeecha bane. Lekin u kuchh ke chunis ki chamatkaari kaam kare aur bimaar ke achchha kare, aur agua log ke madat kare aur dusra dusra bhaasha meñ baat kare.

²⁹Sab koi prerit nai hei. Sab koi nabi nai hei. Sab koi ṭeecha nai hei. Sab koi chamatkaari kaam nai kare sake hei.

³⁰Sab koi bimaar ke achchha nai kare sake hei. Sab koi dusra dusra bhaasha meñ baat nai kare sake hei. Sab koi nai bataay sake hei ki i bhaasha ke matlab kaa hei.

³¹Ham mañgta hei ki sab se achchha bardaan tum maañgo. Aur ham tumme sab se achchha rasta dekhaayga.