Read Hindi, Fiji 1 Kurinth 14 Bible Online

1 Kurinth 14 - Hindi, Fiji bible

1 Kurinth 14

¹Prem tumme rasta dekhaai. Sabar karo aur Pawitr Aatma se tumme bardaan mili, khaas kar ke bhawishvaani ke bardaan.

²Agar tum u bhaasha bolta hei, jon dusra nai jaane hei, Parmeshwar samajh lei ki tum kaa bolta hei, lekin dusra log nai samjhi ki tum kaa bolta hei. Tum bhed ke baat bolta hei jon khali Aatma samjhi.

³Lekin jab tum bhawishvaani karo, tumme samjha jaai, aur dusra log ke madat hoi. Ulog ke saahas mili aur ulog achchha feel (mahsuus) kari.

⁴Jon eisan bhaasha meñ bole hei jon dusra nai jaane hei, u khali aapan bhalaai dekhe hei. Lekin bhawishvaani bol ke tum chech meñ sab ke bhalaai karta hei.

⁵Hamme khusi hei ki tum anjaan bhaasha bol leta hei, lekin ham maañgega ki tum bhawishvaani karo. Kaahe ke bhawishvaani usse to bahut achchha hei, jon dusra bhaasha bole hei lekin samjhaay nai hei ki uske matlab kaa hei.

⁶Hamaar dost log, isman kaa achchha hei ki ham aay ke anjaan bhaasha meñ tum se baat kari, aur samjhaai bhi nai ki uske matlab kaa hei? I keise tumme madat kari, jab tak ham i nai bataai ki Parmeshwar hamme kaa dekhaais hei ya tumhaar waaste kuchh gyaan ke baat hamme dees hei?

⁷Agar sab miuzik instramenṭ ek hee awaaj nikaari, tab tum keise bataayga ki kon baañsuri hei aur kon harp (beena) hei?

⁸Agar bigul ke awaaj safa se nai sunaay hei, tab keise tum laṛaai ke waaste taiyaar hoyga?

⁹Yahi rakam tum bhi, jab anjaan bhaasha bolta hei, aur tumme koi samjhe nai sake to tum hawa se baat karta hei.

¹⁰Dunia meñ bahut rakam ke bhaasha hei, aur sab ke matlab rahe hei.

¹¹Lekin agar ham u bhaasha nai samajhta hei, jon dusra koi bole hei, tab ham ek dusra ke waaste anjaan ke rakam hei.

¹²Agar tum sachche ke aatmik bardaan mañgta hei, to ek bhaasha ke chuno jon chech ke waaste achchha hei.

¹³Jab ham u bhaasha meñ baat karta hei jon dusra nai samjhe hei, tab hamme preya kare ke chaahi ki hamme sakti mile ki ham samjhaay saki ki uske matlab kaa hei.

¹⁴Ek ekzaampal hei, agar ham anjaan bhaasha meñ preya karega, tab iske matlab hei ki hamaar Aatma preya kare hei aur hamaar dimaag bekaar rahe hei.

¹⁵Tab hamme kaa kare ke hei? Kuchh ṭaaim hamme aapan Aatma se preya kare ke chaahi, aur dusra ṭaaim aapan dimaag se. Kabhi kabhi hamme Aatma ke sañghe gaay ke paṛi aur kabhi kabhi dimaag se.

¹⁶Maan leo ki tumhaar chech meñ kuchh anjaan log hei, jab tum Aatma se Parmeshwar ke baṛaai karta hei, aur ulog tumme samjhe nai sake hei, to keise jaani ki kab “Aameen” bole ke hei?

¹⁷Tum saait Parmeshwar ke baṛaai, bahut sundar se karta hei, lekin usse koi ke faayda nai hoi.

¹⁸Ham Parmeshwar ke dhanbaad deta hei ki ham tum sab se jaada anjaan bhaasha meñ bolta hei.

¹⁹Lekin jon bhaasha ke matlab nikre hei, wahi chech ke madat kare sake hei. Wahi kaaran chech meñ ham khali paañch bol (shabd) bolta hei jon samajh meñ aay sake hei, i nai ki ham das hajaar bol meñ boli jon ke koi samjhe nai sake.

²⁰Dosto, bachcha log ke rakam soche ke chhoṛo. Baṛa log ke rakam socho, aur chhoṭa bachcha ke rakam seedha bana raho.

²¹Baaibal meñ Prabhu bole hei, “Ham anjaan log ke iyuz karega jon anjaan bhaasha bole hei ulog hamaar log se baat kari. Ulog usse anjaan bhaasha meñ baat kari, lekin fir bhi hamaar log hamaar baat nai suni.”

²²Bhaasha jon dusra log nai jaane hei, u abiswaasi log ke dusra matlab rakkhi, lekin biswaasi log ke nai. Dusra bagal, bhawishvaani, biswaasi log ke khaatir hei, abiswaasi log ke waaste nai.

²³Maan leo ki jetna log chech meñ weship kare hei, anjaan bhaasha meñ baat kare ke suru kar de, aur wahi ṭaaim koi baahar ke admi ya abiswaasi aay jaay. Kaa ulog i nai sochi ki huañ ke sab log pagla hei?

²⁴Lekin maan leo ki sab log bhawishvaani kare hei, jab abiswaasi aur baahar ke log aay hei. Ulog samajh jaai ki ulog paapi hei, aur ulog maañgi ki apne aap ke badal le kaahe ke ulog sun leen ki tum kaa bolta hei.

²⁵Ulog bataai ki ulog ke dil meñ kaa chhupaan hei. Tab ulog ghuṭna ṭek ke Parmeshwar se boli, “Ham janta hei ki tum ilog ke sañghe hei.”

²⁶Dosto, jab tum weship ke waaste milo, tab tum sab kuchh karo jon huañ ke log ke waaste ṭheek hei. Yahi rakam hoy ke chaahi jab koi gaay hei ya sikhaay hei ya bataay hei ki Parmeshwar kaa bolis hei ya anjaan bhaasha bole hei ya uske matlab samjhaay hei.

²⁷Tum meñ se dui ya teen se jaada log sabha meñ anjaan bhaasha meñ nai bole ke chaahi. Tum bole ke paari lo, aur huañ koi ke rahe ke chaahi jon samjhaay sake ki tum kon cheej bolta hei.

²⁸Agar koi samjhaay nai saki, tab tum chech meñ chuppe raho aur khali Parmeshwar aur apne aap se baat karo.

²⁹Dui ya teen log bhawishvaani kare sake hei, aur baaki sab koi ke saaodhaani se sune ke hei.

³⁰Agar huañ jon beiṭha hei usman se koi Parmeshwar ke sandes paay le hei, tab bole waala ke chuppe hoy jaay ke hei aur koi dusra log ke bole ke mauka de.

³¹Khali ek jan ke ek ṭaaim bole ke mauka deo, tab tum sab kuchh seekhega aur tumme hausla mili.

³²Ek nabi jon Parmeshwar ke sandes sunaay hei, uske aapan bardaan kaabu meñ rakkhe ke hei.

³³Parmeshwar maañge hei ki sab kuchh saanti se aur oḍa se hoy. Jab Parmeshwar ke log chech meñ mile hei,

³⁴tab aurat log ke baat nai kare ke chaahi. Ulog ke chuppe rahe ke sune ke chaahi, jeise Maozas ke kaanuun sikhaay hei.

³⁵Agar kuchh hei jon ulog jaane maañge hei, tab ghar lauṭe pe ulog aapan admi se puuchhe sake hei. Aurat log ke chech meñ bole ke achchha baat nai hei.

³⁶Parmeshwar ke sandes tum log se nai suru bhais raha, aur khali tum log nai hei jahañ sandes pahuñchis hei.

³⁷Agar tum apne aap ke nabi ya Aatma se bhara manush samajhta hei, tab tum jaanega ki ham wahi likhta hei jon Prabhu hamme hukum karis hei.

³⁸Yahi khaatir agar koi hamaar likha nai sune hei, to tum uske parwaah nai karo.

³⁹Dosto, hausla se bhawishvaani karo aur koi ke anjaan bhaasha bole se roko nai.

⁴⁰Sab kuchh achchha se aur oḍa se karo.