Read Hindi, Fiji 1 Kurinth 16 Bible Online

1 Kurinth 16 - Hindi, Fiji bible

1 Kurinth 16

¹Jab tum Parmeshwar ke log ke waaste peisa baṭoro, ham mañgta hei ki tum wahi karo jon ham tumme Galeshia ke chech meñ bataay raha.

²U i raha ki, sab etwaar ke tum sab jon kamaaya hei, uske ek hissa alge rakh deo. Agar tum eise karega, to jab ham aayga tab tumme peisa baṭore ke nai paṛi.

³Kuchh chela ke chun leo jon peisa Yarushalam le jaai. Ham ulog ke, peisa ke sañghe ek chiṭṭhi de ke bhejega ki jisse i dekhaay sake ki tum kiske peisa dewe mañgta hei.

⁴Agar tum chaaho ki ham bhi ulog ke sañghe jaai, tab ulog hamaar sañghe jaay sake hei.

⁵Jab ham Mekaḍonia se jaayga, ham tumme dekhe ke aasha karega,

⁶aur tumhaar sañghe thoṛa din rahega. Saait ham puura winṭa rahi, ki jisse tum hamme jahañ ham jaay mañgta hei uske waaste madat karo.

⁷Agar Prabhu maañgi, to ham baad meñ lamba ṭaaim ke waaste aay sakta hei, aur i ṭaaim jaldi se lauṭ jaayga.

⁸Ham Penṭikosṭ tak Efisus meñ rahega,

⁹kaahe ke i achchha mauka hei ki huañ ham kuchh kaam kar lei. Lekin huañ pe kaafi log hei jon hamaar khilaaf hei.

¹⁰Jab Ṭimathi aai, tab uske achchha se welkam karna. U Prabhu ke kaam kare hei, jeise ham karta hei.

¹¹Dekhna, koi uske sañghe kharaab byohaar nai kare. Ham mañgta hei ki u hamaar lage aapan dusra saathi ke sañghe lauṭ aay. Yahi khaatir jab u jaay lage to uske aasheesh ke sañghe bida kar dena.

¹²Ham ketna kosis kara ki hamaar dost Apullos, aapan saathi log ke sañghe aay ke tum log ke viziṭ kare. U abhi nai aay maañge hei, lekin ṭaaim milte aay jaai.

¹³Dhyaan rakhna. Aapan biswaas meñ ṭika raho. Tagṛa aur bahaadur bana raho.

¹⁴Sab cheej meñ prem dekhaana.

¹⁵Tum to janta hei ki Stifnas ke palwaar, Akhaaya ke pahila log hei jon Prabhu meñ biswaas karin raha. Ulog sab kuchh karin jon ulog Parmeshwar ke log ke waaste kare sakin. Dosto, ham tum se bolta hei

¹⁶ki ulog ke rakam agua log ke baat maano aur weisaiyeñ u sab ke sañghe karo jon tumhaar khaatir kaṛa kaam kare hei.

¹⁷Stifnas aur Fotunaatus aur Akhaikus ke dekh ke hamme khusi bhais. Ulog ke hiañ rahe se hamme eise lage hei ki tum sab hamaar lage hei.

¹⁸Ulog hamme bahut sukh deen, ṭheek wahi rakam jeise ulog tumme sukh deen raha. Eisan log ke tum aadar karo.

¹⁹Eshia ke chech ke bagal se tum sab ke namaste. Aquila aur Priska, aur uske ghar meñ jon chech hei, uske bagal se tum log ke Prabhu ke namaste bheje hei.

²⁰Prabhu ke sab chaahe waala log tumme namaste bheje hei. Sab ke dil se aadar aur welkam karna.

²¹Ham i chiṭṭhi apne saain karta hei. POL.

²²Ham binti karta hei ki Parmeshwar ulog ke saraap dei, jon Prabhu se prem nai kare hei. Aur aasha karta hei ki Prabhu jaldi aai.

²³Ham binti karta hei ki Prabhu Yeeshu Maseeh tum pe daya kari.

²⁴Hamaar prem, Yeeshu Maseeh ke tum sab log ke sañghe rahe.