Read Hindi, Fiji 1 Kurinth 2 Bible Online

1 Kurinth 2 - Hindi, Fiji bible

1 Kurinth 2

¹Dosto, jab ham tumhaar lage u bhed jon Parmeshwar hamse baaṭe raha uske baare meñ bataay aaya, tab ham baṛa baṛa aur sune meñ akalmand baat leke nai aaya.

²Kaahe ke jab ham tumhaar sañghe raha, tab ham khali Yeeshu Maseeh, ke jon kros pe chaṛhaawa gais raha uske baare meñ baat kare ke socha.

³Pahile to ham kamjor raha aur ḍar se kaapta raha.

⁴Jab ham tum se baat kara aur parchaar kara, ham i buddhimaan ke rakam baat karke kuchh pruuv kare nai mañgta hei. Ham to khali Parmeshwar ke Aatma ke aapan shakti dekhaay dia.

⁵Wahi rakam tumme Parmeshwar ke sakti se biswaas hoi, naa ki insaan ke buddhi se.

⁶Jab ham samajhdaar log se baat karta hei to ham samajhdaari ke baat karta hei. Lekin i buddhi naa to i dunia ke hei aur naa to i dunia ke leeḍa log ke hei, jon jaldi hee nai rahi.

⁷Ham Parmeshwar ke u buddhi ke chhipaan raaz ke baat karta hei jon dunia ke bane se bahut pahile Parmeshwar sochis raha ki hamaar mahima ke khaatir iyuz kari.

⁸I dunia ke leeḍa log i buddhi ke baare meñ nai jaane hei. Agar ulog janta, to mahaan Prabhu ke kros pe nai chaṛhaay hota.

⁹Lekin, jeise Baaibal meñ likhaan hei, “Jon Parmeshwar aapan pyaara log ke khaatir plen karis u sab usse jaada hei jon aañkhi se dekhe sake aur kaan se sune sake. I sab hamaar dimaag meñ kabhi nai aais!”

¹⁰Parmeshwar ke Aatma tumme i sab dekhaais. Uske Aatma sab kuchh khoj le hei, u bhed bhi jon Parmeshwar ke dimaag ke gahraai meñ rahe hei.

¹¹Khali tum hei jon jaan sakta hei ki tumhaar man meñ kaa baat hei, aur Parmeshwar ke Aatma khali hei jon jaane sake hei ki Parmeshwar ke dilo dimaag meñ kaa hei.

¹²Lekin Parmeshwar hamme aapan Aatma dees hei. Wahi kaaran ham dunia ke log ke rakam bhi nai soche sakta. Wahi kaaran ham Parmeshwar ke aasheesh, jon u ham log ke dees hei, uske pahichaane bhi sakta hei.

¹³Sab baat jon ham bolta hei, u sab insaan ke buddhi nai, lekin Parmeshwar ke Aatma hamme sikhaais hei.

¹⁴Wahi khaatir jon ke lage Parmeshwar ke Aatma hei, khali wahi aatmik aasheesh ke samjhe sake hei. Jon koi ke lage Parmeshwar ke Aatma nai hei, u i samjhe hei ki i aasheesh bekaar hei.

¹⁵Jon log ke Aatma rasta dekhaay hei, wahi log sab rakam ke feisla banaay sake hei, lekin ulog koi aur se nai parkha jaay sake hei.

¹⁶Baaibal bole hei, “Kaa koi kabhi Prabhu ke bichaar jaane sakis hei ya uske sallaah dees hei?” Lekin ham log u rakam soche sakta hei, jon rakam Yeeshu soche hei.