Read Hindi, Fiji 1 Kurinth 4 Bible Online

1 Kurinth 4 - Hindi, Fiji bible

1 Kurinth 4

¹Ham log ke Krisṭ ke sewak samjho, jis ke Parmeshwar sab bhed dees hei ki sab ke samjhaay.

²Aur jab ki hamaar pahila kaam hei uspe bharosa rakkhe jon ke waaste ham kaam karta hei,

³hamme parwaah nai ki tum chaahe hamme ajmaao ya kaanuun ke. Sach to i hei ki ham apne aap ke bhi nai parakhta hei.

⁴Ham aapan khilaaf kuchh nai janta, iske matlab i to nai ki ham raaiṭ hei. Prabhu hamaar jaj hei.

⁵Yahi kaaran koi ke nai ajmaao, jab tak Prabhu lauṭ ke nai aay. Wahi dekhaai ki añdhiyaar meñ kaa chhipa hei aur sab ke dil meñ kaa hei. Tab Parmeshwar hee rahi jon ham sab ke baṛaai kari.

⁶Bhaai log, ham Apullos aur apne aap ke ekzaampal lia hei ki tum sab ke sikhaay saki ki iske matlab kaa hei, “Ruuls pe chalo.” Ham mañgta hei ki tum i bole ke bañd kar deo ki ham log meñ se koi dusra se achchha hei.

⁷Tum meñ kon cheej etna khaas hei? Tum meñ kon cheej hei jon tumme dewa nai gais raha? Aur agar tumme dewa gais raha, to kaahe ke ghamanḍ karta hei?

⁸Kaa tum pahile se khusi hei? Kaa tum pahile se dhani hoy gaya hei? Kaa tum ham log ke bina raaja ban gaya hei? Kaash tum raaja ban gay hota. Tab ham sab bhi tumhaar sañghe raaj karta.

⁹Hamme eise lage hei ki Parmeshwar ham prerit log ke sab se pichchhe rakkhis hei. Ham log to u jehli log ke rakam hei jon ke maut ke saja hoy jaay hei. Ainjals aur i dunia ke log khali hampe hase hei.

¹⁰Maseeh ke khaatir, ham log ke muurakh samjha jaay hei, lekin Krisṭ tumme majbuut banaais. Ham log kamjor hei aur sab koi ham se haiṭ kare hei, lekin tum taagatwaala hei aur sab tumme aadar kare hei.

¹¹Aaj bhi ham bhuuka pyaasa rahta hei aur pahine ke waaste kuchh nai hei siwaay regs ke. Hamaar sañghe kharaab saluuk kara jaay hei aur hamaar lage rahe ke jagha bhi nai hei.

¹²Ham aapan haath se kaṛa kaam karta hei, aur jab log hamaar ninda kare hei, tab ham ulog ke aasheesh deta hei. Jab hamme log sataay hei, tab ham sahta hei.

¹³Jab hamme badnaam kara jaay hei, tab ham naram baat se jawaab deta hei. Abhi tak hamme i dunia ke kuuṛa kachra se jaada kuchh nai samjha jaay hei.

¹⁴Ham tumme sarmaay ke khaatir nai likhta hei. Ham tumme madat kare mañgta hei, jeise maañ-baap aapan pyaara laṛkan ke kare hei.

¹⁵Das hajaar log tumme Krisṭ ke baare meñ sikhaai, lekin khali ham tumhaar Pita hei. Tum hamaar laṛkan tab bana, jab ham tumme Krisṭ ke baare meñ bataaya

¹⁶aur ham mañgta hei ki tum hamaar rakam raho.

¹⁷Wahi kaaran ham Ṭimathi ke tumhaar lage bheja. Ham uske aapan laṛka ke rakam pyaar karta hei, aur Prabhu ke sachcha sewak hei. Ṭimathi tumme bataai ki Krisṭ ke pichchhe chale ke waaste ham kon cheej karta hei, aur keise wahi sab sikhaata hei jon u maañge hei.

¹⁸Tum meñ se kuchh log samajhta hei ki ham tum log ke lage nai aayga, aur tum ghamanḍ se baat karta hei.

¹⁹Lekin, agar Prabhu hamme aay ke waaste maañgi to ham jaldi hee huañ aayga. Tab ham dekhega ki jon log ghamanḍ se baat kare hei kaa ulog ke lage sakti hei?

²⁰Parmeshwar ke raaj khali baat nai hei. U sakti hei.

²¹Tum kon cheej mañgta ki ham kari, jab ham huañ pahuñchega? Kaa tum mañgta ki ham kaṛa se pesh aai ki prem aur naram se?