Read Hindi, Fiji 1 Kurinth 5 Bible Online

1 Kurinth 5 - Hindi, Fiji bible

1 Kurinth 5

¹Ham to sunte aaya hei ki tumhaar beech meñ kuchh neech log hei, ki saait geir Yahuudi bhi u rakam kaam nai karat hoi. Ek admi aapan sauteli maañ ke sañghe suute hei!

²Tum ghamanḍ karta hei, jabki tumme saram hoy ke chaahi ki eise bhi koi kaam kare sake hei aur uske khed de ke chaahi.

³Ham tumhaar sañghe khali aapan khayaal meñ hei. Lekin Prabhu Yeeshu ke naam se ham i admi ke parakh lia hei, weisaiyeñ jeise agar ham tumhaar sañghe rahta, to parakhta. Yahi kaaran jab tum ek sañghe milo, aur Prabhu Yeeshu ke sakti tumhaar sañghe rahi, tab ham bhi tumhaar sañghe rahega.

⁵Tab tum u admi ke saitaan ke haath meñ de dena. Uske deñhi naas kara jaai, lekin uske aatma bachaay lia jaai, jab Prabhu Yeeshu lauṭ ke aai.

⁶Ghamanḍ nai karo! Kaa tum nai janta ki thoṛa se yeesṭ puura aaṭa ke fulaay de hei?

⁷Puraana yeesṭ ke nikaar ke feñk deo! Tab tum taaja roṭi ke rakam hoyga jon bina yeesṭ ke bana rahe hei, aur wahi rakam tum hei. Hamaar fasah ke memna Krisṭ hei, jon ke bali chaṛhaawa gais hei.

⁸Yahi khaatir fasah ke teohaar aapan paap aur dushṭta se nai manaao, i wahi rakam hei jeise yeesṭ se bana roṭi ke baaṭa jaay hei. Sudh aur sachcha raho aur teohaar manaao u roṭi se jon bina yeesṭ se bana rahe hei.

⁹Hamaar dusra chiṭṭhi meñ, ham likha hei ki, tum neech log ke sañghat nai karo.

¹⁰Lekin ham i dunia ke log ke baare meñ baat nai karta raha. Tumme i dunia chhoṛe ke paṛi aur u sab log se duur jaay ke paṛi jon laalchi hei ya neech hei, ya luṭera hei ya muurti ke puujan kare hei.

¹¹Ham ulog ke baare meñ baat karta hei, jon apne aap ke biswaasi bole hei lekin u neech hei ya laalchi hei, ya muurti ke puujan kare hei ya dusra ke saraap de hei, ya nasa kar le hei ya koi ke luuṭ le hei. Uske sañghe to khaana bhi nai khaana!

¹²Ham kaahe ke geir Maseehi log ke nyaay kari? Kaa hamme khali aapan log ke nyaay nai kare ke hei.

¹³Parmeshwar, aur sab ke nyaay kare hei. Baaibal bole hei, “Tum aapan beech meñ se eisan neech log ke baahar nikaar deo.”