Read Hindi, Fiji 1 Kurinth 6 Bible Online

1 Kurinth 6 - Hindi, Fiji bible

1 Kurinth 6

¹Agar tumme koi se jhagṛa hei, to kaa tum aapan jhagṛa paapi log ke koṭ meñ le jaata hei? Ya tum uske Parmeshwar ke log ke lage le jaata hei?

²Kaa tum nai janta ki Parmeshwar ke log dunia ke nyaay kari? Aur agar tum dunia ke nyaay karega, to kaa tum chhoṭa chhoṭa jhagṛa ke nyaay nai kare sakta?

³Kaa tum nai janta ki ham ainjals ke nyaay karega? Aur agar eise hoi, to ham sab roj ke sab baat ke parkhe sakta hei.

⁴Tum kaahe ke sab ke jhagṛa, jaj ke lage le jaata hei, jon ke chech meñ koi maan jaan nai hei?

⁵Tumme saram hoy ke chaahi! Kaa tum meñ se koi ke lage etna buddhi nai hei ki aapas ke maamla suljhaay sake?

⁶Kaahe tum meñ se ek, koi dusra ek ke abiswaasi ke lage mukadma ke khaatir le jaata hei?

⁷Jab tum meñ se koi dusra ke koṭ le jaata hei, tab tum sab haar jaata hei. I achchha hoi ki tum aapan uppar anyaay howan deo aur apne aap ke luṭaay deo.

⁸Lekin tum, dusra ke luuṭta hei aur uske sañghe anyaay karta hei.

⁹Kaa tum nai janta ki dushṭ log Parmeshwar ke raaj meñ aasheesh ke hissedaar nai hoi? Apne aap ke dhoka nai deo! Koi bhi neech ya jon muurti ke puuja kare hei, ya jon aapan saadi meñ faitful nai hei, ya bhrashṭ hei, ya homosekshual hei,

¹⁰u Parmeshwar ke raaj meñ hissedaar nai rahi. Aur naa to ek chor, ya laalchi jan, ya naseṛi, ya jon dusra ke saraape hei ya luuṭe hei, hissedaar hoy sake hei.

¹¹Tum meñ se kuchh log wahi rakam raha. Lekin ab Prabhu Yeeshu Maseeh ke naam aur Parmeshwar ke Aatma ke sakti tumme dhoy dees hei, aur tumme pawitr banaay dees hei, ki jisse Parmeshwar tumme apnaay lei.

¹²Tum meñ se kuchh log bole hei, “Ham log jon cheej mañgta hei u kare sakta hei.” Lekin ham tumme bataata hei ki sab kuchh hamaar waaste ṭheek nai hei. Yahi kaaran ham koi cheej ke nichche dab ke nai rahega.

¹³Tum i bhi bolta hei, “Khaana hamaar deñhi ke waaste hei, aur hamaar deñhi khaana ke waaste bana hei.” Lekin ham tumme bataata hei ki Parmeshwar duuno ke naas kar dei. Ham log ke aapan deñhi ke sañghe neech kaam nai kare ke hei. Hamme uske Parmeshwar, jon hamaar deñhi ke dekh bhaal kare hei, uske kaam ke khaatir iyuz kare ke hei.

¹⁴Parmeshwar hamme mara se jinda kari, ṭheek wahi sakti se jon se u Prabhu ke mara meñ se jinda karis raha.

¹⁵Kaa tum sab nai janta ki tum log ke deñhi Krisṭ ke deñhi hei? Kaa i raaiṭ hei ki Krisṭ ke deñhi ke ek hissa ek veshya se joṛa jaay? Nai, i raaiṭ nai hei!

¹⁶Kaa tum nai janta ki ek admi jon eise kare hei, uske deñhi ke hissa ban jaay hei? Baaibal bole hei, “U duuno ek hoy jahiyeñ.”

¹⁷Lekin jon koi bhi Prabhu se juṛa hei, uske sañghe ek aatma meñ hei.

¹⁸Neech kaam se duur raho. Aur sab paap to deñhi se baahar rahe hei lekin deñhi ke waaste paap bahut kharaab hei.

¹⁹Tum to saait janta hei ki tumhaar deñhi Mandir hei jahañ Pawitr Aatma rahe hei. Jon Aatma tum meñ hei, u Parmeshwar ke gifṭ hei. Tum aapan nai hei lekin Parmeshwar ke hei.

²⁰Parmeshwar tumhaar waaste bahut baṛa daam bharis hei. Yahi khaatir aapan deñhi se Parmeshwar ke aadar karo.