Read Hindi, Fiji 1 Kurinth 7 Bible Online

1 Kurinth 7 - Hindi, Fiji bible

1 Kurinth 7

¹Ab ham u sawaal ke jawaab dega, jon tum aapan chiṭṭhi meñ likha raha. Tum puuchha raha, “Kaa i achchha hei ki log saadi nai kare?”

²Byabhichaar se bache ke waaste aurat, aapan pati aur admi aapan patni ke hoy ke chaahi.

³Pati aur patni ke ek dusra se aapan rishta nibhaay ke chaahi.

⁴Ek patni aapan deñhi ke maalik nai hei, lekin uske pati hei, aur ek pati aapan patni ke hei, apne aap ke nai.

⁵Yahi kaaran ek dusra se deñhi se rishta ke ‘naa’ nai karo, lekin agar tum ek dusra se samjhaota kara hei ki thoṛa din alag rahega, to ṭheek hei ki jisse tum preya meñ ṭaaim bitaay sakta hei. Tab saitaan tumhaar aapan konṭrol ke kami ke kaaran ṭesṭ nai lewe saki.

⁶Hamaar bichaar meñ weisaiyeñ kare ke chaahi, lekin ham nai janta ki Prabhu iske baare meñ kaa bolis raha.

⁷Ham wish karta hei ki tum sab hamaar rakam raho, lekin Parmeshwar ham sab ke dusra dusra gifṭ dees hei.

⁸I hamaar sallaah, ulog jon abhi tak saadi nai karis, aur bidhwa log ke khaatir hei. Tum sab akelle raho, jeise ham hei.

⁹Lekin agar tum apne ke konṭrol nai kare paata hei, tab ṭheek hei jaao aur saadi karo. Kaahe ke i achchha hei ki tum saadi kar leo, aur aapan chaahat meñ nai jarte raho.

¹⁰Ham nai lekin Prabhu bataay hei ki jon saadi kar lees hei, ulog ke sañghe rahe ke chaahi. Ek aurat jon aapan admi ke chhoṛ de hei,

¹¹uske chaahi ki u akelle rahe ya to fir aapan admi ke lage lauṭ jaay. Aur ek admi ke aapan aurat ke nai chhoṛe ke chaahi.

¹²Saadi ke baare meñ Prabhu aur kon kon cheej bolis hei, ham nai janta. Ham to yahi kare sakta hei ki tumme aapan sallaah dei. Agar tumhaar aurat Prabhu ke biswaasi nai hei, lekin tumhaar sañghe rahe meñ khusi hei, to uske ḍivos nai dena.

¹³Agar tumhaar admi Prabhu ke biswaasi nai hei, aur tumhaar sañghe rahe meñ khusi hei, to uske ḍivos nai dena.

¹⁴Ek admi aur aurat, jon Prabhu ke abiswaasi hei, u pawitr banaawa jaay hei kaahe ke u tumhaar paaṭna hei. Eisehiyeñ tumhaar laṛkan bhi pawitr bane hei, aur Parmeshwar ke aañkhi meñ ashudh (ancleen) nai rahe hei.

¹⁵Agar ek admi ya aurat abiswaasi hei, aur ḍivos maañge hei, tab tum maan leo. Ab tum usse bañdha nai hei. Kaahe ke Parmeshwar tumme chunis hei aur maañge hei ki saanti se raho.

¹⁶Iske alaawa, tum keise jaane sakta hei ki tum aapan aurat ya admi jon abiswaasi hei, uske bachaay sakta hei?

¹⁷Sab chech meñ yahi bataata hei ki sab wahi rakam raho jeise ulog rahin jab Prabhu Yeeshu ulog ke chunis raha aur Parmeshwar ulog ke aapan kahis raha. Ab ham wahi baat tum log se bolta hei.

¹⁸Agar tumhaar khatna hoy gay hei, to uske nai badlo. Agar nai bhais hei, tab khatna nai karaao.

¹⁹Khatna bhais ya nai bhais hei, kuchh maane nai rakkhe hei. Khaas baat to i hei ki Parmeshwar ke baat maano.

²⁰Yahi kaaran, badle ke kosis nai karo ki Parmeshwar ke chune se pahile tum kaa raha.

²¹Kaa tum ek gulaam hei? Iske chinta nai karo. Lekin agar tum aapan ajaadi mañgta hei to jaruur ajaad hoy jaao.

²²Jab Prabhu gulaam chune hei, tab ulog ajaad hoy jaay hei. Aur jab u ajaad log ke chune hei, tab ulog Krisṭ ke gulaam hoy jaay hei.

²³Parmeshwar tum log ke khaatir bahut daam chukaais. To koi ke khaatir gulaam nai banna.

²⁴Wahi rakam raho jeise tum raha jab Parmeshwar tumme chunis raha.

²⁵Ham i nai janta ki Prabhu ulog ke waaste kaa bolis raha, jon ke saadi nai bhais hei. Lekin ham tumme bataayga ki ham kon cheej sochta hei. Aur tum hamme biswaas kare sakta hei, kaahe ke Prabhu ham pe daya karis hei.

²⁶Abhi ham sab kharaab ṭaaim se jaata hei, aur ham sochta hei ki tum sab ke wahi rakam rahe ke chaahi, jon rakam tum hei.

²⁷Agar tumhaar saadi hoy gais hei, to ṭheek hei, weisaiyeñ raho. Lekin agar tumhaar saadi nai bhais hei, to saadi kare ke kosis nai karo.

²⁸Saadi, roñg nai hei, chaahe tumhaar saadi kabhi nai bhais hei. Lekin jon ke saadi bhais hei, ulog ke bahut museebat ke saamna kare ke paṛi, aur ham tum sab ke usse bachaay mañgta hei.

²⁹Lekin, hamaar dost log, hamaar matlab hei ki Prabhu jaldi aai, aur i maane nai rakkhi ki tumhaar saadi bhay hei ki nai.

³⁰U ekke rakam rahi chaahe tum rota hei ya hasta hei, ya tum khareedta hei, ya puura kañgaal hoy gaya hei.

³¹Isman koi farak nai rahi ki tum i dunia se ketna cheej leta hei, aur usman se ketna ke laaik karta hei. I dunia jeise ham janta hei, ab bahut roj nai rahi.

³²Ham to yahi mañgta hei ki tum sab chinta se ajaad hoy jaao. Ek admi jiske saadi nai bhais hei, u soch kare hei ki keise Prabhu ke khusi rakkho.

³³Lekin ek saadi suda admi ke aur jaada chinta rahe hei. Uske i dunia ke cheej ke chinta rahe hei, kaahe ke u maañge hei ki uske aurat khusi rahe.

³⁴Yahi khaatir u dui bagal khichaawe hei. Kuaari aurat aur u aurat log jon ke saadi nai bhais hei, Prabhu ke khusi kare ke waaste chinta kare hei, aur u log aapan deñhi aur dimaag sudh rakkhe hei. Lekin ek saadi suda aurat i dunia ke cheej ke waaste chinta kare hei, kaahe ke u aapan admi ke khusi kare maañge hei.

³⁵Jon kuchh bhi ham bolta hei, u tumhaar achchha ke waaste hei — i nai ki tumhaar ajaadi ke roka jaay. Ham tumme madat kare mañgta hei ki tum raaiṭ rakam se jio aur Prabhu ke sab se jaada prem karo.

³⁶Lekin agar tumhaar mañgni koi saadi ke umar waala se bhais hei, aur tum uske etna jaada chaahe laga hei ki saadi ke chhoṛ ke tum kuchh aur soche nai sakta hei. Tab jaao aur saadi kar leo. Isman kuchh paap nai hei.

³⁷Lekin i aur achchha hei ki aapan man ke kaabu meñ rakkho, aur yahi bichaar karo ki saadi nai karega.

³⁸Saadi kare ke achchha hei, lekin i aur achchha hei ki kabhi saadi nai karo.

³⁹Ek aurat, jon ke saathe saadi karis hei, wahi ke sañghe jindagi bitaay ke chaahi, jab tak u mar nai jaay. Tab u dusra saadi kare ke ajaad hei, lekin khali u admi se jon Prabhu Yeeshu ke biswaasi hei.

⁴⁰Fir bhi, ham sochta hei ki ham Parmeshwar ke Aatma ke baat maanta hei, jab ham bolta hei ki u agar saadi nai kari to aur sukhi rahi.