Read Hindi, Fiji 1 Kurinth 9 Bible Online

1 Kurinth 9 - Hindi, Fiji bible

1 Kurinth 9

¹Ham ajaad hei. Ham ek prerit hei. Ham Prabhu ke dekha raha aur ham tumme usman biswaas kare ke laaya.

²Dusra log sochi ki ham ek prerit nai hei, lekin tum pruf hei ki ham tumhaar waaste ek prerit hei.

³Jab log ham se puuchhe hei, tab ham bataay deta hei,

⁴ki Baranbaas aur hamme khaay piye ke hak hei.

⁵Ham log ke i hak hei ki ham jiske chaahi, Prabhu ke log meñ se usse saadi kari aur uske apne sañghe le jaai, ṭheek wahi rakam jeise Prabhu ke bhaai log aur Peeṭa karat rahin.

⁶Kaa hamahi log hei jon ke dusra kaam kar ke aapan roji roṭi chalaay ke hei?

⁷Kaa saulja log aapan talab apne de hei? Kaa ulog jon añguur ke khet bowe hei, usman se añguur nai khaay hei? Kaa bheṛa charaay waala aapan bheṛa se duudh nikaar ke nai piye hei?

⁸Ham i baat aapan bagal se nai bolta hei. Maozas ke kaanuun hamme bataay hei ki jon beil dhaan daawe (kachar ke dhaan alag kare hei) hei uske muh nai baañdho. Lekin kaa Parmeshwar khali beil ke baare meñ sochat raha?

¹⁰Nai! U to hamaar baare meñ baat karat raha. I sab Baaibal meñ likhaan raha ki jisse jon koi bhi jote hei aur dhaan daawe hei, ulog aasra lagaay hei ki fasal ulog meñ baaṭa jaai.

¹¹Jab ham tumme i khabar dia, tab u aatmik bia bowe ke rakam raha. To hamaar hak hei ki ham dunia ke cheej lei jeise ki tum se fasal lewa jaay hei.

¹²Agar dusra log ke i kare ke hak hei, to ham log ke aur jaada hak hei. Lekin hamlog aapan i hak iyuz nai kara. Ham to uske khaatir bhi taiyaar hei ki ham u sab kari ki jisse Maseeh ke sandes dusra log tak pahuñchaay meñ baadha nai hoy.

¹³Kaa tum nai janta ki jon log Mandir meñ kaam kare hei, ulog wahi se gujaara kare hei jon Mandir meñ laawa jaay hei? Kaa tum nai janta ki jon kuchh bedi pe chaṛhaawa jaay hei wahi log meñ baaṭ dewa jaay hei?

¹⁴Yahi rakam, Prabhu bhi maañge hei ki jon koi susamaachaar ke parchaar kare hei, u aapan gujaara parchaar se hee kare.

¹⁵Lekin aapan i sab privilej ham kabhi kaam meñ nai laaya, aur ham i kaaran nai likhta hei ki ham abhi suru kare mañgta hei. Koi hamaar hak chheen ke ghamanḍ kare, usse achchha hei ki ham mar jaai.

¹⁶I hamaar waaste ghamanḍ kare ke baat nai hei ki ham susamaachaar parchaar karta hei. Parchaar to u cheej hei jon Parmeshwar hamme kare ke bolis raha, aur agar ham nai karega to ham naas hoy jaayga.

¹⁷Agar ham aapan dil se parchaar karta hei, tab hamme fal mili. Lekin agar ham nai mañgta hei, to bhi Parmeshwar hamme yahi kaam kare ke waaste bhejis hei.

¹⁸Hamme kaa mile hei? Yahi ki hamme mauka mile hei ki ham muft meñ susamaachaar ke parchaar karta hei, aur uske sañghe jon kuchh bhi mile ke hei, uske ham nai leta hei kaahe ki ham ek parchaarak hei.

¹⁹Ham koi ke gulaam nai hei. Lekin ham sab ke sewak ban gaya hei, ki jisse jetna hoy sake sab ke jeete saki.

²⁰Jab ham Yahuudi log ke sañghe rahta hei, ham wahi log ke rakam rahta hei, ki ulog ke jeet lei. Ulog Maozas ke kaanuun pe chale waala log hei, aur ham nai. Lekin ham kaanuun ke mutaabik rahta hei ki ham ulog ke jeete saki.

²¹Aur jab ham ulog ke sañghe rahta hei jon kaanuun pe nai chale hei, to ham kaanuun ke bhuul ke ulog ke jeetta hei. Aur haañ, ham kabhi bhi Parmeshwar ke kaanuun ke nai bhuulta hei. Hiañ tak ki ham Krisṭ ke kaanuun pe chalta hei.

²²Jab ham ulog ke sañghe rahta hei jon ke biswaas kamti hei, tab ulog ke jeete ke waaste ham wahi log ke rakam rahta hei. Ham jetna kare sakta hei otna karta hei ki ham jaada se jaada log ke jeete saki.

²³Ham i sab susamaachaar ke waaste karta hei, kaahe ke ham uske aasheesh baaṭe mañgta hei.

²⁴Tum janta hei ki bahut se log dauṛ meñ bhaag le hei, lekin khali ekke ke inaam mile hei. Yahi khaatir jeete ke khaatir dauṛo!

²⁵Khilaaṛi kas ke kaam kare hei u taaj jon bahut din nai rahe sake hei, uske jeet le, lekin ham u taaj ke waaste kaam karta hei jon hardam rahe sake hei.

²⁶Ham gaul ke bina nai dauṛta. Aur ham hawa meñ ghuusa baaji nai karta hei.

²⁷Ham aapan deñhi ke konṭrol meñ rakhta hei aur aapan gulaam banaay leta hei, ki jisse ham dusra log ke susamaachaar bataay ke baad haar nai jaai.