Read Hindi, Fiji 2 Kurinth 11 Bible Online

2 Kurinth 11 - Hindi, Fiji bible

2 Kurinth 11

¹Ham mañgta hei ki hamaar thoṛa se muurakhta sah leo.

²Ham tumhaar waaste soch karta hei wahi rakam jeise Parmeshwar kare hei. Tum to ek kuaari dulhin ke rakam raha jon ke ham khali Krisṭ ke waaste chuna raha.

³Lekin ab hamme ḍar laga hei kaahe ke saait tumme koi bahkaay lei, wahi rakam jeise Eev (Hauwa) ke saañp bahkaay lees raha. Hame ḍar hei ki kahiñ tum Krisṭ ke sachchaai aur pawitrta se soche band nai kar deo.

⁴Ham log tumme Yeeshu ke baare meñ bataaya raha, aur tum Pawitr Aatma lia aur sandes bhi apnaaya. Lekin tum koi aur admi log se Yeeshu ke baare meñ suna. Ab tum koi aur Aatma lewe ke taiyaar hei aur duusar sandes apnaay mañgta hei.

⁵Ham sochta hei ki ham i aur mahaan prerit log se bhi achchha hei.

⁶Ham ulog ke rakam baat nai kare sakta hei, lekin ham ulog ke maafit janta hei. Aur i tumhaar waaste safa kar dewa gais hei.

⁷Kaa i hamaar waaste roñg raha jab ham apne aap ke chhoṭa banaaya aur aadar kara ki jisse ham Parmeshwar ke sandes muft meñ parchaar kare saki?

⁸Ham dusra chech se peisa luuṭa, ki jisse tumhaar sewa kare saki.

⁹Jab ki hamme jaruuri raha, fir bhi ham tumme tañg nai kara. Kaahe ke, Mesiḍonia ke kuchh Prabhu ke chela log, hamaar waaste u sab laain jon ke hame jaruuri raha. U ṭaaim se leke abhi tak ham tum pe bojha nai raha, aur aage chal ke bhi nai rahega.

¹⁰Jeise ki ham Yeeshu ke baare meñ sachche bolta hei, Akhaaya meñ koi hamme iske baṛaai kare ke roke nai sake hei.

¹¹I nai ki ham tumme pyaar nai karta hei. Parmeshwar khud hee jaane hei ki ham tumme ketna pyaar karta hei.

¹²Lekin jon ham hardam karta raha wahi karte rahega. Tab ulog u cheej pe ghamanḍ nai kare paai jon cheej ham log karta hei.

¹³Fir bhi, ulog jhuuṭa prerit aur beimaan kaam kare waala log hei. Ulog khali dekhaawe hei ki ulog Krisṭ ke prerit hei.

¹⁴Isman kuchh sandeh nai hei. Saitaan bhi apne aap ke roshni ke ainjal ke rakam dekhaay ke kosis kare hei.

¹⁵Tab kaahe ke Saitaan ke naukar jab raaiṭ kaam kare ke dekhaawe hei to koi baṛa baat nai hei? Ek roj ulog ke wahi mili jon ulog ke chaahi

¹⁶Ham nai mañgta ki tum meñ se koi hamme beokuuf samjhe. Lekin agar tum samajhta hei, to hamme beokuuf bane deo aur thoṛa aur ghamanḍ kare deo.

¹⁷Jab ham etna sab ghamanḍ karta hei, to ham ek beokuuf ke rakam karta hei, aur Prabhu ke waaste nai.

¹⁸Aur haañ, agar aur dusra log jon cheej ulog karis hei, uske ghamanḍ kare maañge hei, to ham bhi kare sakta hei.

¹⁹Aur jab ki tum etna akalmand hei, tab tum khusi se ek beokuuf ke sahe sakta hei.

²⁰Kaahe ke, tumme log gulaam banaay lewe hei aur dhoka de hei aur tumhaar lage se chori kar le hei. Aur tumme ulog neecha dekhaay hei aur tumhaar muh pe thappaṛ maare hei.

²¹Hamme to bole ke bhi saram lage hei ki ham log ketna kamjor hei, ki i rakam rahta hei. Jab ulog ghamanḍ kare sake hei, to ham bhi kare sakta hei, lekin i beokuufi hei.

²²Kaa ulog Heebruus hei? To ham bhi hei. Kaa ulog Israayeli hei? To ham bhi hei. Kaa ulog Abraham ke palwaar ke hei? Haañ, to ham bhi hei.

²³Kaa ulog Krisṭ ke sewak hei? Ham beokuuf hei ki i rakam ke baat karta hei, lekin ham to ulog se achchha se uske sewa karta hei. Ham jaada mehnat kara aur jel meñ bhi bahut dafe rakkha gaya. Hamme chaabuk bhi bahut laga, aur maut ke muh meñ bhi bahut dafe gaya.

²⁴Paañch dafe, Yahuudi log hamme chaabuk se 39 dafe maaris.

²⁵Teen dafe Romi log hamme ek baṛa ḍañḍa se maarin, aur ek dafe hamaar dusman hamme patthar se maaris. Teen dafe ham jahaaj meñ ḍuube se bacha, aur ek din aur ek raat samundar meñ bitaay ke paṛa.

²⁶Ham bahut dafe yaatra meñ, nadi se, chor se, Yahuudi log se, aur pardesi log ke khatra se bacha. Hamaar jeewan meñ khatra, ḍezaṭ meñ, siṭi meñ, samundar meñ aur ulog jon Prabhu ke pichchhe chale ke dekhaawa kare hei, yahi se hei.

²⁷Ham kaam kara aur dukh uṭhaaya aur bahut raat jag ke bitaaya. Ham bhuuka pyaasa raha aur ketna dafe kuchh khaay ke bhi nai raha. Ham ṭhanḍa meñ raha kaahe ke hamaar lage otna kapṛa nai raha ki hamme garam rakkhe.

²⁸I sab ke alaawa, har roj ham sab chech ke chinta ke bojha se daba raha.

²⁹Jab aur sab kamjor hei, tab ham bhi kamjor hei. Jab baaki log paap meñ fañs jaay hei, to hamme gussa lage hei.

³⁰Agar hamme ghamanḍ kare ke hei, to ham aapan kamjori pe ghamanḍ karega.

³¹Hamaar Prabhu Yeeshu ke Pita, Parmeshwar jaane hei ki ham jhuuṭ nai bolta. Aur Parmeshwar ke hardam baṛaai kare ke hei!

³²Damaskas ke gavna, Raaja Aritaas ke ṭaaim, siṭi gaiṭ pe pahra rakkhis raha, ki jisse u hamme pakaṛ le saki.

³³Lekin ek baaskeṭ meñ beiṭh ke siṭi ke diwaar ke ek khiṛki se hamme nichche utaara gay aur ham bach ke nikar gaya.