Read Hindi, Fiji 2 Kurinth 13 Bible Online

2 Kurinth 13 - Hindi, Fiji bible

2 Kurinth 13

¹Ab tisra dafe ham tumhaar lage aata hei. Aur jeise Baaibal bole hei, “Koi bhi kasuur ke sachcha saabit kare ke dui ya teen gawaahi ke hoy ke jaruuri hei.”

²Jab ham dusra dafe tumhaar lage aay raha, tab ham tum se bola raha ki jon koi paap kare nai chhoṛi uske ham saja dega. Abhi ham tum se bahut duur hei, lekin fir bhi ham wahi chetaaoni deta hei.

³Isse tumme pata chali ki ham Krisṭ ke bagal se baat karta hei. Jab u tumme sudhaari, u kamjor nai rahi. U taagatwar rahi!

⁴Kaahe ke jab uske kros pe chaṛhaawa gay raha, tab u kamjor raha, ab u Parmeshwar ke sakti se rahe hei. Ham sab kamjor hei, jeise Krisṭ raha. Lekin tum dekhega ki ham sab Parmeshwar ke sakti se rahega, jeise Krisṭ rahe hei.

⁵Apne aap ke parkho, aur dekho ki kaa sachmuch meñ hei ya nai. Agar tum paas hoy gaya, tab tum dekhega ki Krisṭ tum meñ rahe hei. Lekin agar Krisṭ tum meñ nai rahe hei, tab tum haar gaya hei.

⁶Hamaar biswaas hei ki tum paayga ki ham nai haara hei.

⁷Ham sab preya karta hei ki tum log galti nai karo. Ham log preya i khaatir nai karta ki apne aap ke achchha banaai, lekin i kaaran ki tum wahi karo jon ṭheek hei, bhale hee ham haar jaai.

⁸Ham sab sachchaai pe chale sakta hei, uske agaiñsṭ nai.

⁹Jabki ham kamjor hei, hamme khusi hei ki tum majbuut hei, aur ham preya karta hei ki tum aur achchha kaam karega.

¹⁰Aay se pahile ham i sab tum log ke lage likhta hei. I rakam se hamme tum log pe kaṛaai nai kare ke paṛi, jab ham u hak iyuz karega jon Prabhu hamme dees hei. Hamme i hak mila, ki jisse ham tumme madat kare saki, naas nai.

¹¹Namaste, dosto. Aur achchha kaam karo aur dhyaan dena ham kon cheej bola raha. Kosis karna ki sab ke sañghe saanti se rahna. Ab ham preya karta hei ki Parmeshwar, jon tumme prem aur saanti dewe hei, tumhaar sañghe rahi.

¹²Ek dusra ke welkam karna. Parmeshwar ke sab log aapan namaste bheje hei.

¹³Ham binti karta hei ki Prabhu Yeeshu Maseeh tumme aasheesh dei aur tum pe daya kari! Parmeshwar tumme aapan prem se aasheesh dei, aur Pawitr Aatma tum sab ke ek sañghe joṛ de.