Read Hindi, Fiji 2 Kurinth 3 Bible Online

2 Kurinth 3 - Hindi, Fiji bible

2 Kurinth 3

¹Kaa ham fir se aapan baṛaai kare laga hei? Kaa ham log ke tumhaar lage se chiṭṭhi chaahi ya hamme tumhaar lage chiṭṭhi likhe ke hei ki ham aur sab ke aapan baare meñ bataai? Koi koi ke chiṭṭhi ke jaruurat rahe hei ki ulog ke baare meñ bataawa jaay.

²Lekin tum hee hamaar chiṭṭhi hei, ham log ke dil pe likhaan hei ki sab log paṛhe aur samjhe saki.

³Tumahi u chiṭṭhi ke rakam hei jon Krisṭ likhis hei aur ham log se bhejwaais hei. Lekin tum log pen aur iñk se nai likha hei aur patthar ke paṭṭi (tablet) pe bhi nai likha gaya hei. Tum log hamaar dil pe jinda Parmeshwar ke Aatma se likha gaya hei.

⁴Ham log ke ispe puura biswaas hei. Krisṭ, Parmeshwar ke saamne ham log pe puura bharosa karis hei.

⁵Eise nai ki ham log bole sakta hei ki ham koi bhi cheej aapan bharosa pe kara hei. Parmeshwar hee hamme u sab de hei ki ham kuchh kare saki.

⁶U ham log ke i laayk banaais ki jon nawa agrimenṭ Aatma se aais hei, likhaan kaanuun ke bagal se nai, ham uske sewak bane saki. Kaahe ke kaanuun maut laay hei, lekin Aatma jeewan laay hei.

⁷Maozas ke kaanuun khali maut ke waada laais raha, bhale hee u patthar meñ puura mahima se gaṛha (kaav kara) gais raha, fir bhi kaanuun Maozas ke chehra meñ etna jaada chamak kar dees raha ki Israayel ke log uske dekhe nai sakin, tab bhi jab ki u mahima maddhim hote jaat raha.

⁸To kaa u agrimenṭ jon Aatma ham log ke lage laai, usse bhi jaada sundar nai rahi?

⁹Jab jon cheej maut laay hei, etna sundar rahe hei, tab kaa jon cheej ham log ke Parmeshwar ke lage le jaay hei aur jaada sundar nai rahi?

¹⁰Asal meñ, nawa agrimenṭ etna sundar hei ki kaanuun uske aage maddhim paṛ gais hei.

¹¹Kaanuun u mahima se dewa gais raha jon maddhim paṛ gais. Lekin nawa agrimenṭ ke mahima bahut jaada hei, kaahe ke u kabhi nai miṭe paai.

¹²I sundar aasha hamme eise mahsuus karaay hei ki ham khula aam bole sakta hei.

¹³Ham log Maozas ke rakam nai hei. Uske chehra chamkat raha, lekin u aapan chehra ke lukaay ke rakkhis raha ki jisse Israayel ke log uske chehra ke chamak ke maddhim hote nai dekhi..

¹⁴Admi log jiddi raha, aur kuchh hei jon ki abhi bhi ulog ke roke hei ki ulog nai dekhe sake hei ki sach kon cheej hei, jab ulog kaanuun ke paṛhe hei. Khali Krisṭ u parda ke uṭhaay sake hei jon ke kaaran ulog dekhe nai sake hei.

¹⁵Jab Maozas ke kaanuun paṛha jaay hei, tab ulog ke dimaag pe kuchh oṛhaan rahe hei

¹⁶u parda ulog ke waaste haṭaawa jaay hei jon Prabhu ke bagal ghuum jaay hei.

¹⁷Prabhu aur Aatma ekke rakam hei aur ek hei, aur Prabhu ke Aatma hamme ajaad kar de hei.

¹⁸Yahi khaatir hamaar chehra lukaan nai hei. U Prabhu ke chamke waale mahima dekhaay hei, jeise ki Prabhu ke Aatma ham log ke jaada se jaada mahaan Prabhu ke rakam banaay de hei.