Read Hindi, Fiji 2 Kurinth 5 Bible Online

2 Kurinth 5 - Hindi, Fiji bible

2 Kurinth 5

¹Ham log ke deñhi tambu ke rakam hei jisman ham log i dharti pe rahta hei. Lekin jab tambu naas hoy jaay hei, tab ham log janta hei ki Parmeshwar ham log ke rahe ke jagha dei. I ghar u makaan nai rahi jon koi banaais hei, lekin u swarag meñ rahi jon sada din rahi.

²Jab tak ham i dharti pe hei, ham log lamba saas leta hei kaahe ke ham log u swarag waala ghar meñ rahe mañgta hei.

³Ham log uske kapṛa ke rakam pahine mañgta hei aur nañga nai rahe mañgta hei.

⁴I tambu jisman ham abhi rahta hei, ek gaṛhu bojha ke rakam hei, aur ham log kaharta hei. Lekin ham log khali iske i khaatir nai karta ki hamme i mare waala boḍi chhoṛe ke hei. I khaatir karta hei ki kaahe ke ham log i boḍi ke usse badle mañgta hei jon boḍi kabhi nai mari.

⁵Parmeshwar hei jon i sab kare sake hei. U hamme aapan Aatma dees hei ki hamme janaay sake ki u wahi kari.

⁶To hardam khush raho! Jab tak ham sab i boḍi meñ hei, ham log Prabhu se duur hei.

⁷Lekin ham log biswaas se rahta hei, usse nai jon ham dekhta hei.

⁸Hamme khusi rahe ke hei, kaahe ke ham mañgta hei ki ham i boḍi chhoṛ ke aur Prabhu ke sañghe rahi.

⁹Lekin chaahe ham Prabhu ke sañghe uske ghare rahi ya usse duur rahi, ham sab kosis karta hei ki uske khusi rakkhi.

¹⁰Kaahe ke, Krisṭ ham log ke ek ek kar ke jaj kari, ki ham log i boḍi meñ rahe ke kon kon achchha ya kharaab kaam kara hei.

¹¹Ham janta hei ki Prabhu ke aadar kare ke matlab kaa hei, aur ham sab log se bolega ki ulog uske bagal ghuum jaay. Parmeshwar apne jaane hei ki ham keisan hei, aur maañge hei ki tum bhi jaano ki ham log kon rakam hei.

¹²Ham log aapan baṛaai nai kare mañgta hei. Lekin ham mañgta hei ki tum ham pe ghamanḍ karo, jab tum ulog ke sañghe raho jon dil se nai lekin dekhaay ke waaste ghamanḍ kare hei.

¹³Agar hamaar dimaag kaam nai kare hei, to u hamaar aur Parmeshwar ke beech meñ hei. Lekin agar hamaar dimaag raaiṭ hei, to tumhaar waaste achchha hei.

¹⁴Ham sab Krisṭ ke prem meñ jeeta hei. Ham janta hei ki agar ek admi sab ke waaste mara, to ham sab mar gaya hei.

¹⁵Aur Krisṭ ham sab ke waaste maris raha. U mara ki jisse ham log khali aapan waaste nai jiyega, lekin uske khaatir jon ham log ke waaste mar gais aur fir jinda hoy gais.

¹⁶Ham saaodhaan rahta hei ki ham ulog ke eise jaj nai kari jeise ulog hei, bhale ham log ek dafe Krisṭ ke wahi rakam jaj kara raha.

¹⁷Jon koi Krisṭ ke hoy jaay hei, u nawa admi hoy jaay hei. Puraana baat bhulaay jaay hei, aur sab kuchh nawa hoy jaay hei.

¹⁸Parmeshwar i sab kar dees hei! U Krisṭ ke bhejis ki u aapan aur ham log ke beech meñ saanti banaay saki, aur u ham log ke kaam dees hei ki ham log bhi duusar log aur uske beech saanti banaay saki.

¹⁹Iske matlab i hoy hei ki Parmeshwar, Krisṭ meñ raha, aur i dunia ke log ke maafi aur saanti det raha, aur u ham log ke saanti ke sandes baaṭe ke kaam dees hei.

²⁰Ham log Krisṭ ke baat kare ke waaste bheja gaya raha, aur Parmeshwar binti kare hei ki tum uske sandes ke suno. Ham log Krisṭ ke waaste baat karta hei aur tum se binti karta hei ki Parmeshwar se saanti banaay leo.

²¹Krisṭ kabhi paap nai karis! Lekin Parmeshwar usse paapi ke rakam bartaao karis, ki jisse Krisṭ ham log ke Parmeshwar tak le jaay sake.