Read Hindi, Fiji 2 Kurinth 6 Bible Online

2 Kurinth 6 - Hindi, Fiji bible

2 Kurinth 6

¹Ham log Parmeshwar ke sañghe kaam karta hei, aur ham tum se binti karta hei ki Parmeshwar ke daya ke achchha se kaam meñ laao.

²Baaibal meñ Parmeshwar bole hei, “Jab ṭaaim aais, ham tumhaar suna, aur jab tum madat maañga, ham tumme bachaay aaya.” U ṭaaim aay gais hei. Aaj hee u din hei jab tumme bache ke hei.

³Ham nai mañgta ki koi ham log ke kaam se galti nikaare, aur tab ham kosis karta hei ki kuchh museebat nai aay.

⁴Lekin sab kuchh meñ aur sab rakam se ham i dekhaata hei ki ham sachmuch meñ Parmeshwar ke sewak hei. Ham hardam dheeraj rakkha, chaahe ham log pe museebat rahe ya dukh rahe ya achchha ṭaaim nai hei.

⁵Ham log maar khaaya, jel meñ rakkha gaya, dañga fasaad meñ choṭ khaaya. Ham log bahut mehnat kara aur bhuuka raha aur soya bhi nai.

⁶Lekin ham log apne aap ke safa rakkha aur dheeraj rakkha, daya kara aur samjha bhi. Pawitr Aatma ham log ke sañghe raha, aur ham log ke prem sachcha raha.

⁷Ham log sach bola, aur Parmeshwar ke sakti ham log meñ kaam karis. Ham log ke sab museebat meñ, ham log wahi bola aur kara jon raaiṭ raha.

⁸Chaahe ham log ke aadar kara gay ya niraadar, baṛaai kara gay ya saraapa gay, ham log hardam aapan baare meñ sachche bola. Lekin kuchh log bolin ki ham log jhuuṭ bola.

⁹Ham log ke bahut log nai jaane hei, lekin tum hamme janta hei. Ham log mare waala hei, lekin fir bhi jinda hei. Ham log ke saja mila, lekin maara nai gaya,

¹⁰aur ham log hardam khusi rahta hei, dukh ke ṭaaim meñ bhi. Ham log gareeb hei, fir bhi ham log aur bahut ke dhani banaaya. Aur jab ki hamaar lage kuchh nai hei, fir bhi sab kuchh hamaar hei.

¹¹Kurinth ke dosto, ham sachche bolta hei jab ham bolta hei ki hamaar dil meñ tumhaar waaste jagha hei.

¹²Ham, tum log ke prem meñ rukaawaṭ nai hei, lekin tum khud hee ham log ke prem meñ rukaawaṭ banta hei.

¹³Ham tum log se wahi rakam baat karta hei, jeise ham aapan laṛkan se baat karega. Kirpa kar ke aapan dil meñ hamaar waaste jagha banaao.

¹⁴Jon log Prabhu ke pichchhe nai chale hei, ulog se duur raho! Kaa koi jon achchha hei, uske sañghe rahe sake hei jon kharaab hei? Kaa laaiṭ aur añdhera ekke rakam hei?

¹⁵Kaa Krisṭ Saitaan ke dost hei? Ek biswaasi ke abiswaasi se kaa kaam?

¹⁶Kaa muurti Parmeshwar ke Mandir se sambandh rakkhe hei? Ham log jeewit Parmeshwar ke Mandir hei, jeise ki Parmeshwar khud bolis hei, “Ham ilog ke sañghe rahega aur ilog ke beech chalega. Ham ilog ke Parmeshwar rahega, aur ilog hamaar log rahi.”

¹⁷Prabhu aur bhi aage bole hei, “Ulog ke chhoṛ deo aur duur raho! Jon cheej safa nai hei uske nai chhuo. Tab ham tumme welkam karega

¹⁸aur tumhaar Pita rahega. Tum log hamaar beṭa aur beṭi rahega aur sachche ke ham shaktishaali Parmeshwar hei.”