Read Hindi, Fiji 2 Kurinth 8 Bible Online

2 Kurinth 8 - Hindi, Fiji bible

2 Kurinth 8

¹Dosto, ham sab mañgta hei ki tum jaano ki Mesiḍonia ke chech, sab ke dekhaais ki Parmeshwar ketna dayaalu hei.

²Bhale ulog kharaab ṭaaim se gujrat rahin, aur bahut gareeb rahin, ulog khusi khusi aapan jee jaan se det rahin.

³Ulog otna deen jetna ulog ke bas meñ raha aur usse bhi jaada, khali iske waaste ki ulog dewe maañgat rahin.

⁴Ulog ham log se binti karin ki Parmeshwar ke log ke waaste ulog ke dewan deo ki jisse ulog ke khusi mili.

⁵Aur ulog jetna ham socha raha usse bhi jaada karin. Ulog sab se pahile apne aap ke Prabhu ke saup deen fir ham log ke, jeise Parmeshwar maañgat raha ulog wahi rakam karin.

⁶Ṭaayṭas hee tumme i achchha kaam kare ke suru karaais raha, to ham usse binti kara ki jon kaam tum suru kara hei uske khatam bhi karaay.

⁷Tum sab kaam sab se achchha se karta hei. Tumhaar biswaas majbuut hei. Tum achchha se baat karta hei aur jaada bhi janta hei. Tum de mañgta hei, aur ham log se jaada prem karta hei. Ab tum aapan jee jaan se sab se jaada deo.

⁸Ham tumme i kare ke hukum nai deta hei. Ham to khali parakhta hei ki tumhaar sachcha prem aur duusar ke sañghe tumhaar keisan byohaar rahe hei.

⁹Tum to janta hei ki hamaar Prabhu Yeeshu Maseeh etna dayaalu raha ki u aapan puura sampati chhoṛ ke gareeb ban gais, ki jisse tum dhani hoy sako.

¹⁰Ek saal pahile tum sab se aage deta raha, aur tum deta raha kaahe ke tum de mañgta raha. Yahi khaatir hamaar sallaah suno.

¹¹Ham sochta hei ki tum jon cheej suru kara hei, uske khalaas karo. Tumhaar lage jetna hei, uske mutaabik agar tum dega, tab tum pruuv kar dega tumhaar ichchha jetna raha otna hee tum dia.

¹²I koi maane nai rakkhe hei ki tumhaar lage ketna hei. Kon cheej maane rakkhe hei ki tumhaar lage jetna hei usman se tum ketna de mañgta hei.

¹³Ham dusra ke sukh ke waaste tumme dukh nai dewe mañgta hei. Lekin yahi ṭheek rahi ki

¹⁴tum dusra ke sañghe u sab baaṭo jon tumhaar lage jaada hei, aur ulog ke lage bahut kamti hei. Baad meñ ulog ke lage jab jaada hoy jaai, aur tumme jaruurat paṛi, tab ulog tumhaar sañghe baaṭ lei. Tab sab koi ke lage ek rakam rahi,

¹⁵jeise ki Baaibal bole hei, “Ulog jon jaada baṭore hei, ulog ke kuchh bhi nai bacha. Jon thoṛa baṭorin ulog ke lage sab kuchh hei.”

¹⁶Hamme khusi hei ki Parmeshwar, Ṭaayṭas ke man meñ tumhaar waaste etna soch bhar dees, jetna hamaar man meñ hei.

¹⁷Jab ham Ṭaayṭas se aay ke mila, tab u maan lees. U tumhaar baare meñ etna sochat raha ki u tumhaar lage aay maañgis.

¹⁸Ṭaayṭas ke sañghe ham log ek aur Prabhu ke chela ke bhejta hei, jon sab chech meñ jaana jaay hei kaahe ke u susamaachaar feilaay hei.

¹⁹Chech ke log iske chunin ki i hamaar sañghe aay, jabki ham u daan le chali jon Prabhu ke baṛaai kari aur i bhi dekhaai ki ham ketna madat kare mañgta hei.

²⁰Ham nai mañgta ki koi hamaar dos nikaare jon rakam se ham i daan ke parband karta hei.

²¹Lekin ham log wahi kare mañgta hei jisse Prabhu khusi hoi aur jon log samjhe hei ki ṭheek hei.

²²Ham log Ṭaayṭas aur uske saathi ke sañghe koi aur ke bhi bhejta hei. Ham log i admi ke laaik kara. Kaahe ke, u ham log ke bahut dafe dekhaais ki u madat kare maañge hei. Aur ab u aur jaada madat kare maañge hei, kaahe ke u tum log pe bahut bharosa kare hei.

²³Ṭaayṭas hamaar paaṭna hei, jon tumhaar sewa ke khaatir hamaar sañghe kaam kare hei. Aur dui bhaai log ke chech bheje hei, aur ulog Krisṭ ke mahima laay hei.

²⁴Ulog ke achchha se dekh bhaal karna ki jisse chech tumhaar prem dekhi aur jaani ki kaahe ham tumhaar etna baṛaai karta raha.