Read Hindi, Fiji 2 Kurinth 9 Bible Online

2 Kurinth 9 - Hindi, Fiji bible

2 Kurinth 9

¹Hamme peisa ke baare meñ nai likhe ke hei, jon tum Parmeshwar ke log ke waaste de mañgta hei.

²Ham janta hei ki tum ketna jaada de mañgta hei. Aur ham ghamanḍ se Mesiḍonia meñ Prabhu ke chela log ke bataaya hei, ki tum Akhaaya ke log puura saal se taiyaar hei. Ab jab ki tum dewe mañgta raha, isse ulog bhi dewe maañge hei.

³Yahi kaaran ham Ṭaayṭas aur dui aur log ke tumhaar lage bhejta hei. Ham mañgta hei tum taiyaar raho, jeise waada kara raha. Isse i dekhaai ki ham log tum pe ghamanḍ kar ke bhuul nai kara.

⁴Mesiḍonia se kuchh log hamaar sañghe aai, aur ham mañgta hei ki ulog dekhe ki peisa taiyaar hei. Agar eise nai hoi to tum pe bharosa kar ke ham muñh dekhaay laayk nai rahega. Lekin tum ham se jaada saram meñ paṛ jaayga.

⁵Yahi kaaran ham socha hei ki Ṭaayṭas aur baaki log se ham bolega ki hamaar aay se pahile ulog tumhaar sañghe kuchh ṭaaim bitaay. I rakam se ulog tumhaar lage se peisa jon tum waada kara raha, lewe ke subidha kare sake hei. Tab tumme mauka mili ki tum de dega kaahe ke tum dewe mañgta raha, i nai ki koi tum se jabarjasti karis hei.

⁶I kahaawat yaad rakhna, “Thoṛa bia thoṛa fasal banaai, lekin jaada bia ek baṛa fasal banaai.”

⁷Sab koi soch leo ki tumme ketna de ke hei. Lekin soch nai karna ki tumme dewe ke hei ya i nai sochna ki tumme dabaao meñ aay ke dewe ke hei. Parmeshwar ulog se prem kare hei jon dewe maañge hei.

⁸Jon bhi cheej ke tumme jaruuri hei, Parmeshwar u sab se tumme bhar dei, aur tumhaar lage hardam thoṛa jaada cheej rahi ki jisse tum duusar ke waaste jon bhi achchha kaam kare mañgta hei, u sab kar lega.

⁹Baaibal bole hei, “Parmeshwar, gareeb ke muft meñ daan de hei, aur hardam raaiṭ kaam kare hei.”

¹⁰Parmeshwar, kisaan ke bia de hei aur baaki sab ke waaste bhojan ke parband kare hei. Jon cheej tumhaar lage hei, u uske jaada kar dei, ki jisse tum ulog ke aur jaada de sakega, jon ke jaruuri hei.

¹¹Tumme sab bagal se aasheesh mili, aur tum daan de waala bana rahega. Tab bahut log Parmeshwar ke dhanbaad dei jab ham sab uske daan ulog tak laaya.

¹²Jon cheej tum karta hei, u sab sewa se jaada hei jon Parmeshwar ke jaruurat mand log tak le jaay hei. I u cheej hei jisse bahut log Parmeshwar ke dhanbaad dei.

¹³Jon rakam se i sewa kar ke tum apne aap ke i laayk banaaya hei, isse Parmeshwar ke baṛaai aur mahima hoi. Tum Krisṭ ke sandes ke biswaas kara, aadar aur khula dil se Parmeshwar ke aur log meñ, uske sandes baaṭ ke us pe chala hei.

¹⁴Ab ulog tumhaar waaste preya kare hei aur tumme dekhe maañge hei, kaahe ke Parmeshwar tumhaar kaaran ulog ke bahut aasheesh dees hei.

¹⁵Parmeshwar ke, uske u daan ke waaste jon ke ham bataay nai sakta hei, dhanbaad!