Read Hindi, Fiji Galeshia 2 Bible Online

Galeshia 2 - Hindi, Fiji bible

Galeshia 2

¹Chauda (14) saal ke baad ham Baranbaas ke sañghe Yarushalam gaya. Ṭaayṭas ke bhi sañghe le gaya.

²Ham huañ gaya raha kaahe ke Parmeshwar hamme bataais raha, aur ham geir Yahuudi log ke susamaachaar ke baare meñ samjhaaya jon ham parchaar karat raha. Tab ham akelle meñ ulog se mila jon khaas agua log rahin. Ham i jaane mañgta raha ki jon kaam ham pahile kara aur jon kare jaata hei, u bekaar nai jaai.

³Ṭaayṭas hamaar sañghe Yarushalam gais. U ek Greek raha, lekin uske khatna kare ke jabarjasti nai kara gais.

⁴Ham log u kaaran huañ gaya raha, kaahe ke jon log bahaana karat raha ki ulog uske pichchhe chale waala hei, ham log ke beech meñ jaasuus ke rakam ghus gain. Ulog ham log ke ajaadi jon Maseeh se hamlog ke mila raha, uske bhed leke hamme gulaam banaay maañgat rahin.

⁵Lekin ham log mañgta raha ki tumme sachcha sandes mile. Yahi kaaran ham ulog ke ek minaṭ ke waaste bhi nai dia.

⁶Usman se saait kuchh khaas agua log rahin, lekin ham parwaah nai kara ki ulog kon hei. Parmeshwar ke koi faivraṭs nai rahe hei! I khaas agua log meñ se koi bhi hamaar sandes meñ kuchh aur nai joṛis.

⁷Ulog samajh gain ki Parmeshwar hamme geir Yahuudi ke waaste susamaachaar deke bhejis raha, aur Peeṭa ke bhi Yahuudi log ke waaste wahi vachan ke sañghe bhejis raha.

⁸Parmeshwar, jon Peeṭa ke Yahuudi log ke lage ek khaas kaam se bhejis raha, wahi geir Yahuudi meñ parchaar kare ke waaste hamme iyuz kare hei.

⁹Jeims, Peeṭa aur Yuhanna jaan leen ki Parmeshwar aapan behad daya ke sandes hamme dees hei. Aur i admi log saait chech ke sahaara hei. Ulog Baranbaas aur ham se prem se haath milaain. I dekhaay ke waaste ki ham geir Yahuudi ke sañghe aur ulog Yahuudi ke sañghe kaam kare sake hei.

¹⁰Ulog ham log ke khali gareeb log ke yaad kare ke bolin raha, aur wahi hei jon ham hardam josh se kare mañgta raha.

¹¹Jab Peeṭa Antaakia aais, ham uske muh pe bol dia ki u roñg hei.

¹²Jab tak Jeims kuchh Yahuudi log ke nai bhejis, tab tak u Prabhu ke biswaasi geir Yahuudi log ke sañghe khaat raha. Peeṭa, Yahuudi log se ḍarat raha aur geir Yahuudi log ke sañghe khaana khaay ke chhoṛ dees.

¹³Dusra Yahuudi log aur u, aapan dil ke baat eise chhipaain ki Baranbaas bhi beokuuf ban gais.

¹⁴Lekin jab ham dekha ki ulog susamaachaar ke sach ke nai maane hei, tab ham sab ke saamne Peeṭa se bola, Peeṭa, tum ek Yahuudi hei, lekin tum geir Yahuudi log ke rakam rahta hei. Tab keise tum jabarjasti geir Yahuudi log ke Yahuudi log ke rakam rahe ke bolega?

¹⁵Ham log janam se Yahuudi hei aur geir Yahuudi paapi log ke rakam nai hei.

¹⁶Lekin ham log janta hei ki Parmeshwar khali wahi ke apnaay hei jon ke biswaas Yeeshu Maseeh meñ hei. Khali kaanuun maan ke koi Parmeshwar ke khusi nai kare sake hei. To ham log Yeeshu Maseeh meñ aapan biswaas rakhta hei, aur Parmeshwar ham log ke biswaas ke kaaran hamme apnaay hei.

¹⁷Jab ham Yahuudi log rasta khoje laga ki keise Parmeshwar ke khusi kara jaay, ham log paaya ki ham sab bhi paapi hei. Kaa iske matlab hei ki Krisṭ hamme paapi banaay hei? Nai, bilkul nai!

¹⁸Lekin agar ham kuchh kaanuun ke tuuṛ ke aur fir se banaayga, tab ham saabit karta hei ki ham pahila dafe roñg raha.

¹⁹U kaanuun hee raha jon hamme maar ke fir aapan sakti se ajaad kar dees, ki jisse ham Parmeshwar ke khaatir jiye saki. Hamme Krisṭ ke sañghe kros pe chaṛhaawa gais raha.

²⁰Ham to mar gaya raha, lekin Krisṭ ham meñ jinda hei. Aur ab ham Parmeshwar ke laṛka pe biswaas karta hei, jon ham se pyaar karis raha aur hamaar waaste aapan praan dees hei.

²¹Ham Parmeshwar ke mahaan daya ke peeṭhi nai ghumaayga. Agar kaanuun ke paalan kare se ham log pe Parmeshwar apnaai, tab Krisṭ ke mare ke koi faayda nai.