Read Hindi, Fiji Galeshia 4 Bible Online

Galeshia 4 - Hindi, Fiji bible

Galeshia 4

¹Bachcha log jon kamti umar ke hei, ulog gulaam se achchha nai hei, fir bhi jon cheej maañ baap ke hei, ek din ulog ke hoy jaai.

²I u kaaran hei ki bachcha log ke ek gaaḍian aur ṭeecha ke nichche tab tak rakkha jaay hei, jab tak maañ baap chaahe hei.

³Yahi rakam ham log ke sañghe bhi raha. Ham log u laṛkan ke rakam raha jon i dunia ke sakti ke mutaabik chalaawa jaat raha.

⁴Lekin jab raaiṭ ṭaaim raha, Parmeshwar aapan laṛka ke bhejis, aur ek aurat uske janam dees. Uske laṛka kaanuun ke maanis,

⁵ki jisse u ham log ke kaanuun se free karaay de, aur ham Parmeshwar ke laṛkan hoy jaai.

⁶Ab jab ki ham uske laṛkan hei, Parmeshwar ham log ke dil meñ aapan laṛka ke Aatma bhejis hei. Aur uske Aatma ham log ke bataay hei ki Parmeshwar ham log ke Pita hei.

⁷Tum ab gulaam nai raha. Tum sab Parmeshwar ke laṛkan hei, aur tumme u sab dewa jaai jon u waada karis raha.

⁸Pahile tum Parmeshwar ke nai jaanta raha, aur tum sab u bhagwaan ke gulaam raha jon sachcha bhagwaan nai rahin.

⁹Lekin ab tum Parmeshwar ke jaan lia hei, ya usse achchha bola jaay hei ki Parmeshwar tumme jaane hei. Keise tum ghuum ke kamjor aur chhoṭa sakti ke gulaam bane sakta hei?

¹⁰Tum to khaas din, mahina, mausam aur saal ke bhi manaata hei

¹¹Hamme afsos hei ki ham aapan ṭaaim tum log ke sañghe kaam kar ke barbaad kara.

¹²Dosto, ham binti karta hei ki tum hamaar rakam raho, jeise ham ek dafe kosis kara raha ki ham tumhaar rakam rahi. Kaa tum hamme sataay raha

¹³jab ham sab se pahile tumme parchaar kara raha? Nai, bilkul nai, hiañ tak ki jab tum jaana ki ham bimaari ke kaaran huañ aay raha.

¹⁴Hamaar bimaari saait tumme kuchh problam dees raha, lekin tum ham se haiṭ nai kara raha, ya uske kaaran hamme chhoṛa nai. Tum hamme welkam kara raha jeise ki ham Parmeshwar ke ek ainjal raha ya khud Maseeh raha.

¹⁵U achchha feeling ab kahañ hei? Ham jaan gaya hei ki agar hoy sakta, to tum aapan aañkhi nikaar ke hamme de deta.

¹⁶Kaa ab ham tumhaar dusman hei, kaahe ke ham tumme sach bataay dia hei?

¹⁷U log saait tumme bahut dhyaan det hoy, lekin u tumhaar waaste achchha nai hei. Ulog khali tumme ham se duur rakkhe maañge hei, ki jisse tum ulog ke jaada dhyaan dega.

¹⁸I hardam achchha rahe hei ki koi achchha cheej ke dhyaan deo, hiañ tak ki jab ham tumhaar sañghe nai hei.

¹⁹Hamaar bachcho, ham gahira dukh meñ hei, jab tak Maseeh tum meñ rahe nai lagi.

²⁰Hamaar ichchha hei ki ham tumhaar sañghe hoi. Tab hamme i rakam baat kare ke nai paṛi. Tum sachche ke hamme uljhan meñ ḍaar dia hei.

²¹Tum meñ se kuchh Maozas ke kaanuun ke nichche rahe mañgta hei. Lekin kaa tum janta hei ki kaanuun kaa bole hei?

²²Baaibal meñ ham sikhta hei ki Abraham ke dui laṛka rahe hei. Ek ke amma gulaam rahe hei, aur dusra ke amma hardam se ajaad rahi.

²³Gulaam ke laṛka ke janam aur sab ke rakam bhais. Lekin ajaad aurat ke laṛka ke janam, Parmeshwar ke waada se bhais.

²⁴I sab ke ek aur matlab hoy hei. Duuno aurat dui vaacha (agrimenṭ) ke naam pe khaṛa bhais jon Parmeshwar aapan log ke sañghe banaais. Jiske laṛkan gulaami meñ peida bhain, u Haiga hei aur u Saaynaai pahaaṛ ke vaacha hei. Jon sab uske palwaar meñ peida hoi u sab gulaam rahi.

²⁵Saaynaai pahaaṛ Arebia meñ hei, aur Haiga, abhi ke nagar Yarushalam nagar ke bagal se hei. U aur uske laṛkan gulaam hei.

²⁶Lekin ham log ke maañ swarag meñ Yarushalam nagar hei aur u gulaam nai hei.

²⁷Uske baare meñ Baaibal bole hei, “Tumhaar lage kabhi laṛkan nai raha, aur ab tumme khusi hoy ke chaahi. Tum kabhi bachcha nai peida kara, lekin ab tum chillaay sakta hei. Ek ṭaaim raha tumhaar lage laṛkan nai rahin, lekin ab tumhaar lage bahut laṛkan rahi u aurat se bhi jaada jon ke bahut din se saadi bhais hei.”

²⁸Dosto, i waada ke kaaran tum peida bhaya, Aayzak ke rakam.

²⁹Lekin jon bachcha sab ke naichral rakam se peida bhais raha, u Aatma meñ peida hoy waala laṛka ke waaste museebat banis. Wahi rakam abhi bhi hoy hei.

³⁰Baaibal bole hei, “Gulaam aurat aur uske laṛka ke nikaar feko! Uske kuchh nai deo. Ajaad aurat ke laṛka ke sab kuchh mili.”

³¹Dosto, ham log sab ajaad aurat ke laṛkan hei, gulaam aurat ke nai.