Read Hindi, Fiji Galeshia 6 Bible Online

Galeshia 6 - Hindi, Fiji bible

Galeshia 6

¹Dosto, tum aatmik hei. Agar koi paap meñ pakṛa gay hei, to tum dheere se uske seedha rasta pe le aao. Lekin husiaar rahna. Aur apne aap usman fañs nai jaao.

²Tum Krisṭ ke kaanuun ke maanta hei, jab tum ek dusra ke haath baṭaata hei.

³Agar tum sochta hei ki tum aur sab se achchha hei, jab ki tum nai hei, to tum roñg hei.

⁴Aapan kaam, apne achchha se karo, aur tab tumme ghamanḍ kare ke kuchh rahi. Lekin apne aap ke dusra se tulna nai karo.

⁵Ham log ke aapan aapan bojha apne ḍhoy ke chaahi.

⁶Jon bhi kuchh achchha cheej tumhaar lage hei, uske u log ke baaṭo jon tumme Parmeshwar ke baat sikhaay hei.

⁷Tum Parmeshwar ke beokuuf nai banaay sakta hei, to apne aap ke beokuuf nai banaao! Tum jon cheej bota hei, wahi kaaṭega.

⁸Agar tum aapan selfish ichchha pe chalta hei, tab tum barbaadi kaaṭega, lekin agar tum Aatma ke pichchhe chalta hei, to anant jeewan kaaṭega.

⁹Dusra ke madat kare ke nai thako. Jab raaiṭ ṭaaim aai to tumme fal mili, agar tum haar nai maano.

¹⁰Ham log ke jab bhi mauka mile to sab koi ke madat kare ke hei, khaas kar ke agar ulog Parmeshwar ke chela hei.

¹¹Tum dekhe sakta hei ki ham ketna baṛa akchhar (leṭa) meñ likhta hei, jab ham aapan haath se likhta hei.

¹²Ulog jon tumme khatna kare ke bole hei, i dekhaay maañge hei ki ulog ketna khaas hei. Aur ulog Krisṭ ke kros ke parchaar kar ke museebat meñ nai aay maañge hei.

¹³Ulog ke khatna bhais hei, lekin ulog Maozas ke kaanuun nai maane hei. Ulog ke khali ghamanḍ hei ki ulog tumhaar khatna karaais hei.

¹⁴Lekin ham aur koi cheej ke ghamanḍ nai karega siwaay hamaar Prabhu Yeeshu Maseeh ke kros ke. Uske kros ke kaaran, jahañ tak ham samajhta hei ki dunia mar gais hei. Aur ham bhi mar gaya hei jahañ tak dunia ke sawaal hei.

¹⁵I kuchh nai hei ki tumme khatna bhais hei ya nai. Jon cheej matlab rakkhe hei, u i hei ki tum ek nawa jan hoy gaya hei.

¹⁶Agar tum i ruuls pe chalo, tum Parmeshwar ke sachcha log rahega. Aur Parmeshwar tumme behad daya aur saanti ke aasheesh dei.

¹⁷Hamaar deñhi pe daag hei ki ham Yeeshu Maseeh ke hei. To ham nai mañgta ki koi hamme tang kare.

¹⁸Dosto, ham binti karta hei ki Prabhu Yeeshu Maseeh tum pe daya kari. Aameen.