Read Hindi, Fiji Efisia 1 Bible Online

Efisia 1 - Hindi, Fiji bible

Efisia 1

¹Pol ke taraf se, jiske Parmeshwar chunis raha ki Maseeh Yeeshu ke prerit bane. Parmeshwar ke u biswaasi log ke jon Efisus meñ rahe hei, aur uske pichchhe chale hei.

²Ham binti karta hei ki hamaar Pita Parmeshwar aur Prabhu Yeeshu Maseeh tum pe daya kari aur saanti ke aasheesh dei!

³Jay jay howe Parmeshwar aur Prabhu Yeeshu Maseeh ke Pita ke, u aatmik aasheesh ke khaatir jon Krisṭ ham log ke waaste swarag se laais raha!

⁴Dunia ke bane se pahile, Parmeshwar, Maseeh se hamme chune ke bolis ki ham uske pawitr aur pyaara jan ban ke rahi.

⁵Parmeshwar dayaalu raha aur tay karis ki Maseeh ham log ke chuni jisse Parmeshwar hamlog ke godi leke (adopt) aapan laṛkan banaai.

⁶Parmeshwar aapan laṛka jiske u bahut pyaar karat raha, uske kaaran ham pe bahut daya karis, aur ham log ke Parmeshwar ke baṛaai kare ke hei.

⁷Krisṭ aapan khuun ke balidaan dees ki jisse u hamlog ke chhuṭkaara dewaai, iske matlab hei ki ab ham log ke paap ke maafi hoy gais hei. Krisṭ i sab i kaaran karis ki Parmeshwar ham pe bahut daya karis raha. Parmeshwar ke lage bahut samajh aur buddhi hei,

⁹aur jon cheej Krisṭ karis, usse Parmeshwar hamme aapan bhed khud hee dekhaais.

¹⁰Tab, jab raaiṭ ṭaaim rahi, Parmeshwar u sab kari jon u plen karis hei, aur Krisṭ swarag aur dharti pe sab cheej ke ek sañghe le ke aai.

¹¹Parmeshwar hardam wahi kare hei jon u plen kare hei, aur yahi kaaran u Krisṭ ke appoinṭ karis ki u hamme chune.

¹²U i kaaran i karis raha ki ham Yahuudi log uske aadar dega aur uske kaaran ulog pahila log rahi jiske aasha mili.

¹³Krisṭ tum log ke lage sachchaai bhi laais, jon ki susamaachaar hei ki keise tum bache sakta hei. Tum aapan biswaas Krisṭ meñ rakkha aur Pawitr Aatma tumme waada karis ki tumme dekhaai ki tum Parmeshwar ke hei.

¹⁴Aatma i bhi dekhe hei ki ham log ke u sab mili jon Parmeshwar aapan log ke waaste baṭor ke rakkhis hei. Tab ham log ajaad hoy jaayga, aur Parmeshwar ke jayjaykaar aur baṛaai hoi.

¹⁵Ham Prabhu Yeeshu meñ tumhaar biswaas ke baare meñ aur Parmeshwar ke log ke tumhaar prem ke baare meñ suna hei.

¹⁶To ham kabhi tumhaar baare meñ Parmeshwar ke dhanbaad de ke nai chukta hei. Ham tumme aapan preya meñ yaad karta hei.

¹⁷Ham aapan Prabhu Yeeshu Maseeh ke mahaan Pita aur Parmeshwar se maañga ki tumme aapan Aatma de. Aatma tumme buddhimaan banaai aur i bhi samjhaai ki Parmeshwar ke jaane ke kaa matlab hei.

¹⁸Hamaar preya hei ki tumhaar dil roshni se bhar jaai aur tum u aasha ke baare meñ samajh lega jon tumme mila raha jab Parmeshwar tumme chunis raha. Tab tum u sundar aasheesh ke jaanega jon tumhaar aur Parmeshwar ke log ke hoi.

¹⁹Ham mañgta hei ki tum u mahaan sakti ke baare meñ jaano jon Parmeshwar ham chela log ke dees hei. U wahi mahaan sakti hei jiske u iyuz karis hei

²⁰jab u Krisṭ ke mara se jinda karis raha aur aapan raaiṭ saaiḍ beiṭhe ke dees.

²¹Huañ pe Krisṭ sab taagat, adhikaar, sakti aur agua log ke uppar ruul kare hei. U i dunia ke aur aay waala ṭaaim ke sab ke uppar ruul kare hei.

²²Parmeshwar sab cheej Krisṭ ke sakti ke nichche rakh dees hei, aur chech ke achchhaai ke khaatir uske sab cheej meñ agua banaay dees hei.

²³Chech, Krisṭ ke deñhi hei aur wahi se bhara hei jon sab cheej puura kar de hei.