Read Hindi, Fiji Efisia 2 Bible Online

Efisia 2 - Hindi, Fiji bible

Efisia 2

¹Abhi tak tum mara raha kaahe ke tum paap karta raha aur Parmeshwar se jhagṛa karta raha.

²Tum sab i dunia ke rasta pe chalta raha aur saitaan ke maanta raha. Wahi dunia ke chalaay hei, aur uske Aatma ke sakti u sab pe hei jon Parmeshwar ke nai maane hei.

³Ek ṭaaim ham sab aapan deñhi aur dimaag ke selfish ichchha pe chalta raha. Ham log Parmeshwar ke gussa kara, aur ham log ke sab log ke kaṛa saja mile ke raha.

⁴Lekin Parmeshwar dayaalu hei! Ham log aapan paap ke kaaran mar gay raha, lekin Parmeshwar ham log se etna prem karis ki Krisṭ ke sañghe ham log ke jinda kar dees, aur Parmeshwar ke sundar daya hei, jon tumme bachaay hei.

⁶Parmeshwar ham sab ke Yeeshu Maseeh ke sañghe mara meñ se jinda karis, aur u ham log ke swarag meñ Krisṭ ke bagal meñ jagha dees hei.

⁷Parmeshwar i karis ki jisse aage ke dunia meñ u dekhaay saki ki jon kuchh Maseeh Yeeshu karis raha uske kaaran u ham pe ketna daya aur meharbaan hei.

⁸Tum log aapan biswaas se Parmeshwar ke anugrah se bachaawa gaya.

⁹I tum log ke kosis ke fal nai hei, lekin Parmeshwar ke daan hei, ki jisse koi bhi aapan baṛaai nai kare saki.

¹⁰Parmeshwar ham log ke waaste plen banaais ki ham sab achchha kaam kari aur wahi rakam rahi jeise u hardam maañge ki ham rahi. Yahi kaaran u Krisṭ ke bhejis ki hamme wahi banaay jon ham abhi hei.

¹¹Nai bhulna ki ham geir Yahuudi hei. Tum log to jon ke khatna hoy gais raha aur ghamanḍ karat raha ulog se “Khatna jiske nai bhais hei” kahaawa jaat raha.

¹²U ṭaaim tum Maseeh ke baare meñ nai janta raha. Tum sab Israayel log ke khaatir dusra jaati ke log raha, aur jon waada Parmeshwar ulog se karis raha, tumhaar usman koi haath nai raha. Tum log i dunia meñ bina aasha aur bina Parmeshwar ke rahta raha,

¹³aur tum log Parmeshwar se bahut duur raha. Lekin Krisṭ aapan jeewan ke khuun ke balidaan dees aur tumme Parmeshwar ke nagichche laais.

¹⁴Krisṭ, Yahuudi aur geir Yahuudi ke beech saanti laais, aur u ham log ke haiṭ ke diwaar giraay ke, milaay dees hei. Krisṭ aapan deñhi deke

¹⁵Maozas ke kaanuun aur uske sab ruuls aur hukum ke naas kar dees hei. U Yahuudi aur geir Yahuudi ke bhi ek sañghe laais jeise ulog ekke jan hei, jab u ham log ke saanti meñ joṛis.

¹⁶Kros pe Krisṭ ham log ke u haiṭ ke bhi duur kar dees hei. U Yahuudi aur geir Yahuudi ke ek boḍi meñ joṛ ke, ham log aur Parmeshwar meñ saanti laay dees hei.

¹⁷Maseeh aay ke tum geir Yahuudi jon Parmeshwar se bahut duur raha, aur ham Yahuudi log jon Parmeshwar ke nagichche raha, usman saanti ke parchaar karis.

¹⁸Aur Maseeh ke kaaran, ham log sab Pita ke lage wahi Aatma ke sahaare aay sakta hei.

¹⁹Tum geir Yahuudi log ab ek dusra se anjaan aur pardesi nai hei. Tum log ulog ke palwaar hoy gaya hei jon Parmeshwar ke palwaar hei.

²⁰Tum log u bilḍiñg ke rakam hei jisman prerit aur nabi faaunḍeishan hei aur Krisṭ sab se khaas patthar hei.

²¹Maseeh hee hei jon puura bilḍiñg ke roke hei aur uske Prabhu ke ek pawitr Mandir meñ baṛhaay hei.

²²Aur tum log, u Mandir jon Maseeh Parmeshwar ke Aatma ke rahe ke waaste banaais hei, uske ek bhaag hei.