Read Hindi, Fiji Efisia 4 Bible Online

Efisia 4 - Hindi, Fiji bible

Efisia 4

¹Jeise ki ham Prabhu ke keidi hei, ham tum se binti karta hei ki i rakam raho jeise ulog ke rahe ke chaahi jon ke Parmeshwar aapan waaste chunis hei.

²Hardam deen aur naram raho. Dheeraj ke sañghe ek dusra ke nibhaao aur ek dusra se prem karo.

³Kosis karo ki Parmeshwar ke Aatma tum log ke dil ke ekta meñ baañdh de. Saanti se rahe ke i sab karo.

⁴Tum sab log ek boḍi ke sab bhaag hei. Khali ek Parmeshwar ke Aatma hei, jeise tumme khali ek aasra mila raha jab tum Parmeshwar ke waaste chuna gaya raha.

⁵Ham log ke khali ekke Prabhu hei, ek biswaas aur ek baptisma.

⁶Aur sab ke ekke Parmeshwar hei jon sab log ke Pita hei, jon sab ke uppar hei, aur u ham sab log ke iyuz kar ke kaam kare hei, aur ham sab log ke beech meñ rahe hei.

⁷Krisṭ dil se aapan daan (gifṭ) ham log meñ baaṭis hei.

⁸Jeise Baaibal bole hei, “Jab u uppar gais bahut uchcha jagha pe, u bahut keidi log ke aapan sañghe le gais aur sab log ke daan dees.”

⁹Jab bola jaay hei, “U uppar gais,” iske matlab hei ki Maseeh dharti meñ bahut nichche raha.

¹⁰Iske aur matlab i bhi hoy hei ki jon ek dharti meñ bahut gahira gais raha, u wahi hei jon swarag meñ sab se uchcha pe gais, ki jisse u sab iunives ke puura kar dei.

¹¹Krisṭ ham log meñ se kuchh ke chunis ki ham prerit, nabi, mishnarees, paadri, ṭeecha bani,

¹²ki jisse uske log sewa kare ke seekhe aur uske boḍi majbuut hoi.

¹³I sab hote rahi jab tak ham biswaas aur Parmeshwar ke laṛka ke samajh se ek dusra meñ bañdh nai jaai. Tab ham samajhdaar hoy jaayga, jeise Krisṭ hei. Aur ham log ekdam wahi ke rakam hoy jaayga.

¹⁴Ham log ke laṛkan ke rakam ekṭ kare ke chhoṛe ke paṛi. Ham log ke dekhe ke hei ki kapṭi log ham log ke aapan jhuuṭa ṭeeching se fasaay nai le, jon ki hawa ke rakam hei jon hamme jagha jagha feke hei.

¹⁵Prem hamme hardam sachche bolwaai. Tab ham log sab rakam se baṛhega aur Krisṭ ke rakam hoyga, jon boḍi ke

¹⁶heḍ hei. Krisṭ sab ke, sañghe baañdhe rakkhe hei aur uske sab bhaag ke achchha se kaam kare ke banaay hei, jeise u baṛhe hei aur prem ke kaaran majbuut hoy hei.

¹⁷Prabhu ke chela hoy se, ham tumme hukum deta hei ki beokuuf, aur bina Parmeshwar ke log rahe ke bañd kar deo.

¹⁸Ulog ke dimaag añdhera meñ hei, aur ulog jiddi aur naasamajh hei aur u jeewan jon Parmeshwar se aay hei, usse alag hoy gain hei. Ulog ab nai jaane hei ki kon cheej raaiṭ hei,

¹⁹aur ulog etna peṭṭu hei ki sab rakam ke neech kaam kare hei.

²⁰Lekin i u nai hei jon Maseeh Yeeshu ke baare meñ tum seekha hei, u sach hei, aur tum uske baare meñ suna aur seekha hei.

²²Tum log ke bataawa gay raha ki tumhaar fuulish ichchha tumme naas kar dei aur tum log ke aapan puraana jindagi aur aadat sab chhoṛ de ke hei.

²³Aatma ke, tumhaar soche ke ḍhañg ke badle deo,

²⁴aur tumme ek nawa admi banaay deo. Tumme banaawa gay raha ki tum Parmeshwar ke rakam raho, aur tum uske khusi rakkho aur ekdam pawitr raho.

²⁵Ham log ek hee boḍi ke bhaag hei. Jhuuṭ bole ke chhoṛo aur ek dusra se sachche bolo.

²⁶Gussa nai ho ki tum se paap hoy jaay. Gussaay ke sowe nai jaao

²⁷aur saitaan ke mauka nai deo.

²⁸Agar tum chor hei, chori kare ke chhoṛo. Sachcha raho aur dil lagaay ke kaam karo, to tum log ke lage jaruurat mand log ke dewe ke waaste kuchh rahi.

²⁹Aapan sab gañda baat bañd karo. Raaiṭ baat raaiṭ jagha pe bolo aur sab ke jon cheej tum bolta hei, usse madat karo.

³⁰Parmeshwar ke Aatma ke udaas nai karo. Aatma i shua kare hei ki ek roj tum aapan paap se chhuṭkaara paay lega.

³¹Dusra ke sañghe, kaṛuaapan, gussa aur krodh nai karo. Ek dusra pe chillaao nai ya saraapo ya ruuḍ raho.

³²Iske alaawa, dayaalu aur mesiful raho, aur dusra log ke maaf kar deo, jeise Parmeshwar, Krisṭ ke kaaran tumme maafi dees raha.