Read Hindi, Fiji Efisia 5 Bible Online

Efisia 5 - Hindi, Fiji bible

Efisia 5

¹Weise karo jeise Parmeshwar kare hei. Kaahe ke, tum sab uske pyaara laṛkan hei.

²Prem ke tumme rasta dekhaay deo. Krisṭ ham se prem karis, aur aapan jeewan ek balidaan jon Parmeshwar ke khusi kare hei, uske waaste de dees.

³Tum sab Parmeshwar ke log hei, tab i nai bole deo ki tum meñ se koi neech hei ya peṭṭu ya besaram hei.

⁴Muurakh ya kharaab ya gañda baat nai iyuz karo. Uske badle, bolo ki tum ketna theñkful hei.

⁵Peṭṭu ya neech ya besaram banna, muurti puujan ke ek dusra rasta hei. Tum shua rahna ki jon log i rakam chaal chale hei, Parmeshwar ke raaj jon Krisṭ aur Parmeshwar ke hei, uske bhaag kabhi nai bani.

⁶Koi ke aapan muurakh baat se tumme dhoka nai dewe dena. Parmeshwar, ulog ke saja de hei, jon uske baat nai maane hei.

⁷To koi bhi eisan log se koi bhi waasta nai rakhna.

⁸Tum ulog ke rakam raha jon añdhera meñ rahat rahin, lekin ab tum roshni meñ rahe waala log hei kaahe ke tum Prabhu ke hoy gaya hei. Yahi kaaran roshni meñ rahe waala log ke rakam kaam karo

⁹aur aapan roshni ke chamkaao. Achchha aur imaandaar aur sachcha bana raho,

¹⁰jabki tum Prabhu ke khusi rakkhe mañgta hei.

¹¹Neech kaam jon añdhera meñ hoy hei, usman bhaag nai leo. Uske badle, ulog ke dekhaao ki ulog ketna roñg hei.

¹²Jon kaam añdhera meñ hoy hei, uske baare meñ baat kare ke bhi hamme ghinn lage hei.

¹³Lekin roshni dekhaai ki i sab cheej kon rakam ke hei.

¹⁴Roshni sab cheej dekhaay hei, jeise Baaibal bole hei, “Aapan neeñd se jago aur murda meñ se uṭho. Tab Krisṭ tum pe chamki.”

¹⁵Samajhdaar log ke rakam chaal chalo, muurakh log ke rakam nai.

¹⁶I kharaab ṭaaim hei, to ek ek minaṭ gino.

¹⁷Beokuuf nai bano. Uske badle, dekho ki Prabhu kon cheej maañge hei ki tum karo.

¹⁸Apne aap ke nasa pee ke naas nai karo, lekin Aatma ke aapan jeewan meñ bhare deo.

¹⁹Jab tum ek dusra se milta hei, bhajan sañhita, (Psalms) aatmik gaana aur bhajan gaao, jab tum Prabhu ke aapan puura dil se baṛaai karta hei.

²⁰Hardam hamaar Prabhu Yeeshu Maseeh ke naam se Parmeshwar Pita ke sab cheej ke khaatir dhanbaad deo.

²¹Maseeh ke aadar karo, aur dusra log ke aage rakkho.

²²Ek aurat ke, aapan admi ke aage rakkhe ke chaahi, jeise u Prabhu ke kare hei.

²³Krisṭ aapan chech jon uske deñhi hei, uske heḍ aur bachaay waala hei, wahi rakam ek admi aapan aurat ke heḍ hei.

²⁴Aurat log ke hardam aapan admi log ke aage rakkhe ke chaahi, jeise chech Krisṭ ke aage rakkhe hei.

²⁵Ek admi ke aapan aurat se otna pyaar kare ke chaahi jetna Krisṭ chech se karis raha aur aapan jeewan uske khaatir de dees hei.

²⁶U chech ke aapan vachan ke sakti se pawitr banaay dees hei, aur u uske paani se dhoy ke sudh kar dees hei.

²⁷Krisṭ i karis raha, ki jisse u mahima se bhara aur pawitr chech banaay sake, jon ke koi dos ya dhabba ya jhurri (wrinkles) ya aur koi dos nai hoy.

²⁸Yahi rakam, ek admi aapan aurat se otna hee pyaar kare jetna u apne aap se kare hei. Ek admi jon aapan aurat se pyaar kare hei i dekhaay hei ki u apne aap se prem kare hei.

²⁹Ham log meñ se koi aapan deñhi se haiṭ nai karta hei. Ham log uske waaste sab kuchh deta hei, uske achchha se dekhbhaal karta hei, jeise Krisṭ chech ke kare hei,

³⁰kaahe ke ham log sab uske deñhi ke hissa hei.

³¹Jeise Baaibal bole hei, “Ek admi aapan amma bappa ke, saadi kare ke waaste chhoṛe hei, aur u aapan aurat se ek hoy jaay hei.”

³²I ek baṛa bhed hei, lekin ham samajhta hei ki iske matlab hei Krisṭ aur uske chech.

³³To har ek admi ke aapan aurat se otna pyaar kare ke chaahi jetna u apne aap ke pyaar kare hei, aur uske aurat ke uske aadar kare ke chaahi.