Read Hindi, Fiji Efisia 6 Bible Online

Efisia 6 - Hindi, Fiji bible

Efisia 6

¹Bachcha log, tum sab Prabhu ke hei, tum raaiṭ kaam karta hei jab tum aapan maañ baap ke kaha maanta hei. Waada ke sañghe pahila aagya bole hei,

²“Aapan amma-bappa ke baat maano,

³aur tum log ke ek lamba aur khusi jeewan rahi.”

⁴Maañ-baap, aapan laṛkan pe kaṛa nai raho. Ulog ke achchha se baṛa karo. Prabhu ke baare meñ ulog ke sikhaao aur aagya deo.

⁵Gulaam log, tum dharti ke maalik ke baat maano. Ulog ke bahut aadar dekhaao aur ulog se wafaadaar (loyal) raho jeise tum Krisṭ se hei.

⁶Kosis karo ki hardam tum ulog ke khusi rakkho, aur khali u ṭaaim nai jab tum sochta hei ki ulog tumme dekhe hei. Tum sab Krisṭ ke daas hei, to tum aapan puura dil se wahi karo jon Parmeshwar maañge hei ki tum karo.

⁷Khusi se aapan maalik ke sewa karo, jeise ki ulog khud Prabhu hei, saadhaaran log nai.

⁸Tum janta hei ki koi bhi achchha kaam ke waaste tumme fal mili, chaahe tum gulaam hei ya ajaad hei.

⁹E maalik log, tum sab aapan naukar log ke ekke rakam aadar se dekhbhaal karo. Ulog ke ḍaraao dhamkaao nai. Ulog ke wahi swarag meñ maalik hei jon tumhaar hei, aur uske koi faivraṭs nai hei.

¹⁰Aakhri meñ, Prabhu ke mahaan sakti ke tumme majbuut banaay deo.

¹¹Parmeshwar jon hatiaar de hei u sab ke pahin leo, ki jisse tum apne aap ke saitaan ke chalaaki se bachaay sako.

¹²Ham log insaan se nai laṛta hei. Ham log u sakti aur adhikaar aur añdhera ke agua log aur aatmik dunia ke sakti se laṛaai karta hei.

¹³Yahi khaatir jon sab hatiaar Parmeshwar de hei, uske pahin leo. Tab jab u bura din aai, tab tum apne aap ke bachaay sakta hei. Aur jab laṛaai khalaas hoy jaai, tum majbuuti se khaṛa rahega.

¹⁴Taiyaar raho! Sach ke aapan kamar ke peṭi ke rakam rahan deo, aur Parmeshwar ke nyaay tumme hatiaar ke rakam bachaay deo.

¹⁵Tumhaar saanti ke baare meñ susamaachaar bataay ke ichchha, tumhaar goṛ ke juuta ke rakam rahi.

¹⁶Tumhaar biswaas ke ek sheelḍ ke rakam rahan deo, aur tum sab saitaan ke barte teer ke rok lega.

¹⁷Parmeshwar ke bachaay waala sakti ke ek helmaṭ ke rakam rahe deo, aur talwaar ke jagha Parmeshwar ke sandes jon Aatma se aay hei, iyuz karo.

¹⁸Kabhi preya kare ke nai chhoṛo, khaas kar ke dusra ke waaste. Hardam Aatma ke sakti se preya karo. Saaodhaan raho aur Parmeshwar ke log ke waaste preya karte raho.

¹⁹Preya karo ki hamme sandes bataay ke mili aur ham bina ḍar ke susamaachaar ke bhed ke samjhaay paayga.

²⁰Ham i kaam kare ke waaste bheja gay raha, aur wahi kaaran ham jel meñ hei. To preya karo ki ham bahaadur rahega aur weise bolega jeise hamme bole ke chaahi.

²¹Ham mañgta hei ki tum jaano ki ham keise hei aur ham kaa karta hei. Yahi kaaran ham Tukhikus ke tumhaar lage bhejta hei. U hamaar pyaara dost hei, aur Prabhu ke ek biswaasi sewak bhi hei. U tumme bataai ki ham keise hei, aur tumme hausla dei.

²³Ham preya karta hei ki Parmeshwar Pita aur Prabhu Yeeshu Maseeh sab chela log ke saanti, prem aur biswaas dei!

²⁴Parmeshwar sab pe daya kare hei jon hamaar Prabhu Yeeshu Maseeh se prem kare hei.