Read Hindi, Fiji Filippi 3 Bible Online

Filippi 3 - Hindi, Fiji bible

Filippi 3

¹Aakhri meñ, hamaar dost log, khusi raho ki tum sab Prabhu ke hei. Hamme kuchh matlab nai rakkhe hei ki ham tumme wahi likha jon ham pahile bhi likha raha. Kaahe ke, i tumhaar achchha ke waaste hei.

²Ulog se husiaar raho jon ke kutta ke rakam chaal hei! Ulog dushṭ hei aur maañge hei ki khatna se jaada tumhaar sañghe kuchh kare.

³Lekin ham log hee hei jon ke sachche ke khatna bhais hei, kaahe ke ham log Pawitr Aatma ke sakti se weship karta hei, aur Yeeshu Maseeh pe ghamanḍ karta hei. Ham log baṛhaay chaṛhaay ke baat nai karta jab ham kuchh bhi kara hei,

⁴jabki ham kare sakta hei. Aur sab aapan baṛaai kare sake hei, lekin hamaar lage aur log se jaada baṛaai kare ke kaaran hei.

⁵Jab ham aaṭh saal ke raha tab hamaar khatna bhais raha, aur ham Benjameen ke kul ke Israayel des se aaya hei. Ham ek sachcha Heebru hei. Ek Farisi hoy ke naate, ham Maozas ke kaanuun pe puura chalta hei.

⁶Hamme etna josh raha ki ham chech meñ trabal kara. Ham u sab kara jon kaanuun maañge hei ki ham kari ki jisse Parmeshwar ke khusi kare saki.

⁷Lekin Maseeh hamme dekhaais ki jon cheej ke ham keemti socha raha, uske koi daam nai hei.

⁸Kuchh bhi otna sundar nai hei jetna ki i jaane se ki hamaar Prabhu Yeeshu Maseeh hei. Ham aapan sab kuchh chhoṛ dia hei aur u sab kachra ke baraabar hei. Ham to khali Maseeh ke mañgta hei

⁹aur i jaane mañgta hei ki ham Maseeh ke hei. Maozas ke kaanuun maan ke hamme Parmeshwar nai apnaai. Parmeshwar hamme Maseeh meñ hamaar biswaas se apnaais.

¹⁰Khali ham Maseeh ke jaane mañgta hei aur u sakti ke jon uske jinda karis hei. Ham bhi mañgta hei ki dukh sahi aur uske rakam mari,

¹¹ki jisse ham bhi koi rakam se jinda hoy jaai.

¹²Abhi ham aapan gaul pe nai pahuñcha hei, aur ham pefekṭ nai hei. Lekin Maseeh hamme pakaṛ ke rakkhis hei. To ham dauṛte rahta hei aur inaam paay ke kosis karte rahta hei.

¹³Dosto, ham i nai mahsuus karta hei ki ham pahuñch aaya hei. Lekin jon kuchh pichchhe hei, uske ham bhulaay deta hei, aur jon cheej aage hei, uske waaste ham kosis karta hei.

¹⁴Ham gaul ke taraf dauṛta hei, ki jisse ham swarag meñ jaay waala inaam jeete saki. Yahi inaam Parmeshwar u kaam ke waaste dewe hei jon Krisṭ karis hei.

¹⁵Ham sab jon baṛa hei, ulog ke yahi rakam soche ke chaahi. Aur agar tum meñ se koi dusra rakam sochta hei, tab Parmeshwar tumme safa safa bataai.

¹⁶Lekin ham sab log ke wahi bagal jaate rahe ke hei, jon bagal ham abhi jaata hei.

¹⁷Dosto, ham mañgta hei ki tum wahi karo jon ham karta hei, aur dusra se wahi seekho aur u rasta pe chalo jon ulog tumhaar waaste rasta dekhaay hei.

¹⁸Ham tumme aage chetaaoni dia raha ki bahut log Krisṭ ke kros ke dusman hei. Ab ham aapan aañkhi meñ aañsu bhar ke tumme fir se chetaaoni deta hei

¹⁹ki ulog narak ke bagal jaay hei! Ulog aapan peṭ ke weship kare hei aur jon kharaab kaam kare hei, uske baare meñ baṛaai kare hei. Ulog khali dunia ke sab cheej ke baare meñ soche sake hei.

²⁰Lekin ham log swarag ke siṭizan hei aur becheini se aapan muktidaata ke aay ke agorta hei. Hamaar Prabhu Yeeshu Maseeh

²¹ke sab cheej pe sakti hei, aur u ham log ke i kamjor deñhi ke aapan rakam sundar banaay dei.