Read Hindi, Fiji Filippi 4 Bible Online

Filippi 4 - Hindi, Fiji bible

Filippi 4

¹Dosto, ham tumme pyaar karta hei aur tumme dekhe mañgta hei. Prabhu ke biswaas meñ laga raho. Tum hamaar khusi aur ghamanḍ hei.

²Iuodia aur Santuke, tum duuno Prabhu ke hei, to ham binti karta hei ek dusra se jhagṛa nai karo.

³Aur hamaar sachcha paaṭna, ham tum se binti karta hei ki tum u aurat log ke madat karo kaahe ke ulog hamaar aur Klemens ke sañghe, aur dusra log ke sañghe susamaachaar feilaay meñ kaam karin hei. Ulog ke naam ab jeewan ke buk meñ likhaay gais hei.

⁴Prabhu ke kaaran hardam khusi raho! Ham fir se bolega. Khusi raho.

⁵Hardam sab se naram raho. Prabhu jaldi hee hiañ aay jaai.

⁶Koi cheej ke chinta nai karo, lekin sab cheej ke waaste preya karo. Dhanbaad se aapan preya aur jon cheej mañgta hei, Parmeshwar ke aage rakkho.

⁷Jab ke tum Yeeshu Maseeh ke hei, Parmeshwar tumme saanti ke u aasheesh dei jon koi nai puura samjhe saki. Aur wahi saanti tumhaar soch aur keise mahsuus karta hei uspe kaabu kari.

⁸Aakhri meñ dosto, aapan dimaag wahi pe rakkho jon baat sachha, safa, pawitr, frenḍli aur sahi (ṭheek) hei. Kabhi bhi i soche ke band nai karo ki kon kaam kare laayk hei aur baṛaai kare ke laayk hei.

⁹Jon ṭeeching ham tumme dia raha, u tum janta hei, aur tum janta hei jon cheej tum ham se suna raha aur hamme karte dekha. To wahi karo jon ham kara raha. Aur Parmeshwar, jon saanti dewe hei, tumhaar sañghe rahi.

¹⁰Prabhu hamme khusi karis ki aakhri meñ tum hamaar baare meñ ek dafe fir socha. Asal meñ, tum hamaar baare meñ hardam sochta raha, lekin dekhaay ke waaste tumme mauka nai mila.

¹¹Ham komplain nai karta hei ki hamaar lage thoṛa hei. Ham seekh lia hei ki hamaar lage jon kuchh hei wahi se khusi raho.

¹²Ham jaane sakta hei ki gareeb ya bahut jaada hoy ke kaa matlab hei, aur ham i sab rakam se raha hei. Ham janta hei ki bhuuka ya jab peṭ bhara rahe hei, ya bahut jaada rahe hei ya bahut kamti rahe hei ke kaa matlab hei.

¹³Krisṭ hamme sakti de hei ki koi cheej ke saamna kare saki.

¹⁴I achchha raha ki tum hamme madat kara jab ham i sab dukh uṭhaaya.

¹⁵E Filippi ke dost log, tumme u ṭaaim yaad hoi, jab ham susamaachaar ke parchaar kare, Mesiḍonia aaya to tumme chhoṛ ke koi aur chech len-den kare ke waaste hamaar sañghe nai bhais raha.

¹⁶Jab ki ham Thisluneeka meñ raha, tum hamme bahut dafe madat kara.

¹⁷Ham tumhaar lage se kuchh le ke kosis nai karta hei, lekin ham mañgta hei tumme i aasheesh mile jon kuchh dewe se mile hei.

¹⁸Hamme sab kuchh lauṭ ke mil gais hei, byaaj (interest) ke sañghe. Ham u sab daan se bahut khusi hei, jon tum Ipfrudeemus ke sañghe bheja raha. U sab to meeṭha mahke waala daan ke rakam hei ya raaiṭ rakam ke daan hei jon Parmeshwar ke achchha lage hei.

¹⁹Ham preya karta hei ki Parmeshwar u sundar aasheesh jon Yeeshu Maseeh se aay hei usse tumhaar maañg ke, puura khayaal rakkhi!

²⁰Hamaar Parmeshwar aur Pita ke mahima sada sada rahe. Aameen.

²¹Hamaar namaste ulog ke dena jon Yeeshu Maseeh ke kaaran Parmeshwar ke log hei. Hiañ jon Prabhu ke biswaasi hei ulog tumme namaste bheje hei.

²²Parmeshwar ke sab log aapan aapan namaste bheje hei, khaas kar ke ulog ke jon ke Raaja ke sewa meñ hei.

²³Ham binti karta hei ki hamaar Prabhu Yeeshu Maseeh tum pe daya kari aur tumhaar jeewan ke aasheesh dei!