Read Hindi, Fiji Kolosia 1 Bible Online

Kolosia 1 - Hindi, Fiji bible

Kolosia 1

¹Pol, jon ke Parmeshwar chunis ki Yeeshu Maseeh ke prerit bane, aur Ṭimathi jon uske pichchhe chale waala hei, u log ke bagal se.

²Parmeshwar ke log ke lage jon Kolosia meñ rahe hei aur jon log faitful hei aur Krisṭ ke pichchhe chale waala log hei. Ham preya karta hei ki Parmeshwar hamaar Pita tum pe daya kari aur tumme saanti se aasheesh dei!

³Jab bhi ham tumhaar waaste preya karta hei, tab ham hamaar Prabhu Yeeshu Maseeh ke Pita, Parmeshwar ke dhanbaad deta hei.

⁴Ham, Krisṭ pe tumhaar biswaas aur Parmeshwar ke log pe tumhaar prem ke baare meñ suna hei,

⁵kaahe ke tum jon cheej pe aasha lagaaya hei, u tumhaar waaste swarag meñ saif rahi. Tum sab se pahile i aasha ke baare meñ suna raha, jab tum sachcha sandes, jon ki susamaachaar hei uspe biswaas kara raha.

⁶Susamaachaar, dunia bhar meñ baṛa kaamyaabi se feile hei. Wahi rakam se u pahila din se jab tum Parmeshwar ke sundar daya ke sachchaai ke baare meñ seekha raha, u tumhaar beech meñ bhi feila raha

⁷hamaar achchha dost Epafras se. U hamlog ke sañghe Krisṭ ke waaste kaam kare hei aur tum log ke waaste ek faitful kaam kare waala hei.

⁸Wahi hei jon hamlog ke u prem ke baare meñ bataais hei jon Parmeshwar ke Aatma tumme dees hei.

⁹Pahila din jab se hamlog tumhaar baare meñ suna hei, hamlog baraabar preya karta hei. Weise to ham hardam preya karta hei ki Parmeshwar tumme u sab cheej dekhaai jon u maañge hei ki tum karo ki jisse tumme sab buddhi aur samajh mil jaai jon Aatma de hei.

¹⁰Tab tumhaar lage u jeewan rahi jon Prabhu ke aadar kare hei, aur tum hardam aapan achchha kaam se uske khusi rakkhega. Tum Parmeshwar ke aur achchha se jaan lega.

¹¹Uske shaandaar sakti tum log ke dheeraj dei aur tumme etna taagatwaala banaai ki tum sab cheej sahe sakega, aur tab tum sachche meñ bahut khusi hoyga.

¹²Ham preya karta hei ki tum Parmeshwar se graiṭful rahega kaahe ke u tumme usman bhaag lewe dees hei jon u jyoti ke raaj meñ aapan log se waada karis raha.

¹³Parmeshwar hamlog ke Saitaan ke añdhiyaar sakti se bachaais aur hamlog ke aapan pyaara laṛka ke raaj meñ le aais,

¹⁴jon hamlog ke paap ke maafi de hei aur hamlog ke chhuṭkaara de hei.

¹⁵Maseeh ekdam Parmeshwar ke rakam hei, jon dekhaay nai hei. U pahila peida bhay laṛka hei, sab cheej jon banaawa gay hei, u sab se uchcha hei.

¹⁶Sab cheej wahi ke dwaara racha gais raha, Swarag meñ sab cheej aur dharti pe bhi, sab cheej jon dekha jaay sake hei aur jon nai dekha jaay sake hei, jetna sakti (forces) hei u sab wahi meñ hei aur sab sakti, aur sab agua log aur adhikaari log. Sab cheej Parmeshwar ke laṛka banaais raha, aur sab cheej wahi ke waaste bana raha.

¹⁷Parmeshwar ke laṛka sab se aage raha, aur wahi se sab cheej ekke meñ bañdha hei.

¹⁸U aapan boḍi, jon chech hei uske heḍ hei. U suruwaat hei, aur sab se pahila raha jiske mara meñ se jinda kara gay raha, ki jisse u aur sab se uppar rahe saki.

¹⁹Aapan laṛka meñ puura rahe se Parmeshwar apne khusi raha.

²⁰Aur Parmeshwar khusi raha ki kros pe aapan khuun ke balidaan deke, u saanti rakkhe hei, ki jisse swarag ke sab jantu aur dharti ke log bhi Parmeshwar ke lage lauṭaay laawa jaai.

²¹Tum Parmeshwar se bahut duur raha. Tumhaar bichaar se tumme uske dusman banaay dees, aur tum bura kaam karat raha.

²²Lekin uske laṛka insaan bana aur mar gais. Yahi kaaran Parmeshwar tum se samjhaota kar lees, aur ab u tumme aapan saamne khaṛa hoy de hei, u rakam jon log pawitr rahe hei aur galti nai kare hei aur bhola bhaala hei.

²³Lekin tum aapan biswaas ke jaṛ nai hilan dena. Tum u aasha nai chhoṛ dena jon tumme tab mila raha jab tum susamaachaar suna raha. I to dunia ke sab log ke waaste parchaar kara gay raha, aur ham apne i sandes ke daas ban gaya hei.

²⁴Hamme khusi hei ki ham tumhaar khaatir sahe sakta hei. Ham aur bhi khusi hei ki ham aapan deñhi meñ Maseeh ke boḍi jon ki chech hei, uske waaste sahte rahega.

²⁵Parmeshwar ke plen raha ki u hamme aapan chech ke sewak banaay aur hamme tum log ke lage puura sandes ke parchaar kare ke waaste bheje.

²⁶Saalo saal i sandes sab se lukwaay ke rakkha gay raha, lekin ab iske Parmeshwar ke log ke samjhaawa gay hei.

²⁷Parmeshwar eise i waaste karis raha ki u maañge hei ki i sundar aur mahaan bhed ke tum sab geir Yahuudi samjho. Aur bhed i hei ki Maseeh tum meñ rahe hei, aur wahi Parmeshwar ke mahima baaṭe meñ tum log ke aasha hei.

²⁸Ham Maseeh ke baare meñ vachan sunaata hei, aur hamlog aapan sab buddhi iyuz karta hei ki sab ke chetaaoni dei aur sikhaai, ki jisse Maseeh ke log baṛhe aur baṛa (mature) hoy jaay.

²⁹Yahi khaatir ham etna mehnat karta hei aur u sab sakti iyuz karta hei jon u hamme dewe hei.