Read Hindi, Fiji Kolosia 2 Bible Online

Kolosia 2 - Hindi, Fiji bible

Kolosia 2

¹Ham mañgta hei ki tum jaano ki tumhaar waaste ham ketna dukh se gujarta hei, Laodeekia ke sab Parmeshwar ke log ke waaste, aur u sab biswaasi log ke waaste jon ham se kabhi nai milin hei.

²Ham ulog ke hausla baṛhaay ke waaste i karta hei. Tab jeise ulog ke dil ek sañghe prem meñ bañdh jaay hei, ulog ke puura samajh ke sundar aasheesh mili. Aur ulog sachmuch ke Krisṭ ke jaan lei. U khali Parmeshwar ke bhed ke chaabhi nai hei,

³lekin usman sab buddhi aur gyaan chhipa hei.

⁴Ham i sab baat tumme i kaaran bataata hei ki tum, log ke chikni chupṛi baat se bahak (fool) nai jaana.

⁵Jabki ham tumhaar sañghe nai hei, fir bhi ham tumhaar baare meñ sochte rahta hei. Hamme i jaan ke khusi hei ki tum wahi rakam rahta hei jeise tumme rahe ke chaahi aur Maseeh meñ tumhaar biswaas bahut majbuut hei.

⁶Tum Yeeshu Maseeh ke aapan Prabhu maan lia hei. Ab uske pichchhe chalte raho.

⁷Maseeh meñ aapan jaṛ jamaay leo aur wahi ke aapan jeewan ke faaunḍeishan banaay leo. Aapan biswaas meñ majbuut raho, jeise tumme sikhaawa gais raha. Aur graiṭful raho.

⁸Koi ke jhuuṭa baat se tum apne aap ke bahkaay nai deo. I baat saait sune meñ achchha lage, lekin i sab khali insaan ke ṭeeching hei. U sab i sansaar ke sakti se aawe hei aur Maseeh ke bagal se nai.

⁹Parmeshwar, Maseeh meñ puura rahe hei.

¹⁰Aur tum puura baṛa hoy gaya hei, kaahe ke tum Maseeh ke hei, jon sab ke sakti aur adhikaar ke uppar hei.

¹¹Maseeh tum meñ se u sab selfish desires nikaar lees hei ṭheek wahi rakam jeise khatna hoy se deñhi ke maas nikaar dewa jaay hei.

¹²Aur jab tum beptaaiz bhay raha, tab u wahi rakam raha jeise Maseeh ke sañghe gaaṛa gaya hei. Tab tum jinda kara gaya, kaahe ke tum meñ Parmeshwar ke sakti ke biswaas raha, jon Maseeh ke, maut se jinda karis.

¹³Tum mar gay raha, kaahe ke tum paapi raha aur Parmeshwar ke log nai raha. Lekin Parmeshwar, Krisṭ ke, tum log ke jinda karan dees, jab u hamlog ke sab paap ke maafi kar dees.

¹⁴Maozas ke kaanuun nai maane ke kaaran hamlog ke agaiñsṭ jon saja raha, Parmeshwar u sab ke miṭaay dees. U sab ke le jaay ke kros pe nail kar dees.

¹⁵Wahi pe Maseeh sab sakti aur forsas ke haraay dees. U puura dunia ke dekhe dees, ki keise u sab priznas ke rakam le jaawa jaat raha, jab ki u aapan jeet manaais.

¹⁶Koi ke tumme bataay nai deo ki tumme kaa khaay ke hei ya kaa piye ke hei. Ulog ke tumme nai bataay deo ki tumme nawa chaañd ke teohaar, ya sabat, ya koi aur ek teohaar manaay ke hei.

¹⁷I sab cheej to jon aay waala hei uske khali ek parchhaaiñ hei. Lekin Maseeh asli hei.

¹⁸Ulog se dhoka nai khaay lena, jon hambal bane ke dekhaawa kare hei aur jon ainjals ke weship kare hei. Ulog vision dekhe ke baare meñ ghamanḍ kare hei. Lekin i sab bakwaas hei, kaahe ke u log ke dimaag selfish desires se bhara hei.

¹⁹Ulog ab Maseeh, jon puura boḍi ke heḍ hei, uske koi bhaag nai rahin. Maseeh wahi boḍi ke taagat dewe hei, aur haḍḍi aur maas se uske ek sañghe baañdh ke rakkhe hei, jeise u Parmeshwar ke sakti se baṛhe hei.

²⁰Tum Maseeh ke sañghe mar gay raha. Ab sab jahaan (universe) ke forsas ke sakti tumhaar uppar nai hei. Kaahe ke tum eise rahta hei ki tumme u sab ruuls maane ke hei? Jeise ki,

²¹“Iske haath nai lagaao. Uske ṭaisṭ nai karo. Iske nai chhuo.”

²²I sab cheej jab iyuz hoy jaay hei, tab i sab koi kaam ke nai rahe jaay hei. Tab kaahe ke jon ruuls insaan banaais hei, uske waaste chinta karta hei?

²³I sab ruuls ke maane ke saait dekhe meñ achchha lagat hoi. Dekhe meñ i sab tumme Parmeshwar se aur prem karaay hei aur tumme bahut hambal banaay de hei, aur tumhaar boḍi bas meñ rahe hei. Lekin i sab se, hamlog ke chaahat ke uppar koi sakti nai rahe hei.