Read Hindi, Fiji Kolosia 4 Bible Online

Kolosia 4 - Hindi, Fiji bible

Kolosia 4

¹E maalik log, aapan gulaam ke sañghe feya aur onest raho. I nai bhulna ki tumhaar uppar bhi swarag meñ ek Maalik hei.

²Kabhi bhi preya kare ke nai chhoṛo. Aur jab tum preya karo, tab dhyaan (alert) rakhna aur dhanbaad deo.

³Preya kare ke yaad rakhna ki Parmeshwar hamlog ke waaste rasta banaai, ki keise uske vachan ke ham feilaay sakega aur Maseeh ke bhed ke samjhaay sakega, jabki yahi kare ke kaaran ham jel meñ hei.

⁴Plees preya karna ki ham u vachan ke jetna hoy saki otna sahaj kar dei.

⁵Jab tum abiswaasi ke saathe hei, tab hardam ṭaaim ke achchha se iyuz karo.

⁶Hardam aanand meñ rahna aur jab bhi sandes dena, yaad rakhna ki kon cheej hei jon meñ ulog inṭarasṭ rakkhe hei. Aapan ek ek baat achchha se soch ke chunna aur agar koi bhi sawaal puuchhi to jawaab dewe ke khaatir taiyaar rahna.

⁷Tukhikus hamaar achchha dost hei, jon Prabhu ke dil se kaam aur sewa kare hei, aur wahi tumme hamaar baare meñ sandesa dei.

⁸Ham uske bhejta hei ki u tum sab ke i bataay ke dil khusi kari ki ham sab hiañ keise rahta hei.

⁹Unesimus, jon tumhaar grup ke hei, aur bahut pyaara aur biswaas kare waala jan hei, u bhi uske saathe aay hei. I duuno tumme sab kuchh bataai jon hiañ pe bhais raha.

¹⁰Aristkhus, hamaar saathe jel meñ hei, aur Maak jon Baranbaas ke bhaiya lagat raha, u sab tum log ke namaste bheje hei. Tumme pahile se bataay dewa gay raha ki agar Maak huañ aai, to uske welkam karna.

¹¹Yeeshu, jon Yustus ke naam se jaana jaay hei, u bhi aapan namaste bheje hei. I teen admi hee Yahuudi log meñ se hamaar saathe Parmeshwar ke raaj ke waaste kaam karin raha. I log hamme bahut sukh deen raha.

¹²Ipfraas, jon tum meñ se ek raha, jon Krisṭ Yeeshu ke sewa karis raha, aapan namaste bheje hei. U hardam kas ke preya kare hei ki tum sab puura jaane sako ki Prabhu kon cheej maañge hei ki tum karo aur tum uske puura karo.

¹³Ham dekha ki Laodeekia aur Hiyaraapulis ke biswaasi log, tumhaar waaste ketna museebat uṭhaais raha.

¹⁴Luuka, hamlog ke pyaara ḍokṭa, aur Demaas bhi aapan namaste bheje hei.

¹⁵Hamaar namaste Laodeekia ke biswaasi log ke de dena, khaas karke Numfaas aur u chech ke jon uske ghar meñ mile hei.

¹⁶Jab i chiṭṭhi aapan log ke paṛh ke sunaay dena, tab dekhna ki Laodeekia ke chech ke log ke bhi paṛh ke sunaawa jaay hei. Aur hamaar u chiṭṭhi jon ham ulog ke waaste bheja hei, uske bhi paṛh lena.

¹⁷Arkhippus ke yaad karaana ki jon kaam Prabhu uske kare ke dees hei uske karna.

¹⁸Ham, apne aap i chiṭṭhi ke saain karta hei: POL I nai bhulna ki ham jel meñ hei. Ham preya karta hei ki Parmeshwar tum pe daya kari.