Read Hindi, Fiji 1 Thisluneeka 2 Bible Online

1 Thisluneeka 2 - Hindi, Fiji bible

1 Thisluneeka 2

¹Hamaar dost log, tum to janta hei ki hamaar ṭaaim tumhaar sañghe barbaad nai bhais raha.

²Tum yaad karo, hamlog ke Filippi meñ beijjati kara gay raha aur dukh dewa gay raha. Lekin Parmeshwar hamme himmat dees raha ki ham uske baare meñ museebat rahte tum log ke achchha khabar bataai.

³Ham log ke koi chhipa iraada nai raha, jab ham log ke jeet tum se bhais raha, aur hamlog koi ke sañghe chhal bhi nai kara aur koi ke beokuuf bhi nai banaaya.

⁴Parmeshwar khusi se aapan sandes hamlog ke hawaale kar ke aapan bharosa ham pe dekhaais. Ham log Parmeshwar ke chhoṛ ke koi aur ke khusi kare ke waaste baat nai kara, kaahe ke u hamlog ke iraada jaane hei.

⁵Tum to i bhi janta hei ki hamlog koi ke taulta nai hei. Parmeshwar apne jaane hei ki jon cheej ham kara, u laalach ke chhupaay ke waaste nai raha.

⁶Ham log tumme ya aur koi ke nai bolta hei ki hamaar baṛaai karo.

⁷Lekin ek prerit hoy ke naate, ham log tum se madat ke maañg kare sakta raha. Kaahe ke Maseeh hee hamme hiañ bhejis hei. Ham log ek bachcha ya u maañ jon aapan bachcha ke dekh bhaal kare hei, uske rakam raha.

⁸Ham log tumhaar ketna khayaal rakkha, aur tum hamlog ke waaste etna pyaara hoy gaya, ki hamlog tumhaar waaste aapan jaan bhi khusi se dewe sakta raha, jab ham tumme Parmeshwar ke sandes dia raha.

⁹Hamaar dost log, ham sochta hei ki tumme yaad hoi, u dukh aur kaṛa mehnat. Tumme yaad hoi ki keise ham raat aur din mehnat kar ke aapan gujaara karat raha, ki jisse ham koi pe bojha nai bani aur Parmeshwar ke sandes tumme sunaai.

¹⁰Parmeshwar aur tum duuno hamaar gawaahi hei ki Prabhu ke log ke waaste hamlog pawitrta aur sachchaai aur bina dos se tum log ke sañghe byohaar karta raha.

¹¹Tum i bhi janta hei ki ham log tumhaar waaste u sab kara jon ek maañ-baap aapan laṛkan ke waaste kari.

¹²Ham log chirauri kara, hausla baṛhaaya, aur tum sab ke samjhaata raha ki u rakam raho jon Parmeshwar ke mahima laai. Wahi hei jon tumme aapan raaj aur mahima meñ bhaag lewe ke waaste chunis raha.

¹³Ham log hardam Parmeshwar ke dhanbaad deta hei kaahe ke jon sandes ham tumme dia tum uspe biswaas kara. U wahi se aais raha, aur kuchh eisan cheej nai hei jiske manush banaais hei. Tum uske Parmeshwar ke sandes maan ke apnaaya, aur ab u tum meñ kaam kare hei.

¹⁴Hamaar dost log, tum log wahi rakam kara jeise Juḍia ke chech meñ bhais raha aur jeise Yeeshu Maseeh ke log huañ karat rahin. Aur bhi, tum sab ke tumhaar aapan log sataain, wahi rakam jeise ulog ke sataawa gay raha.

¹⁵U Yahuudi log Prabhu Yeeshu aur nabi log ke maar deen, aur ham log ke bhi khader deen. Parmeshwar aur baaki log nai laaik kare hei, u log jon cheej kare hei.

¹⁶Ulog nai maañge hei ki ham log tumhaar sandes geir Yahuudi ke sunaai, aur ulog ke bache ke rasta dekhaai. Yahuudi log aapan paap ke sañghe bahut duur chala gain hei. Ab Parmeshwar ulog se gussa hoy gay hei, aur ulog ke paap ke saja dei.

¹⁷Hamaar dost log, tumhaar lage aay ke waaste ham log ke kuchh ṭaaim ke waaste roka gais raha, lekin hamlog hardam tumhaar baare meñ sochta raha. Ham log tumme bahut dekhe mañgta raha aur bahut kosis bhi kara ki ham log aay ke tum se mili.

¹⁸Ham log sachche ke aay mañgta raha. Ham apne bahut dafe kosis kara, lekin Saitaan hardam hamlog ke rok lees.

¹⁹Bhale jab Prabhu Yeeshu aai, to tumme chhoṛ ke aur kon ham log ke aasha aur khusi dei, aur ham log ke waaste ek mahaan taaj rahi?

²⁰Tum akele hee ham log ke taaj aur khusi hei!