Read Hindi, Fiji 1 Thisluneeka 3 Bible Online

1 Thisluneeka 3 - Hindi, Fiji bible

1 Thisluneeka 3

¹Aakhri meñ, ham log aur nai sahe saka. Ham log tay kara ki Athens meñ ham log akele rahe jaai

²aur aapan dost Ṭimathi ke tumhaar lage bheji. U ham log ke sañghe Parmeshwar ke sewak ke rakam kaam kare hei aur Maseeh ke baare meñ susamaachaar parchaar kare hei. Ham log mañgta raha ki u tum log ke biswaas meñ majbuut banaay aur tum log ke hausla baṛhaay.

³Ham log nai mañgta ki tum meñ se koi i museebat se niraas hoy jaay. Tum to janta raha ki ham log ke sahe ke hei,

⁴kaahe ke jab ham log tumhaar sañghe raha, tab ham log tumme bataay dia raha ki eise hoi. Aur ham log jaruur saha, jeise ki tum log jaana hei.

⁵Aur jab ham aur nai ruke saka, tab ham Ṭimathi ke bheja ki tumhaar biswaas ke baare meñ pata lagaay. Ham aasha karta raha ki Saitaan tumme bahkaay nai le ki jisse hamaar sab kaam bekaar hoy jaay.

⁶Ṭimathi, tumhaar lage se lauṭ ke aay gais hei aur tumhaar biswaas aur prem ke baare meñ ham log ke sab kuchh bataay dees hei. U i bhi bataais hei ki tum log hardam ham log ke khusi se yaad karta hei aur tum log ham log ke otna hee mile mañgta hei jetna ki ham log tumme dekhe mañgta hei.

⁷Hamaar dost log, ham log ke uppar bahut se dukh aur museebat hei, fir bhi tumhaar biswaas se ham log ke saanti mila hei.

⁸Tumhaar Prabhu meñ majbuut biswaas, ek nawa jeewan ke rakam hei.

⁹Ham keise Parmeshwar ke dhanbaad dewe sakta hei, u sab khusi ke waaste jon tum ham log ke dia hei?

¹⁰Raat aur din ham man laagaay ke preya karte rahta hei ki ham log fir tumme dekhe sakega aur madat karega ki tumhaar biswaas aur majbuut hoy jaay.

¹¹Ham log preya karta hei ki hamaar Pita Parmeshwar aur Prabhu Yeeshu, tum log ke lage aawe ke hamme rasta dekhaai.

¹²Aur Prabhu eise kare ki tumhaar prem jon ek dusra aur sab ke waaste hei, khuub baṛhe. Wahi rakam jeise hamaar prem tumhaar waaste baṛha hei.

¹³Aur jab hamaar Prabhu aapan sab log ke saathe aai, ham preya karta hei ki u tumhaar dil ke, hamaar Pita Parmeshwar ke aage pawitr aur bina dos ke dekhaay.