Read Hindi, Fiji 1 Thisluneeka 4 Bible Online

1 Thisluneeka 4 - Hindi, Fiji bible

1 Thisluneeka 4

¹Aakhri meñ, hamaar pyaara dost log, jab tum Prabhu Yeeshu ke hoy gaya hei, to ham log binti karta hei aur samjhaata hei ki wahi rakam raho jeise ham log tumme sikhaaya hei. Tab tum Parmeshwar ke khusi karega. Tum abhi wahi rakam rahta hei, lekin aur jaada kosis karo.

²Prabhu Yeeshu ke log hoy ke naate ham log tumme kuchh aagya dia raha, uske yaad rakhna.

³Parmeshwar maañge hei ki tum pawitr raho, yahi kaaran byabhichaar aur neech kaam se bacha raho.

⁴Aapan patni ke aadar aur ijjat karo.

⁵Aapan chaahat ke gulaam nai ban jaao ya ulog ke rakam rahe lago jon Parmeshwar ke nai jaane hei.

⁶Seks ke maamla meñ, koi Prabhu ke log ke dhoka nai dena. Yaad rakhna, ham log tumme chetaaoni de dia hei ki Prabhu sab ke saja de hei jon eisan kaam kare hei.

⁷Parmeshwar tumme i kaaran nai chunis ki tum ganda bano, lekin pawitr bane ke waaste chunis.

⁸Yahi khaatir agar tum i sab ruuls ke nai maanega, tab tum khali ham log ke agaiñsṭ nai balki Parmeshwar ke agaiñsṭ jaata hei jon tumme Pawitr Aatma dees hei.

⁹Ab ek dusra se prem ke baare meñ i jaruuri nai hei ki ham tumme likh ke bataai, kaahe ke i sab tumme Parmeshwar kare ke sikhaais hei,

¹⁰aur tum aapan prem Mesiḍonia ke sab log ke dekhaay dia hei. Lekin, hamaar dost log, ham log tum se bolta hei ki tumme aur kare ke paṛi.

¹¹Kosis karo ki saanti se raho, khali aapan kaam se kaam rakkho, aur mehnat karo, wahi rakam jeise ham tumme kare ke sikhaay raha.

¹²Tab u log jon Prabhu ke nai hei, tumhaar aadar kari, aur tab tumme dusra pe aasra nai kare ke rahi.

¹³Hamaar dost log, ham mañgta hei ki tum samjho ki ulog ke waaste keise rahi jon biswaasi mar gais hei. Tab tum ulog ke shok nai manaayga, aur ulog ke rakam rahega, jon ke koi aasra nai hei.

¹⁴Ham log biswaas karta hei ki Yeeshu mar gais raha aur fir jinda kara gais raha. Ham log i bhi biswaas karta hei ki jab Parmeshwar, Yeeshu ke fir se laai, tab u uske sañghe u sab log ke bhi laai, jon mare se pahile Yeeshu pe biswaas karat rahin.

¹⁵Hamaar Prabhu Yeeshu ham log ke bataais, ki jab u aai, tab ham log mara log se pahile uske mile nai jaayga.

¹⁶Ek baṛa komaañḍ se aur sab se baṛa ainjal ke pukaar aur Parmeshwar ke bigul (trumpet) ke awaaj ke sañghe swarag se Prabhu lauṭi. Tab jon sab Maseeh meñ mar gain hei, ulog pahile jinda hoy jaai.

¹⁷Tab, ham sab log jon abhi jinda hei, uske sañghe baadar pe se hoy ke asmaan meñ Prabhu se mile jaayga. U ṭaaim se, ham log Prabhu ke sañghe hardam ke waaste rahe jaayga.

¹⁸Ek dusra se yahi sab baat se hausla baṛhaawa karo.