Read Hindi, Fiji 1 Thisluneeka 5 Bible Online

1 Thisluneeka 5 - Hindi, Fiji bible

1 Thisluneeka 5

¹Iske jaruurat nai hei ki ham ṭaaim aur taarik likhi ki i sab kab hoi.

²Tum to achchha se janta hei ki jeise raat meñ chor aay hei, weisaiyeñ Prabhu ke din bhi aai.

³Log sochi ki sab kuchh ṭheek ṭhaak hei. Lekin barbaadi achaanak aai ṭheek wahi rakam jeise ek maañ ke bachcha hoy ke ṭaaim peeṛa hoy hei. Aur ulog nai bachi.

⁴Hamaar pyaara dost log, tum log añdhera meñ nai rahta hei, ki u roj tum log ke ek chor ke rakam nai sepraaiz kari.

⁵Tum log roshni ke hei aur din meñ rahta hei. Ham log raat meñ nai rahta hei aur añdhera ke nai hei.

⁶Baaki log saait soy jaai, lekin ham log ke jagte rahe ke hei aur saaodhaan rahe ke hei.

⁷Log raat meñ sowe hei, aur koi koi to nasa bhi kar lewe hei.

⁸Lekin ham log din ke hei. Yahi kaaran ham log ke hosh meñ rahe ke hei aur biswaas aur prem ke aapan kawach (armour) ke rakam banaay ke hei. Aur helmaṭ meñ ham log ke majbuut aasha hei ki ham bach jaayga.

⁹Parmeshwar ham log ke saja nai dewe maañge hei, lekin maañge hei ki Prabhu Yeeshu Maseeh ham log ke bachaai.

¹⁰Maseeh ham log ke waaste mara, ki jisse ham log uske sañghe rahe saki, chaahe ham jinda rahi ya mar jaai, jab u lauṭ ke aai.

¹¹Yahi kaaran tum ek dusra ke hausla baṛhaate raho aur madat karte raho, jeise ki tum abhi karta hei.

¹²Hamaar dost log, ham log binti karta hei ki tum aapan agua log ke baare meñ socho, jon tumhaar khaatir mehnat kare hei aur tumme bataay hei ki keise Prabhu ke waaste raha jaay hei.

¹³Ulog ke kaam ke khaatir ulog ke aadar aur prem dekhaao. Kosis karo ki ek dusra ke sañghe achchha se raho.

¹⁴Hamaar dost log, ham tum se binti karta hei ki agar koi achchha se nai rahe hei to ulog ke chetaaoni deo. Agar koi chhuuṭ gais hei to ulog ke hausla baṛhaao, jon kamjor hei, ulog ke madat karo, aur sab ke saathe dheeraj se kaam leo.

¹⁵Agar koi tumhaar saathe buraai karis hei to usse kharaab byohaar nai karna, balki ek dusra aur sab ke sañghe achchha se rahna.

¹⁶Hardam khusi se raho

¹⁷aur preya kare ke band nai karo.

¹⁸Chaahe kuchh bhi hoy, Yeeshu Maseeh ke khaatir Parmeshwar ke dhanbaad dete raho. Yahi hei jon Parmeshwar maañge hei ki tum karo.

¹⁹Parmeshwar ke Aatma ke nai butaao

²⁰ya bhawishvaani ke ṭaalo nai.

²¹Sab cheej ke tesṭ karo. Jon cheej achchha hei, uske apnaao

²²aur buraai ke saathe kuchh waasta nai rakkho.

²³Ham binti karta hei ki Parmeshwar jon saanti dewe hei, tumme puura pawitr banaay dei. Aur tumhaar aatma, jiu aur deñhi tagṛa aur bina buraai ke rahe, jabtak hamaar Prabhu Yeeshu Maseeh lauṭ ke nai aay hei.

²⁴Jon tumme chunis raha, uspe tum puura bharosa kare sakta hei, aur u i sab kari.

²⁵Dost log, ham log ke khaatir preya karna.

²⁶Prabhu ke log ke prem bhara namaste dena.

²⁷Prabhu ke naam pe ham tum se binti karta hei ki i chiṭṭhi sab biswaasi log ke sunaay dena.

²⁸Hamaar Prabhu Yeeshu ke anugrah tum sab ke sañghe rahe.