Read Hindi, Fiji 2 Thisluneeka 1 Bible Online

2 Thisluneeka 1 - Hindi, Fiji bible

2 Thisluneeka 1

¹Pol aur Saaylas aur Ṭimathi ke bagal se, Thisluneeka ke chech ke, jon hamaar Pita Parmeshwar aur Prabhu Yeeshu Maseeh meñ hei.

²Ham preya karta hei ki hamaar Pita Parmeshwar aur Prabhu Yeeshu Maseeh tum pe daya kari aur tumme saanti ke aasheesh dei!

³Hamaar dost log, ham log ke lage hardam kuchh achchha raha ki ham tumhaar waaste Parmeshwar ke dhanbaad dei, kaahe ke Parmeshwar meñ tumhaar biswaas, aur ek dusra ke waaste tumhaar prem hardam baṛhte gais.

⁴Yahi kaaran ham Parmeshwar ke chech ke baare meñ baṛh chaṛh ke baat karta hei. Ham log ulog ke bataata hei ki tumhaar lage ketna dheeraj hei, aur tum biswaas rakhta hei, hiañ tak ki jab tum ketna dukh aur museebat ke saamna karte rahta hei.

⁵I sab yahi dekhaay hei ki Parmeshwar keise nyaay kare hei aur u tumme u laayk banaay hei ki tum uske raaj meñ sheya karo jiske waaste tum etna saha.

⁶Parmeshwar ke waaste i raaiṭ hei ki jon tumme sataay hei, uske saja de,

⁷lekin u tumme tumhaar dukh se mukti dei. U ham log ke waaste bhi wahi kari, jab Prabhu Yeeshu swarag se aapan shaktishaali ainjals,

⁸aur aagi ke flaims ke sañghe aai. Hamaar Prabhu Yeeshu sab ke saja dei jon Parmeshwar ke nai jaane hei aur uske sandes ke nai maane hei.

⁹Ulog ke saja anant naas rahi, aur ulog ham log ke Prabhu aur uske mahaan sakti se duur rakkha jaai.

¹⁰I sab u roj hoi jab hamaar Prabhu lauṭi, aur uske aapan log jon uspe biswaas rakkhe hei, uske baṛaai aur aadar kari. Isman tum shaamil hei, kaahe ke tum u sab pe biswaas kara jon ham bola raha.

¹¹Parmeshwar tumme chunis, aur ham log preya karte raha ki Parmeshwar tumme aapan log banaay ke kaabil banaai. Ham log Parmeshwar ke sakti ke waaste preya karta hei jon tumme sab achchha kaam kare meñ madat kari jon tum kare mañgta hei aur tumhaar biswaas tumme karan dei.

¹²Tab, jab ki Parmeshwar aur hamaar Prabhu Yeeshu Maseeh etna dayaalu hei, tum Prabhu Yeeshu ke naam pe mahima laayga, aur u tum pe.