Read Hindi, Fiji 2 Thisluneeka 3 Bible Online

2 Thisluneeka 3 - Hindi, Fiji bible

2 Thisluneeka 3

¹Aakhri meñ, hamaar dost log, kirpa kar ke ham log ke waaste preya karo. I Prabhu ke sandes jaldi feilaay meñ madat kari, aur dusra log aadar kari, jeise tum sab karta hei.

²I bhi preya karo ki ham bekaar aur bura log se bacha rahega. Jeise ki, sab ke lage biswaas nai rahe hei.

³Lekin Prabhu pe bharosa kara jaay sake hei ki u tumme majbuut banaai aur sab buraai se bachaay rahi.

⁴U ham log ke ekdam shua karis hei ki tum log u sab ke maanta hei jon ham tumme sikhaaya hei aur uspe chalta hei.

⁵Ham preya karta hei ki Prabhu tumme rasta dekhaai ki keise tum Parmeshwar ke rakam prem kare sakta hei aur Krisṭ ke rakam dheeraj rakkhe sakta hei.

⁶Hamaar dost log, Prabhu Yeeshu ke naam se, ham binti karta hei ki tum ulog ke saathe kuchh waasta nai rakkho jon gunḍa gardi kare hei aur u aagya ke nai maane hei jon ham tumme dia hei.

⁷Tum to khud hee janta hei ki tumme hamlog ke rasta pe chale ke hei. Ham log gunḍa gardi meñ aapan ṭaaim barbaad nai kara,

⁸aur hamlog koi se khaana paani bina peisa dewe nai lia. Ham log tum meñ se koi ke uppar bojha nai bane mañgta raha aur ham log raat aur din otna mehnat kara jetna kare sakta raha.

⁹Ham log ke bhi hak raha ki ham kaam nai kari, lekin ham log tumhaar waaste ek ekzaampal bane mañgta raha.

¹⁰Ham log tumme ek ruul bhi dia, ki agar tum kaam nai karta hei to tum khaayga bhi nai.

¹¹Ab ham dekha ki tum meñ se kuchh log khali gunḍa gardi karta hei aur kuchh kaam nai karta, siwaay dusra ke kaam meñ ṭaañg aṛaay ke.

¹²To, Prabhu Yeeshu Maseeh ke waaste, ham log ilog se bolta aur binti karta hei ki ilog apne aap ke seṭal kar le aur aapan roji roṭi ke waaste kaam kare ke suru kar le.

¹³Hamaar dost log, tum raaiṭ kaam kare ke waaste kabhi bhi nai thakna.

¹⁴Agar koi hamaar i chiṭṭhi ke baat ke nai maani to u admi se husiaar rahna. Ulog ke sañgat nai karna ki jisse ulog sarmaay jaay.

¹⁵Ulog ke aapan dusman nai samajhna, lekin naram se ulog se baat karo jeise tum koi ek Prabhu ke jan se baat karta hei.

¹⁶Ham preya karta hei ki Prabhu, jon saanti de hei, tum sab ke hardam saanti se aasheesh dei. Prabhu tum sab ke saathe rahe.

¹⁷Ham hardam aapan chiṭṭhi apne saain karta hei: POL

¹⁸Ham preya karta hei ki Hamaar Prabhu Yeeshu tum sab pe daya kari.