Read Hindi, Fiji 1 Ṭimathi 2 Bible Online

1 Ṭimathi 2 - Hindi, Fiji bible

1 Ṭimathi 2

¹Sab se pahile, ham mañgta hei ki tum sab ke waaste preya karo. Parmeshwar se maañgo ki u sab ke madat kare aur aasheesh dewe, aur Parmeshwar se bataao ki ek ek ke waaste tum ketna dhanbaad deta hei.

²Raaja aur baaki agua log ke waaste preya karo, ki jisse ham log sukh aur saanti se rahe saki jab ham sab Parmeshwar ke aadar aur weship karta hei.

³I rakam ke preya achchha hei, aur i Parmeshwar ham log ke muktidaata ke khusi rakkhe hei.

⁴Parmeshwar maañge hei ki sab koi bach jaay aur puura sachchaai jaane, jon ki i hei,

⁵Khali ek Parmeshwar hei. aur Yeeshu Maseeh hee u hei jon ham log ke Parmeshwar ke lage laay sake hei. Maseeh sachmuch ke manush raha, aur u apne aap ke de dees ki u ham log sab ke bachaay sake.

⁶Parmeshwar i sab ham log ke raaiṭ ṭaaim pe dekhaais.

⁷Yahi kaaran Parmeshwar hamme chunis ki ham susamaachaar ke ek parchaarak aur prerit bani. Ham sachche bolta hei. Ham jhuuṭ nai bolta hei. Parmeshwar hamme bhejis ki ham geir Yahuudi log ke biswaas aur sachchaai ke baare meñ sikhaai.

⁸Ham mañgta hei ki sab koi jahañ bhi hei, aapan pawitr haath ke swarag ke bagal uṭhaay ke, bina gussa kare ya bina ek dusra se jhagṛa kare, preya karo.

⁹Ham mañgta hei ki aurat log achchha aur ijjat se kapṛa pahine. Ulog fensi se baar nai jhaaṛe, ya mahañga kapṛa nai pahine, ya sona aur moti ke gahna nai pahine.

¹⁰Aurat log jon bole hei ki ulog Parmeshwar se prem kare hei, ulog ke aur log ke madat kare ke hei,

¹¹aur ulog ke chuppe rahe ke aur dhyaan de ke sab seekhe ke hei.

¹²Ulog ke chuppe rahe ke hei aur admi ke nai sikhaay ke hei aur nai bataay ke hei ki kaa kare ke hei.

¹³Kaahe ke, Eiḍam ke Eev se pahile banaawa gay raha,

¹⁴aur Eiḍam ke beokuuf nai banaawa gay raha. U Eev rahi jiske puura beokuuf banaay dewa gay raha, aur wahi paap karis.

¹⁵Lekin aurat log bachcha peida kare ke kaaran se bachaawa jaai, agar ulog sachcaai, prem, pawitr aur saadhaaran se rahi.