Read Hindi, Fiji 1 Ṭimathi 3 Bible Online

1 Ṭimathi 3 - Hindi, Fiji bible

1 Ṭimathi 3

¹I sach hei ki agar koi chech ke agua bane maañge hei, to u ek achchha kaam kare maañgi.

²Yahi kaaran adhikaari log ke achchha naam hoy ke chaahi aur ek pati ke ekke patni hoy. Ulog apne aap ke bas meñ rakkhe sake, samajhdaar rahe, aadar kare laayk rahe, ajnabi se achchha byohaar kare aur dusra ke sikhaay sake.

³Ulog saraabi nai rahe ya museebat nai khaṛa kare. Uske badle meñ, ulog dayaalu aur naram dil ke rahe aur peisa se prem nai kare.

⁴Chech ke adhikaari, aapan palwaar ke aapan bas meñ rakkhe sake, aur i bhi dekhe ki ulog ke laṛkan baat maane aur hardam sab ke aadar kare.

⁵Agar ulog aapan palwaar ke aapan bas meñ nai rakkhe sake hei, to keise ulog Parmeshwar ke log ke dekh bhaal kari?

⁶Ulog ke Prabhu ke nawa chela nai hoy ke chaahi. Agar rahi, to ulog ghamanḍi hoy jaai aur Saitaan ke sañghe naas hoy jaai.

⁷Aakhri meñ, ulog baahar ke log meñ ijjatdaar hoi. Tab ulog Saitaan ke jaal meñ nai fasi aur badnaam nai hoi.

⁸Chech ke ofisa log ke serias hoy ke chaahi. Ulog ke jhuuṭa, saraabi ya peisa ke laalchi nai hoy ke chaahi.

⁹Aur ulog ke safa dilo dimaag ke hoy ke chaahi aur pakka biswaas kare ke chaahi jon kuchh Parmeshwar ham log ke biswaas ke baare meñ dekhaais hei.

¹⁰Sab se pahile ulog ke apne aap ke saabit kare ke paṛi. Tab agar koi ke ulog ke agaiñsṭ kuchh nai hei, tab ulog ofisa log ke rakam sewa kare sake hei.

¹¹Yahi rakam aurat log ke bhi serias rahe ke hei. Ulog gosip kare waali ya saraab piye waali nai hoy, aur ulog jon bhi cheej kare usman faitful rahe.

¹²Chech ke ofisa log saadi ke maamla meñ faitful rahe. Ulog aapan ghar aur laṛkan ke aapan bas meñ rakkhe waala howe.

¹³Jon log ofisa ke kaam achchha se kare hei, ulog ke maan jaan rahe hei aur ulog ke Yeeshu Maseeh meñ biswaas ke khaatir aadar kara jaai.

¹⁴Ham aasha karta hei ki ham tumme jaldi mile aayga. Lekin ham i likhta hei,

¹⁵ki agar hamme deri hoy jaai, to tum jaane sakta hei ki keise jon Parmeshwar ke palwaar ke log hei, ulog ke rahe ke hei. Kaahe ke, jinda Parmeshwar ke chech ke majbuut faaunḍeishan sachchaai hei.

¹⁶Ham log ke dharam ke yahi baṛa bhed hei, Maseeh, manush ke rakam aais Aatma dekhaais, ki u Parmeshwar ke khusi karis raha, aur uske ainjals dekhe rahin. Puura dunia meñ Maseeh ke parchaar kara gais raha. I sansaar ke log aapan biswaas uspe rakkhis raha, aur u mahima meñ uppar le jaawa gais raha.