Read Hindi, Fiji 1 Ṭimathi 4 Bible Online

1 Ṭimathi 4 - Hindi, Fiji bible

1 Ṭimathi 4

¹Parmeshwar ke Aatma safa bataay hei ki aakhri ṭaaim pe bahut se log aapan biswaas se bhaṭak jaai. Ulog ke dushṭaatma aur jon ṭeeching Saitaan se aay hei usse bharmaaya dewa jaai.

²Ulog jhuuṭa log jon ke dil aur dimaag mar gais hei, ulog ke jhuuṭa baat se bhi bharmaaya jaai. I jhuuṭa log

³baaki log ke saadi kare se aur kuchh khaay se roki. Lekin Parmeshwar i sab khaay waala cheej banaais raha ki jisse uske log jon sachchaai jaane hei, ulog dhanbaad ke saath khaai.

⁴Jon sab cheej Parmeshwar banaais hei, u sab achchha hei. Aur agar tum dhanbaad dega, to tum koi bhi cheej khaay sakega.

⁵Jon cheej Parmeshwar bolis raha, aur tumhaar preya, sab ke khaay ke waaste achchha banaay dei.

⁶Agar tum i sab aur log ke sikhaayga, tab tum Yeeshu Maseeh ke achchha sewak ban jaayga. Tum i dekhaayga ki biswaas pe jon bhi kuchh seekha hei aur jon achchha aagya tum maanta hei, usse tum baṛh gaya hei.

⁷Jiske koi matlab nai hei, aur jiske koi keemat nai hei, u sab kahaani pe nai jaao. Mehnat karo ki dhaarmik bano.

⁸Jeise bola gais hei, “Tumhaar deñhi ke waaste kasrat achchha hei, lekin dharam tumme sab rakam se madat kare hei. I jeewan ke waaste abhi aur hardam waada kare hei.” I sab baat keemti hei aur kabhi bhuule ke nai hei.

¹⁰Ham log aapan aasha jinda Parmeshwar pe rakkha hei, jon sab ke muktidaata hei, lekin ulog ke jaada jon ke lage biswaas hei. Yahi kaaran ham log etna dukh uṭhaata aur kaṛa kaam karta hei.

¹¹Yahi sab ke sikhaao aur bataao ki kon cheej kare ke hei aur bole ke hei.

¹²Koi ke aapan hasi nai uṛaay deo, kaahe ke tum jawaan hei. Jon bhi cheej tum karta hei aur bolta hei, aur aapan prem, pawitrta, aur biswaas se, dusra log ke waaste ekzaampal bano.

¹³Jab tak ham aay nai jaai, yaad rakhna ki weship meñ dharam buk paṛhe ke hei, aur parchaar kare ke aur sikhaay ke nai band karna.

¹⁴Jon bardaan tumme mila raha, jab nabi log chech ke agua log se baat karin raha aur tumhaar muuṛ pe haath rakh ke tumme bless karin raha, uske iyuz karna.

¹⁵I sab baat ke yaad rakhna aur iske baare meñ sochte rahna, ki jisse sab koi dekhi ki tum ketna achchha kaam karta hei.

¹⁶Saaodhaan rahna ki keise tum rahta hei aur sikhaata hei. Yahi karte rahna, aur tab tum khali apne aap ke nai, lekin u sab ke bachaayga jon tumme sune hei.