Read Hindi, Fiji 1 Ṭimathi 5 Bible Online

1 Ṭimathi 5 - Hindi, Fiji bible

1 Ṭimathi 5

¹Ek baṛa jan ke nai sudhaaro. Uske hausla baṛhaao, jeise tum aapan pita ke sañghe karega. Jawaan admi log ke aapan bhaai ke samaan dekho,

²aur buṛhiya aurat log ke aapan amma ke rakam dekho. Jawaan aurat log ke aapan bahini ke rakam aadar karo.

³Koi bidhwa hei jiske madat ke jaruuri hei, uske madat karo.

⁴Lekin agar bidhwa ke laṛkan aur naati pota hei, tab ulog ke Parmeshwar ke sewa kare ke seekhe ke paṛi ki keise, bidhwa ke sewa kare ke hei jeise u ulog ke karis raha, jab ulog chhoṭa rahin. Yahi hei jon Parmeshwar chaahe hei ki ulog kare.

⁵Ek bidhwa jiske madat ke jaruuri hei u hei jon akeli hei aur uske koi palwaar bhi nai hei. Parmeshwar meñ uske biswaas hei, aur u raat aur din usse madat ke waaste preya karte rahe hei.

⁶Ek bidhwa jon khali mauj masti kare maañge hei, u jinda hote bhi mar gais hei.

⁷I sab baat sab ke bataao, ki jisse ulog raaiṭ kaam kari.

⁸Log jon aapan palwaar ke sewa nai kare hei, khaas kar ke aapan saga palwaar ke, ulog aapan biswaas chhoṛ deen hei. Ulog to usse bhi kharaab hei, jon ke Prabhu meñ biswaas hee nai hei.

⁹Ek bidhwa ke bidhwa waala lisṭ meñ rakkhe ke khaatir uske 60 saal ke hoy ke chaahi, aur u aapan saadi ke jeewan ke achchha se bitaais hoy.

¹⁰U sab rakam ke achchha kaam kare se pahichaani jaay, jeise ki laṛkan ke dekh bhaal, anjaan log ke khaana paani dewe, Parmeshwar ke log ke waaste aapan ghar ke khol dewe, jaruurat mand log ke madat kare, aur hardam apne aap ke iuzful banaay rahe.

¹¹Jawaan bidhwa log ke lisṭ meñ naam nai rakkho. Baad meñ saait ulog fir se saadi kare maañgi. Tab ulog Maseeh se duur hoy jaai

¹²aur uske waada tuuṛe ke dosi ban jaai.

¹³Iske saathe, ulog laizi ban jaai aur ghar ghar jaay ke suru kar dei. Fir, ulog gosip kare lagi aur jhagṛa lagaay lagi, aur u sab baat kare lagi jon ulog ke nai kare ke chaahi.

¹⁴Ham maañgega ki jawaan bidhwa log fir se saadi kar le, laṛkan peida kare aur aapan palwaar ke samhaare. Tab dusman ke lage koi kaaran nai rahi ki ulog ham log ke baare meñ ninda kari.

¹⁵Dekho, kuchh jawaan bidhwa ke saathe kon cheej bhais hei! Ulog Saitaan ke pichchhe chal paṛin hei.

¹⁶Agar ek biswaasi aurat ke palwaar meñ koi bidhwa hei, to u uske madat kare, aur chech ke uppar bojha nai chhoṛe, aur tab chech ulog ke madat kare saki jon ke sachmuch meñ madat ke jaruurat hei.

¹⁷Chech ke agua log, jon aapan kaam achchha se kare hei, ulog ke dui guna aadar sammaan aur talab mile ke chaahi, khaas kar ke agar ulog parchaar aur sikhaay ke kaam meñ mehnat kare hei.

¹⁸I yahi rakam hei jeise Baaibal bole hei, “Jab dhaan daawa jaay hei, tab beil ke muh nai bañdhna.” Tum i kahaawat to janta hei, “Majduur aapan majduuri ke hakdaar hei.”

¹⁹Chech ke agua ke agaiñsṭ, dui ya teen gawaah ke bina koi dos nai sunna.

²⁰Lekin agar koi agua paap karte rahe, to ulog ke sab ke saamne ḍaaṭe ke hei, ki jisse aur log ke bhi chetaaoni mili.

²¹Parmeshwar aur Yeeshu Maseeh, aur ulog ke chuna gay ainjals ke saamne, ham hukum deta hei ki tum hamaar aagya ke maano. Sab ke sañghe ekke rakam rahna, aur koi ke faiva nai karna.

²²Prabhu ke sewa kare ke khaatir, jaldbaaji meñ aapan haath rakh ke koi log ke nai chun lena. Paap nai karna kaahe ke aur log kare hei, lekin Parmeshwar ke nagichche rahna.

²³Khali paani piye ke chhoṛ deo. Aapan peṭ ke gaṛbaṛi aur kuchh aur bimaari ke waaste thoṛa waain le leo, to u ṭheek hoy meñ madat kari.

²⁴Kuchh kuchh log, nyaay hoy ke ṭaaim se pahile aapan paap meñ jaldi se pakṛaay jaay hei. Lekin baaki ke paap wahi lage nai, lekin baad meñ dekhaay hei.

²⁵Yahi rakam sab achchha kaam ke sañghe hei. Kuchh kuchh jaldi dekhaay jaay hei, lekin kuchh bhi lukaan nai rahe hei.