Read Hindi, Fiji 1 Ṭimathi 6 Bible Online

1 Ṭimathi 6 - Hindi, Fiji bible

1 Ṭimathi 6

¹Agar tum gulaam hei, to aapan maalik ke aadar karo. Isse log Parmeshwar aur hamaar ṭeeching ke baare meñ kharaab baat nai kari.

²Agar kuchh gulaam ke maalik biswaasi hei, to ulog ke aadar karo. Kaahe ke ulog bhi Maseeh ke biswaasi hei, aur u sab se prem kare hei. Yahi khaatir tum ulog ke jetna hoy sake otna achchha se sewa karo. Yahi sab cheej hei jon tum, log ke sikhaayga aur bataayga ki ulog kare.

³Koi bhi jon dusra rakam se sikhaay hei, u hamaar Prabhu Yeeshu Maseeh ke pawitr vachan se agri nai hoy hei.

⁴Ulog jon agri nai hoy hei, ulog ghamanḍi hei, lekin ulog kuchh bhi nai jaane hei. Ulog ke dimaag bimaar hei, aur ulog shabd pe baad-bibaad karte rahe hei. Ulog jaran, jhuṭṭe jhuṭṭe ke jhagṛa, ninda, kaṛa baat, bura bura sandeh peida kare hei,

⁵aur kharaab se jhagṛa kare hei. Ulog ke buddhi kharaab hoy gais hei aur sachchai se duur hoy gain hei. I log soche hei ki dharam tumme dhani banaai.

⁶Jon cheej tumhaar lage hei agar tum usse khusi rahega to dharam tumhaar jindagi ke dhani banaai.

⁷Ham log i dunia meñ kuchh nai laaya, aur kuchh le ke bhi nai jaayga.

⁸Jon khaana aur kapṛa hei, wahi se ham log ke khusi rahe ke hei.

⁹Jon log dhani bane maañge hei, ulog sab rakam ke laalach aur jaal meñ fañs jaay hei. Ulog ke muurakh aur naas kare waala ichchha nichche kheech lewe hei aur naas kar de hei.

¹⁰Peisa se prem, ulog ke sab rakam ke museebat meñ ḍaar de hei. Kuchh log to peisa etna maañge hei ki ulog aapan biswaas chhoṛ de hei aur isse ulog ke bahut dukh pahuñche hei.

¹¹Ṭimathi, tum Parmeshwar ke hei, yahi khaatir sab kharaab kaam se duur raho. Kosis karo ki tum Parmeshwar ke khusi rakkho aur wahi ke rakam bano. Imaandaar, premi, bharosa mand aur naram raho.

¹²Biswaas ke khaatir achchha laṛaai laṛo aur anant jeewan paao. Parmeshwar tumme i dees raha jab tum aapan biswaas ke baare meñ bataaya raha, jab ki kaafi log sunin raha.

¹³Ab ham mañgta hei ki tum kuchh promis karo. Parmeshwar ke saamne, jon sab ke laaif dewe hei aur Yeeshu Maseeh ke saamne jon Pontias Paaylaṭ ke aapan biswaas ke baare meñ, khul ke bataais raha.

¹⁴Promis karo ki tum dil se aur puura rakam se u sab maanega, jon tumme bataawa gais hei, jab tak Prabhu Yeeshu Maseeh lauṭ ke nai aay jaay.

¹⁵Mahaan Parmeshwar hee khali ek Agua hei, Sab Raaja log ke raaja Sab Prabhu ke Prabhu. U ṭaaim jab ki Parmeshwar tay kar lees hei, u Yeeshu Maseeh ke fir se bheji.

¹⁶Khali Parmeshwar hardam rahi! Aur u roshni meñ rahe hei jiske nagichche koi nai aay sake hei. Koi admi Parmeshwar ke kabhi nai dekhis hei ya kabhi dekhe sake hei. Parmeshwar ke mahima hoi, aur uske sakti hardam rahi. Aameen.

¹⁷I dunia ke dhani admi log ke chetaaoni de deo ki ghamanḍ nai kare ya u peisa pe bharosa nai kare jon jaldi khalaas hoy jaay hei. Ulog se bolo ki Parmeshwar pe bharosa rakkho, jon dhani hei aur ham log ke u sab cheej jon hamme sukhi jeewan ke waaste chaahi, usse aasheesh dewe hei.

¹⁸Ulog ke aagya deo ki jetna hoy sake otna achchha karam kare aur sab ke madat kare. Dhani log ke yaad karaao ki daan dewe aur jetna hoy sake ulog ke lage jon cheej hei u sab ke baaṭe.

¹⁹I aage ke waaste ek majbuut faaunḍeishan bani, ki jisse ulog jaani ki sachcha jeewan kon rakam hei.

²⁰Ṭimathi, Parmeshwar jon cheej tumhaar haath meñ rakkhis hei, uske gaaḍ karo! Bakwaas aur bekaar baat se jon sune meñ achchha lage hei lekin achchha nai hei, usse duur raho.

²¹Kuchh log jon eisan baat pe biswaas karin hei, ulog aapan biswaas khoy deen hei. Ham preya karta hei ki Prabhu tum sab pe daya kari!