Read Hindi, Fiji 2 Ṭimathi 3 Bible Online

2 Ṭimathi 3 - Hindi, Fiji bible

2 Ṭimathi 3

¹Jaane rahna ki aakhri roj meñ kuchh kharaab ṭaaim rahi.

²Log khali apne aap ke aur peisa se prem kari. Ulog ghamanḍi, ruuḍ, sṭak ap, rahi aur aapan amma-bappa ke baat nai maani. Ulog theñkful nai rahi, aur adharmi,

³kaṛa dil ke, aur haiṭful rahi. Ulog ke baat meñ prem nai rahi, aur ulog apne ke konṭrol nai kare sake. I log sab cheej achchha jon hei, uske haiṭ kari.

⁴Ulog dhokebaaj, laaparwaah aur ghamanḍ se fuula rahi. Parmeshwar se prem kare ke badle, ulog manoranjan se prem kari.

⁵Ulog dharam ke dekhaawa kari, lekin ulog ke dharam sachcha nai rahi. Eisan log se koi waasta nai rakkho.

⁶Kuchh kuchh admi log aapan puura palwaar ke muurakh banaay de hei, khali u aurat log ke bas meñ kare ke waaste, jon paap ke gulaam hei, aur sab rakam ke ichchha ke bas meñ hei.

⁷Eisan aurat log hardam kuchh nawa seekhe maañge hei, lekin kabhi bhi sachchaai khoje nai paay hei.

⁸Jeise Yannes aur Yambres, Maozas ke agaiñsṭ karin raha. I rakam ke log sachchaai ke dusman hei. Ulog ke dimaag bimaar hei, aur ulog ke biswaas bhi sachcha nai hei.

⁹Lekin ulog aapan muurakhpan se bahut duur nai jaai. Bahut jaldi, sab koi ulog ke sachchaai jaan lei, jeise Yannes aur Yambres ke sachchaai saamne aais raha.

¹⁰Ṭimathi, tum janta hei ki ham keise rahta hei aur sikhaata hei. Tum janta hei ki ham kon cheej kare mañgta hei u kon cheej biswaas karta hei. Tum to dekha hei ki hamme ketna dheeraj hei aur ham ketna prem karta hei, aur keise ham sahte chala aaya raha

¹¹u sab dukh aur museebat jon Antiok, Iconium, aur Listra meñ raha. Lekin Prabhu u sab bhayaanak museebat se hamme bachaais.

¹²Jon koi bhi Maseeh Yeeshu ke hei, aur raaiṭ se rahe maañge hei, ulog ke uppar dusra log museebat laai.

¹³Lekin dushṭ aur chhal kare waala log jon dhoka deke i dekhaay maañge hei jon cheej ulog nai hei, ulog apne dhoka khaay lewe hei aur bigaṛte jaay hei.

¹⁴Jon cheej tum seekha hei aur biswaas karta hei, wahi pe bharosa karte raho. Kaahe ke tum to janta hei ki kon tumme i sab cheej sikhaais.

¹⁵Bachpan se, tum Pawitr Vachan ke jaana jon tumme sikhaay sake hei ki Yeeshu Maseeh meñ biswaas rakkho aur bach jaao.

¹⁶Baaibal meñ sab cheej Parmeshwar ke vachan hei. U sab sikhaay meñ aur log ke madat kare meñ aur log ke sudhaare meñ aur dekhaay meñ ki keise raha jaay hei, jaruuri hei.

¹⁷Baaibal, Parmeshwar ke sewak log ke sab rakam ke achchha kaam kare ke sikhaay hei.