Read Hindi, Fiji 2 Ṭimathi 4 Bible Online

2 Ṭimathi 4 - Hindi, Fiji bible

2 Ṭimathi 4

¹Jab Yeeshu Maseeh raaja ke rakam aai, u sab koi ke jaj rahi, chaahe ulog jinda hei ya mara. To, Parmeshwar aur Maseeh ke gawaah maan ke, ham tumme aagya deta hei

²ki Parmeshwar ke sandes ke parchaar karo. Khusi se karo, chaahe uske log laaik kare ya nai. Tum, log ke sudhaaro, aur ulog ke paap ke dekhaao. Lekin ulog ke khusi rakkho, aur jab ulog ke aagya deo, to dheeraj rakhna.

³Ṭaaim aawe hei jab log achchha ṭeeching nai suni. Uske badle, ulog weisan ṭeecha ke khoji, jon ulog ke wahi bataay ke khusi rakkhi jon ulog sune maañge hei.

⁴Ulog sachchaai se ghuum jaai aur jhuuṭa sṭori sune maañgi.

⁵Lekin tum dheeraj rakhna aur museebat sahe ke taiyaar rahna. Tumme susamaachaar parchaar kare ke waaste mehnat kare ke paṛi aur aapan kaam achchha se karna.

⁶Ab hamaar mare ke ṭaaim aay gais hei. Hamaar jeewan to u rakam hoy gais hei jeise paani ke bardaan jon bedi pe chaṛhaawa jaay hei.

⁷Ham ṭheek se laṛa. Hamaar dauṛ khatam hoy gay hei, aur ham faitful raha.

⁸Ab hamme taaj mili kaahe ke ham Prabhu ke khusi rakkha. U achchha se nyaay kare hei, nyaay ke din u hamme taaj dei aur ulog ke bhi dei jon maañge hei ki u ulog ke saamne shakti se aay.

⁹Jetna jaldi hoy saki, hamme aay ke dekh lena.

¹⁰Demaas i dunia ke cheej se etna prem kare hei ki u hamme chhoṛ ke Thisluneeka chala gais. Kreiskens, Galeshia chala gais, aur Ṭaayṭas, Daalmatia chala gais.

¹¹Khali Luuk hamaar sañghe rahe gais. Maak hamme bahut madat kare sake hei, to uske khoj ke aapan sañghe le aana.

¹²Ham Tichikus ke Efisus bheja hei.

¹³Jab tum aana, hamaar kauṭ le aana jon ham Troaas meñ Kaapus ke lage chhoṛ aay raha. U skrol nai bhulna, khaas kar ke jon chamṛa se bana hei.

¹⁴Elekszenḍa, meṭal banaay waala, hamme bahut rakam se dukh pahuñchaais hei. Lekin u jon bhi cheej karis hei, Parmeshwar usse badla lei.

¹⁵Ham log jon bhi cheej sikhaata hei, Elekszenḍa uske agaiñsṭ kare hei. Usse tum sambhal ke rahna.

¹⁶Jab ham sab se pahile ṭraael pe raha, tab hamme koi nai madat karis. Sab koi hamme chhoṛ ke chala gais. Ham aasha karta hei ki ulog ke iske waaste saja nai mile.

¹⁷Lekin Prabhu hamaar sañghe khaṛa raha. U hamme taagat dees ki ham uske puura sandes ke parchaar kari, ki jisse sab geir Yahuudi sune saki. Aur ham bhuuka sher ke muh se bachaay lia gay raha.

¹⁸Prabhu hamme hardam dushṭ se bachaay rakkhi, aur u hamme aapan swarag ke raaj meñ sahi salaamat leke laai. Uske hardam baṛaai karo! Aameen.

¹⁹Hamaar namaste Prisila aur Akwila ke dena aur Unesifurus ke palwaar ke bhi.

²⁰Iraastus, Kurinth meñ rahe gais raha. Trifimus bimaar raha jab ham uske Miletus meñ chhoṛa raha.

²¹Ṭhanḍa paṛe se pahile aay ke kosis karna. Yubulus, Pudeñs, Linus aur Kloḍia, sab aapan namaste bheje hei, aur baaki Prabhu ke log bhi.

²²Ham preya karta hei ki Prabhu tumhaar jeewan ke aasheesh dei aur tum pe daya kari.