Read Hindi, Fiji Ṭaayṭas 1 Bible Online

Ṭaayṭas 1 - Hindi, Fiji bible

Ṭaayṭas 1

¹Pol jon Parmeshwar ke sewak hei, aur Yeeshu Maseeh ke prerit hei, uske bagal se. Ham Parmeshwar ke aapan log ke hausla deta hei ki ulog ke biswaas baṛhe aur dharam ke baare meñ sachchaai samjhe.

²Tab ulog ke anant jeewan ke u aasha mili jon Parmeshwar bahut din pahile waada karis raha. Aur Parmeshwar kabhi jhuuṭ nai bole hei!

³To, ab ṭheek ṭaaim pe, Parmeshwar ham log ke muktidaata i sandes dees hei aur hamme bataais hei ki ham u sab bataai jon u bolis hei.

⁴Ṭaayṭas, ham log ke biswaas ke kaaran, tum hamaar laṛka ke rakam hei. Ham preya karta hei ki Parmeshwar, ham log ke Pita aur Maseeh Yeeshu ham log ke muktidaata tum log pe daya kari aur tum log ke saanti se aasheesh dei!

⁵Ham tumme Kreeṭ meñ i kaaran chhoṛa raha ki tum u sab chhuṭa kaam puura karo aur ek ek ṭaaun ke chech meñ agua log ke appoinṭ karo. Jeise ham tumme bataay raha,

⁶ulog pe koi dos nai rahe aur ekke aurat ke pati rahe. Ulog ke laṛkan Prabhu ke biswaasi rahe, aur ulog badnaam nai rahe ki ulog waailḍ aur baat nai maane waala hei.

⁷Chech ke agua log Parmeshwar ke kaam ke inchaaj hei, ulog ke bhi achchha naam rahe ke hei. Ulog apne aap ke boss nai samjhe, gussa waala nai rahe, bahut nasa nai kare, dusra ke sataay waala nai rahe aur neech kamaai kare waala nai rahe.

⁸Ulog, sewa satkaar karewaala rahe, bhalaai kare waala rahe, samajhdaar rahe, kaanuun pe chale waala rahe aur apne aap pe kaabu rakkhe waala rahe.

⁹Ulog sachcha vachan pe bana rahe jon ulog ke sikhawa gay raha, ki jisse ulog achchha vachan ke updes deke jon birodh karewaala rahe hei, ulog ke muh band kar de sake.

¹⁰Ketna log hei jon kaanuun ke maan nai kare hei aur bekaar baat kar ke dusra ke dhoka dete rahe hei. I ulog pe laagu hei jon ke khatna bhais hei.

¹¹Lekin tum ulog ke muh band karaao. Ulog peisa ke pichchhe hei, aur ulog jhuuṭa sandes deke ghar ghar ke bigaaṛe hei.

¹²I wahi rakam hei jeise ki ulog ke nabi ek dafe bolis raha, “Kreeṭ ke log hardam jhuuṭ bole hei. Ulog jañgli jaanwar ke rakam peṭṭu aur laizi hei.”

¹³I sachcha gawaahi hei. Aur tum log ke eisan log pe kaṛaai kare ke hei, ki jisse ulog ke biswaas pakka hoy jaay.

¹⁴Yahuudi log ke jhuuṭa kahaani aur manush ke hukum pe biswaas nai karna. I ulog banaais hei jon sachchaai ke nai maane hei.

¹⁵Ulog ke khaatir sab kuchh achchha hei, jon ke dil safa hei. Lekin ek abiswaasi jon ke dil meila hei, uske khaatir kuchh nai achchha hei. Uske dil aur dimaag duuno naas hoy gais hei.

¹⁶Eisan log Parmeshwar ke jaane ke daawa kare hei, lekin ulog jon cheej kare hei, u kuchh aur dekhaawe hei. Ulog ganda log hei. Ulog Parmeshwar ke kaha nai maane hei, aur ulog koi achchha kaam kare laayk nai rahe hei.