Read Hindi, Fiji Fileman 1 Bible Online

Fileman 1 - Hindi, Fiji bible

Fileman 1

¹Pol ke bagal se, jon Yeeshu Maseeh ke sewa kare ke kaaran se jel meñ hei, aur Ṭimathi ke bagal se jon hamaar biswaas ke kaaran hamaar bhaiya bhais. Fileman, tum jon hamaar sañghe kaam karta hei aur ham log ke bahut pyaara hei. I chiṭṭhi tumhaar waaste hei

²aur u chech ke waaste bhi jon tumhaar ghar meñ mile hei. Hamaar pyaara dost Affiya aur Arkhippus ke waaste bhi jon duuno Prabhu ke hamaar rakam sewa kare hei.

³Ham binti karta hei ki Parmeshwar hamaar Pita aur Prabhu Yeeshu Maseeh, tum pe daya kari aur saanti ke aasheesh dei!

⁴Fileman, jab jab ham preya meñ tumhaar naam leta hei, ham Parmeshwar ke dhanbaad deta hei.

⁵Ham, Yeeshu Maseeh meñ tumhaar biswaas aur Parmeshwar ke log meñ tumhaar prem ke baare meñ sunta hei.

⁶Jeise tum aapan biswaas duusar log meñ baaṭta hei, ham preya karta hei ki jon aasheesh Maseeh hamme dees hei, uske ulog jaan le.

⁷Dosto, tumhaar prem hamme bahut khusi kar dees hei aur hamme hausla dees hei. U Parmeshwar ke log ke dil bhi khusi kar dees hei.

⁸Krisṭ hamme himmat de ke bataay hei ki tumme kaa kare ke hei.

⁹Lekin ham tumme bolega ki khali prem ke kaaran i karo. Haañ, jeise ki koi ek Yeeshu ke kaaran jel meñ hei.

¹⁰Ham binti karta hei ki tum Unesimus ke madat karo! U hamaar waaste ek laṛka ke rakam hei kaahe ke yahi jel meñ ham uske, Yeeshu tak pahuñchaay raha.

¹¹Isse pahile, u tumhaar khaatir bekaar raha, lekin ab u ham duuno ke khaatir kaam meñ aai.

¹²Unesimus ke tumhaar lage fir se bheje ke waaste hamme dukh hei.

¹³Ham mañgta hei ki uske hiañ aapan sañghe rakkhi, jahañ u tumhaar jagha lewe saki aur hamme madat kari, jab tak ham susamaachaar ke parchaar kare ke khaatir jel meñ hei.

¹⁴Lekin ham apne aap kuchh nai karta jab tak pahile tum uspe raaji nai hota. Ham mañgta hei ki tumhaar daya ke kaam tumhaar dil se aay, eise nai ki tum mahsuus karta hei ki tumme jabarjasti kare ke hei.

¹⁵Saait Unesimus tumhaar lage se thoṛa deri ke waaste duur kara gais raha, ki jisse tum uske fir se sab din ke waaste rakkhe sako,

¹⁶lekin ek gulaam ke rakam nai. Unesimus ek daas se bhi kahiñ jaada hei. Hamaar waaste u ek pyaara dost hei, lekin tumhaar waaste u to aur jaada hei, duuno ek admi ke rakam aur Prabhu ke pichchhe chale waala.

¹⁷Agar tum hamme Krisṭ ke kaaran ek dost jaana, tab Unesimus ke wahi rakam welkam karna jeise tum hamme karega.

¹⁸Agar u tumme dhoka dees, ya tumhaar kuchh karja hei, to hamaar karja meñ joṛ deo.

¹⁹Ham aapan haath se likhta hei, HAM, POL, SAB KARJA LAUṬAAY DEGA. Lekin i nai bhulna ki tumhaar jeewan hamaar karja hei.

²⁰Hamaar pyaara dost log aur Krisṭ hamaar Prabhu ke pichchhe chale waala log, i hamaar waaste kar ke hamme khusi karo.

²¹Ham janta hei tum wahi karega jeise ham bola hei, aur usse bhi jaada

²²Plees hamaar waaste ek ruum taiyaar karo. Hamme aasha hei ki tumhaar preya ke jawaab mil jaai, aur ham tumhaar lage aay sakega.

²³Ifraas bhi, Krisṭ Maseeh ke chela bane ke kaaran hiañ jel meñ hei. U aapan namaste bheje hei,

²⁴aur yahi rakam Maak, Aristakus, Demaas aur Luuka jon hamaar sañghe kaam kare hei, sab namaste bheje hei.

²⁵Ham preya karta hei ki Prabhu Yeeshu Maseeh tum pe daya kari!