Read Hindi, Fiji Heebru 10 Bible Online

Heebru 10 - Hindi, Fiji bible

Heebru 10

¹Maozas ke kaanuun, aawe waala cheej ke parchhaaiñ hei. I parchhaaiñ apne aap meñ achchha cheej nai hei kaahe ke u log ke saal saal ke chaṛhaawal balidaan se bachaay nai sake hei.

²Agar kahiñ weship kare waala log hei jon ke paap dhowaay jaay hei aur jon ke antar aatma safa hoy jaay hei, to balidaan chaṛhaawe ke jaruuri nai rahi.

³Lekin bakṛa aur beil ke khuun paap nai miṭaawe sake hei. U khali log ke ek saal se dusra saal tak ulog ke paap ke yaad karaawe hei.

⁵Jab Maseeh dunia meñ aais raha, u Parmeshwar se bolis raha, “Balidaan aur chaṛhaawa nai hei jon ke tum mañgta hei, lekin tum hamme hamaar deñhi dia hei.

⁶Nai, tum jaanwar ke balidaan aur paap ke chaṛhaawa se khusi nai hei.”

⁷Tab Maseeh bolis, “Aur tab, hamaar Parmeshwar, ham u kaam kare aaya, jon tum mañgta raha, jeise Baaibal bole hei.”

⁸Kaanuun hamme sikhaay hei ki paap ke kaaran, bheñṭ aur balidaan chaṛhaay ke hei. Lekin kaahe ke Maseeh i baat bataay hei aur bole hei ki Parmeshwar u sab nai chaahe hei?

⁹I kaaran ki u bheñṭ aur balidaan ke haṭaay lewe aur uske jagha dusra ke rakkhe. Uske matlab yahi raha jab u Parmeshwar se bolis raha, “Jon cheej tum mañgta hei, u kare ke waaste ham aay gaya hei.”

¹⁰To ham log ke pawitr banaawa gay hei kaahe ke Maseeh, Parmeshwar ke baat maanis raha aur apne aap ekke dafe hardam ke waaste de dees.

¹¹Paadri aapan kaam har roj kare hei, aur ulog balidaan chaṛhaawa kare hei jon paap ke nai miṭaay sake hei.

¹²Maseeh aapan balidaan dees jon hardam ke waaste achchha hei. Ab u Parmeshwar ke raaiṭ saaiḍ meñ beiṭha hei,

¹³aur u wahiñ rahi jab tak uske dusman log ke uske nichche nai rakh dia jaai.

¹⁴Uske ekke balidaan se ulog ke jon ke paap maaf hoy gay hei, hardam ke waaste Parmeshwar ke lage laawa jaay hei.

¹⁵Pawitr Aatma bhi yahi bataay hei ki Prabhu kon cheej bolis raha,

¹⁶“Jab ṭaaim aai, ham ulog ke sañghe ek vaacha banaayga. Ham aapan kaanuun ulog ke dil aur dimaag pe likhega.

¹⁷Tab ham ulog ke paap ke bhulaay jaayga aur ulog ke bura kaam fir nai yaad karega.”

¹⁸Jab paap ke maafi mil jaai, tab balidaan chaṛhaay ke kuchh kaam nai hei.

¹⁹Dosto, Maseeh ke khuun ham log ke himmat dewe hei ki ham pawitr jagha meñ jaai

²⁰ek nawa rasta se jon laaif dewe hei! Aur i rasta hamlog ke parda meñ se jon khud Maseeh hei, le jaay hei.

²¹Ham log ke ek mahaan paadri hei, jon Parmeshwar ke ghar ke inchaaj hei.

²²To aao ham Parmeshwar ke lage sachcha man aur puura biswaas aur konfidens se jaai. Ham log aapan dil safa rakkhi aur antar aatma sab bura cheej se free rakkhi, aur aapan deñhi ke safa paani se dhoy lei.

²³Ham log u aasha ke jon ke ham bolta ke hamaar hei, uske kas ke pakaṛ ke rakkhi. Kaahe ke, ham log uspe bharosa kare sakta hei jon hamlog ke sañghe vaacha banaais hei.

²⁴Ham log ke ek dusra ke himmat baṛhaay ke rakkhe ke hei ki jisse ulog bichaar kare aur ek dusra ke madat kare.

²⁵Koi koi log weship kare se duur hoy gain hei, lekin ham log ke weise nai kare ke hei. Ham log ke ek dusra ke himmat baṛhaate rahe ke hei, khaas kar ke jab Prabhu ke lauṭe ke din nagichche aay hei.

²⁶Agar sachchaai jaane ke baad koi jaan buujh ke paap kare hei to fir koi bhi balidaan ulog ke khaatir nai bana hei.

²⁷Ulog Parmeshwar ke dusman hei, aur ulog ke saamne bhayaanak nyaay (ḍanḍ) aur bhasam kare waala aagi aai.

²⁸Agar dui ya usse jaada log, Maozas ke kaanuun tuuṛe ke gawaahi dei, to u admi ke mare ke saja mile sake hei.

²⁹Lekin Parmeshwar ke Putr ke beijjati karna aur u vaacha ke khuun ke jon hamme pawitr banaay hei uske insalṭ karna isse bhi jaada kharaab kaam hei. Aur Pawitr Aatma jon hamme daya dekhaay hei uske khaatir i sab apmaan waala baat hei.

³⁰Ham log janta hei ki Parmeshwar bolis hei ki wahi badla lei aur saja dei. Ham log i bhi janta hei ki Baaibal bole hei ki Prabhu aapan log ke nyaay kari.

³¹Jinda Parmeshwar ke haath paṛ jaana bahut bhayankar baat hei!

³²U din nai bhulna jab tumme roshni mila raha aur tumme bahut museebat ke saamna kare ke paṛa raha.

³³Kabhi kabhi sab ke saamne tumme sataawa jaay hei aur tum pe atyaachaar howe hei, aur dusra ṭaaim tum dusra ke dukh baaṭta hei.

³⁴Jel meñ keidi pe tum daya kara. Aur tum khusi se aapan sab kuchh le jaawan dia, kaahe ke tum janta raha ki tumhaar lage kuchh aur achchha cheej hei, kuchh eisan cheej jon sada din rahi.

³⁵Aapan bharosa nai chhoṛo! Iske fal bahut achchha hoi.

³⁶Dheeraj rakkhe ke seekho, ki jisse tum Parmeshwar ke khusi rakkhega aur u tumme u sab dei jon tum se waada karis raha.

³⁷Jeise Baaibal bole hei, “Parmeshwar jaldi aay hei! Bahut deri nai hei.

³⁸Jon log ke Parmeshwar apnaai ulog jinda rahi kaahe ke ulog ke biswaas jinda rahi. Lekin u ulog se khusi nai hei jon usse duur hoy jaay hei.”

³⁹Ham log ulog ke rakam nai hei jon muuṛ ghumaay lewe hei aur fir naas hoy jaay hei. Ham log u roj tak biswaas rakkhega jab tak ham bach nai jaayga.