Read Hindi, Fiji Heebru 12 Bible Online

Heebru 12 - Hindi, Fiji bible

Heebru 12

¹Etna baṛa gawaahi ke jhunḍ ham log ke aas paas hei! To ham log ke u sab ke duur kar dewe ke hei jon ham log ke baadha pahuñchaay hei, khaas kar ke u paap jon hamlog ke chhoṛe nai hei. Aur ham log ke dheeraj se jon cheej aage hei uske dauṛ lagaay ke hei.

²Ham log ke aapan aañkhi Yeeshu pe lagaay rahe ke hei, jon ham log ke aage le jaay hei aur ham log ke biswaas puura hoy jaay hei. Yeeshu u khusi ke waaste jon aay waala raha, saram ke sahis ki uske suuli pe chaṛhaawa gais raha, aur ab Parmeshwar ke siñghaasan ke raaiṭ saaiḍ pe beiṭhis hei!

³To aapan dhyaan Yeeshu pe rakkho, jon paapi log se kaafi beijjati sahis hei. Tab tum niraas hoy ke peechhe nai haṭ jaayga.

⁴Tum meñ se koi bhi abhi tak paap ke laṛaai meñ dukh nai uṭhaais hei.

⁵Lekin tum bhulaay gaya hei ki Baaibal, Parmeshwar ke laṛkan ke baare meñ bole hei, “Jab Prabhu tumme saja dewe hei, uske halka nai samjho, aur jab u tumme sudhaare hei, niraas nai ho.

⁶Prabhu ulog ke sudhaare hei jon se prem kare hei aur ulog ke saja dewe hei jon ke aapan samjhe hei.”

⁷Dheeraj rakkho jab tumme sudhaara jaay hei! Yahi rakam ke vyohaar Parmeshwar aapan laṛkan ke sañghe kare hei. Kaa sab maa-baap aapan laṛkan ke sudhaare nai hei?

⁸Parmeshwar aapan sab laṛkan ke sudhaare hei, aur agar u tumme nai sudhaari, tab tum sachmuch meñ uske laṛkan nai bhaya.

⁹Ham log ke dharti ke pita ham log ke sudhaare hei, aur ham log abhi bhi ulog ke aadar karta hei. Kaa i usse achchha nai hei ki ham log ke aatmik Pita ham log ke sachcha jeewan deke sudhaare?

¹⁰Ham log ke dharti ke pita thoṛa din ke waaste ham log ke sudhaare hei, aur ulog jon achchha samjhe hei wahi kare hei. Lekin Parmeshwar ham log ke achchha ke waaste ham log ke sudhaare hei, kaahe ke u maañge hei ki ham pawitr bani, jeise u apne hei.

¹¹Koi ham log ke sudhaare to hamme achchha nai lage hei, u ṭaaim to hamme dukh dewe hei. Lekin agar ham wahi sudhaar se aagya ke paalan kare lagi, tab hamlog raaiṭ kaam karta hei aur saanti se rahega.

¹²Ab seedha khaṛa hoy jaao! Aapan ghuṭna ke kaape nai deo

¹³aur seedha rasta pe chalo. Langṛa log kharaab hoy ke badle achchha hoy jaai.

¹⁴Seekho ki sab ke sañghe saanti se raho! Safa jindagi bitaao. Agar eise nai karega to Prabhu ke kabhi nai dekhega.

¹⁵Dekhna ki koi bhi Parmeshwar ke sundar daya se duur nai rahe. Koi ke man meñ kaṛuwaahaṭ nai aay deo ki baad meñ u tum sab ke waaste museebat khaṛa kare.

¹⁶Neech log aur abiswaasi Esau ke rakam log se saaodhaan raho, jon aay waala aasheesh ke ek bhojan ke waaste bech dees. Esau jon pahila janma raha uske lage khaas adhikaar raha.

¹⁷Tum to janta hei ki keise fir baad meñ chal ke u asheesh waapas maañgis. Lekin uske aapan pita se roy aur bheek maañge ke baad, kuchh nai raha ki badlaao aay.

¹⁸Tum u jagha nai aaya jon Mount Saaynaai ke rakam hei, jiske dekha aur chhua jaay sake hei. Huañ pe koi dhadhakte (flaming) aagi, ya kariya baadar ya aañdhi

¹⁹ya bigul ke awaaj nai hei. Israayel ke log ek awaaj sunin, jon baat karis. Lekin ulog binti karin ki u chup hoy jaay,

²⁰kaahe ke ulog uske hukum ke nai maane sakin. Ulog ke bataawa gay raha ki jon koi jaanwar u pahaaṛ ke chhui tak lei, uske maar dena.

²¹U najaara (sight) etna bhayaanak raha ki Maozas bolis ki u ḍar ke maare kaape laga.

²²Ab tum Zion Pahaaṛ aur swargiye Yarushalam pe aaya hei. I jeewit Parmeshwar ke nagar hei, jahañ hajaar hajaar ainjals aay ke khusi manaay hei.

²³Hiañ tum Parmeshwar ke pyaara bachchan ke paayga, jon ke naam swarag meñ likhaan hei. Aur tum khud Parmeshwar ke, jon sab ke nyaay kare hei, huañ paayga. Hiañ pe u achchha log ke aatma bhi mili jon ke aur bhi achchha banaawa gay raha.

²⁴Aur Yeeshu yahiñ hei! Wahi hei jon Parmeshwar ke nawa vaacha hamlog ke sañghe banaawe hei, aur uske chhiṛkaan khuun, Aibal ke khuun se kahiñ achchha baat bole hei.

²⁵I dekhna ki tum uske baat maanega, jon tum se baat kare hei. Log, jab uske baat nai maanin, jon Mount Saaynaai pe ulog se baat karis raha, to nai bachin. Kaa tum soctha hei ki tum bach jaayga, agar tum uske baat nai maanega jon swarag se baat kare hei?

²⁶Jab Parmeshwar sab se pahila ṭaaim baat karis raha, tab uske awaaj khali dharti ke hilaais. I ṭaaim u waada karis hei ki ek dafe fir dharti ke hilaai aur uske sañghe swarag ke bhi.

²⁷Uske kahna, “ek dafe fir” ke matlab hei i sab cheej jon banaawa gais hei, u sab hilaay ke haṭaawa jaay sake hei. Tab jon cheej ke nai hilaawa jaay sake hei, u sab bahut din tak rahi.

²⁸Ham log ke graiṭful rahe ke hei ki ham log ke u raaj mila jon hilaawa nai jaay sake hei. Aur i raaj meñ ham log Parmeshwar ke weship kar ke aur uske aadar aur sammaan dekhaay ke uske khusi rakkhe sakta hei.

²⁹Ham log ke Parmeshwar bhasam kare waala aagi ke rakam hei!